ទំនិញគេចពន្ធនាំចូលតាមច្រករបៀងកំពង់ស្រឡៅ ជារៀងរាល់យប់ អាជ្ញាធរស្រុកឆែប ថាអត់ដឹង

សេចក្តីរាយការណ៍បានឲ្យដឹងថា ទំនិញគេចពន្ធជាច្រើនមុខមានដូចជា ស្រូវ អង្ករ លៀស ស្ពៃក្ដោប គ្រាប់ផ្លែសំរង គ្រាប់ចន្ទី បារី ដំឡូងក្រៀម ស៊ីម៉ង់ ប្រេងម៉ាស៊ុត ប្រេងសាំង ជ្រូក ជាដើម ត្រូវបានក្រុមឈ្មួញនាំចូលមកពីប្រទេសឡាវ តាមច្រករបៀងកំពង់ស្រឡៅ ឃុំកំពង់ស្រឡៅ ស្រុកឆែប ខេត្តព្រះវិហារ ជារៀងរាល់យប់ ដោយរលូន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រភពព័ត៌មានបានឲ្យដឹងថា ទំនិញគេចពន្ធទាំងនោះត្រូវបានសមត្ថកិច្ចដែលប្រចាំការក្នុងតំបន់នោះ ឲ្យចេញនៅពេល​យប់ដឹកចែកចាយតាមបណ្ដាលខេត្តមួយចំនួននៅក្នុងព្រះរាជាណាចក្រកម្ពុជា។ ប្រភពបន្តថា ការនាំទំនិញគេចពន្ធចូលមកដោយមិនបានបង់ពន្ធចូលរដ្ឋបែបនេះ វាគឺជាអំពើខុសច្បាប់ និងពុករលួយជាប្រព័ន្ធនៅច្រករបៀងកំពង់ស្រឡៅ ហើយមហាជនលើកឡើងថា នេះហើយជាភាពអសកម្មរបស់មន្ត្រីជំនាញនៅក្នុងខេត្តព្រះវិហារតែម្តង។

ជុំវិញករណីនេះដែរ អាជ្ញាធរស្រុកឆែប បានឱ្យដឹងនៅរសៀលថ្ងៃទី២៨ ខែមេសា ឆ្នាំ២០២៤នេះថា ការនាំទំនិញពីច្រករបៀងកំពង់ស្រឡៅ អាជ្ញាធរដែនដីនៅស្រុកឆែប មិនបានគ្រប់គ្រងនោះទេ គឺពាក់ព័ន្ធនឹងសមត្ថកិច្ចដែលប្រចាំការនៅតំបន់នោះ។ អាជ្ញាធរបន្តទៀតថា បច្ចុប្បន្នតំបន់ច្រករបៀងកំពង់ស្រឡៅ នៅមិនទាន់មានមន្ត្រីជំនាញនៅច្រកណាមួយច្បាស់លាស់នៅឡើយទេ។ គឺមានតែមន្ត្រីសមត្ថកិច្ចដែលប្រចាំការនៅតំបន់នោះតែប៉ុណ្ណោះ។

មហាជនបានលើកឡើងថា តំបន់ច្រករបៀងកំពង់ស្រឡៅ ជាតំបន់ដែលលួចនាំចេញនូវទំនិញគេចពន្ធជាច្រើនប្រភេទដោយមិនបានបង់ពន្ធចូលរដ្ឋនោះទេ គឺចូលហោ ប៉ៅមន្ត្រីជំនាញនៅតំបន់នោះតែម្ដង។ គេរំពឹងថា លោក គីម រិទ្ធី អភិបាលខេត្តព្រះវិហារ នឹងចាត់ឱ្យមន្ត្រីពាក់ព័ន្ធចុះស៊ើបអង្កេតករណីនាំចូលទំនិញកិច្ចពន្ធខុសច្បាប់ទាំងនេះចូលមកប្រទេសកម្ពុជាតាមច្រករបៀងកំពង់ស្រឡៅ ដើម្បីធ្វើយ៉ាងណាឲ្យមន្ត្រីប្រមូលពន្ធចូលរដ្ឋមានការកើនឡើង៕ឮ

អត្ថបទ៖ ជុន កុសល