ព័ត៌មានជាតិ

ការប្រមូលពន្ធ-អាករ ប្រចាំខែមករា ឆ្នាំនេះ ថយចុះប្រមាណជាង៨ភាគរយ

បានផុស

៥ ខែ មុន

នៅ

ថ្ងៃអង្គារ ១៦ កុម្ភៈ ២០២១

ដោយ

នេះបើតាមលទ្ធផលនៃការប្រមូលចំណូលពន្ធប្រចាំខែមករា ឆ្នាំ២០២១ ដែលបង្ហាញនៅក្នុងកិច្ចប្រជុំកាលពីថ្ងៃទី១៥ ខែកុម្ភៈ ឆ្នាំ២០២១ នៅសាលប្រជុំសាលាជាតិពន្ធដារ នៃអគ្គនាយកដ្ឋានពន្ធដារ ក្រោមអធិបតីភាពលោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រី និងជាប្រតិភូរាជរដ្ឋាភិបាលទទួលបន្ទុកជាអគ្គនាយកនៃអគ្គនាយកដ្ឋានពន្ធដារ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមលទ្ធផលនៃការប្រមូលចំណូលពន្ធ ដែលបង្ហាញដោយលោក គង់ វិបុល ឲ្យដឹងថា ក្នុងខែមករា ឆ្នាំ២០២១ ចំណូលពន្ធ-អាករគ្រប់ប្រភេទដែលអគ្គនាយកដ្ឋានពន្ធដារប្រមូលបាន (តាមប្រព័ន្ធគ្រប់គ្រងទិន្នន័យចំណូលអនឡាញរបស់អគ្គនាយកដ្ឋានពន្ធដារ) មានចំនួន៨៧៩,៦៨ ប៊ីលានរៀល (ប្រមាណជា ២១៧,២០ លានដុល្លារអាមេរិក) ស្មើនឹង៩,៦៨% នៃផែនការប្រចាំឆ្នាំ ហើយប្រៀបធៀបនឹងចំណូលពន្ធ-អាករប្រចាំខែមករា ឆ្នាំ២០២០ ឃើញថាថយចុះចំនួន៧៧,០៨ ប៊ីលានរៀល (ប្រមាណជា ១៩,០៣ លានដុល្លារអាមេរិក) ស្មើនឹង ៨,០៦%។

គួរបញ្ជាក់ផងដែរថា ក្នុងខែមករា ឆ្នាំ២០២១ ចំណូលពីប្រភេទពន្ធ០៣ នៅរក្សាកំណើនគួរឲ្យកត់សម្គាល់ក្នុងនោះ ពន្ធលើប្រាក់ចំណូលចំនួន១៧៣,៧៩ប៊ីលានរៀល ធៀបនឹងខែមករា ឆ្នាំ២០២០ កើនឡើង១១,៧៦ ប៊ីលានរៀល ប្រមាណ៧,២៦%, អាករពិសេសចំនួន ៧៧,១០ប៊ីលានរៀល ធៀបនឹងខែមករា ឆ្នាំ២០២០ កើនឡើង៤,០៤ ប៊ីលានរៀល ប្រមាណ៥,៥៣%, និងពន្ធលើប្រាក់ បៀវត្សចំនួន៩១,៣១ប៊ីលានរៀល ធៀបនឹងខែមករា ឆ្នាំ២០២០ កើនឡើង៨,៣៥ ប៊ីលានរៀល ប្រមាណ ១០,០៧%។

សម្រាប់ឆ្នាំ២០២១ នេះ ដើម្បីធានានូវប្រសិទ្ធភាពក្នុងការអនុវត្តការគ្រប់គ្រងប្រមូលចំណូលពន្ធបានគ្រប់តាមផែនការច្បាប់ហិរញ្ញវត្ថុសម្រាប់ការគ្រប់គ្រងចំនួន៩ ០៨៤,៤២ ប៊ីលានរៀល (ប្រមាណ ២ ២៤៣,០៧ លានដុល្លារអាមេរិក) អគ្គនាយកដ្ឋានពន្ធដារនឹងបន្តពង្រឹងការអនុវត្តនូវវិធានការមួយចំនួនដូចជា បន្តពង្រឹងការអនុវត្តឱ្យមានប្រសិទ្ធភាពនូវការចុះបញ្ជីអាជីវកម្មតាមប្រព័ន្ធបច្ចេកវិទ្យាព័ត៌មាន (IT Platform), ផ្សព្វផ្សាយ និងត្រៀមអនុវត្តឱ្យមានប្រសិទ្ធភាពនូវវិធាននិងនីតិវិធីគ្រប់គ្រងការប្រើប្រាស់ឧបករ ណ៍វាស់ចំណុះស្រាបៀរ និងភេសជ្ជៈគ្មានជាតិសុរា ដែលផលិតក្នុងស្រុក និងពង្រឹងការគ្រប់គ្រងប្រមូលចំណូលពន្ធ-អាករគ្រប់ប្រភេទជាដើម៕

អត្ថបទ ៖ កោះកែវ