លោក តាន់ ហ្សង់ហ្វ្រង់ស័រ៖ ដោះស្រាយបញ្ហាព្រំដែន ត្រូវការតែអ្នកជំនាញមុតស្រួច មិនត្រូវការអ្នកជាតិនិយម អ្នកនយោបាយឡើយ

រដ្ឋមន្ត្រីប្រតិភូអមនាយករដ្ឋមន្ត្រី លោក តាន់ ហ្សង់ហ្វ្រង់ស័រ បានគូសបញ្ជាក់ថា ការដោះស្រាយបញ្ហាព្រំដែន គឺត្រូវការតែអ្នកជំនាញផ្នែកភូមិសាស្ត្រ អ្នកជំនាញផ្នែកផែនទី អ្នកជំនាញដ៏មុតស្រួច ហើយគេមិនត្រូវការអ្នកនយោបាយ អ្នកជាតិនិយមឡើយ ។ លោក បានបញ្ជាក់បែបនេះ នៅក្នុងសន្និសីទសារព័ត៌មានស្ដីពីលទ្ធផលនៃដំណើរទស្សនកិច្ចផ្លូវការរបស់សម្ដេចនាយករដ្ឋមន្ត្រីទៅកាន់ប្រទេសឡាវ នារសៀលថ្ងៃទី២៦ ខែមីនា នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោករដ្ឋមន្ត្រីប្រតិភូ បានបន្ថែមថា ការវាស់វែង ការកត់ត្រា ការកំណត់ទីតាំងបង្គោលព្រំដែន កន្លែងដែលត្រូវដាំបង្គោល និងការកំណត់ចំនួនបង្គោលដែល គឺត្រូវចំណាយពេលវេលាយូរ។ ទោះការដោះស្រាយបញ្ហាព្រំដែនជាមួយឡាវ ឬជាមួយបណ្ដាប្រទេសផ្សេងទៀតត្រូវការពេលវេលាយូរក៏ដោយ ក៏នៅតែជាសញ្ញាល្អសម្រាប់រាជរដ្ឋាភិបាលកម្ពុជា។ លោក ហ៊ានអះអាងថា ចំណាយពេលយូរ ជាសញ្ញាល្អសម្រាប់កម្ពុជា ព្រោះតែការរក្សារការពារទឹកដីកម្ពុជាឱ្យបានគង់វង្សសម្រាប់កូនខ្មែរជំនាន់ក្រោយ មិនមែនជារឿងលេងសើច ហើយការរក្សាទឹកដីកម្ពុជាឱ្យគងវង្ស មិនអាចជារឿងលេងសើចឡើយ។

សម្រាប់លោក តាន់ ហ្សង់ហ្វ្រង់ស័រ ការចចារបញ្ហាព្រំដែន និងការរក្សាទឹកដីឱ្យបានគងវង្ស គឺជាទម្ងន់នៃការទទួលខុសត្រូវរបស់រាជរដ្ឋាភិបាលចំពោះមុខប្រវត្តិសាស្ត្រ ការណ៍នេះហើយបានតម្រូវឱ្យកម្ពុជាត្រូវតែតស៊ូយ៉ាងស្វិតស្វាញក្នុងពេលអង្គុយចចាររឿងព្រំដែន។

គួរជម្រាបជូនបន្តិចថា សម្រាប់ដំណើរការនៃការបោះបង្គោលព្រំដែនរវាងប្រទេសកម្ពុជា ឡាវ គឺនៅសេសសល់ចំនួនត្រឹមតែ១៤%ទៀតតែប៉ុណ្ណោះ ខណៈទាំងកម្ពុជា​ ទាំងឡាវសុទ្ធតែបានប្ដេជ្ញាបន្តជំរុញដោះស្រាយបញ្ហាព្រំដែននេះ៕