លេខាធិការដ្ឋានភូមិ១ផលិតផល១ខេត្តកំពង់ចាម ណែនាំម្ចាស់សិប្បកម្មពង្រឹងបច្ចេកទេសផលិតកម្ម

លោក ឡី មិច នាយករងរដ្ឋបាលសាលាខេត្ត និងលេខាធិការដ្ឋានភូមិ១ផលិតផល១ ខេត្តកំពង់ចាម ណែនាំដល់ម្ចាស់សិប្បកម្មនូវខ្លឹមសារល្អៗ ដើម្បីពង្រឹងបច្ចេកទេសផលិតកម្មរបស់ខ្លួន សំដៅឈានទៅប្រកួតប្រជែងទីផ្សារ។

ការណែនាំនេះ បានធ្វើឡើងក្នុងឱកាសលោកដឹកនាំក្រុមការងារលេខាធិការដ្ឋានភូមិ១ផលិតផល១ ខេត្តកំពង់ចាម សហការជាមួយអាជ្ញាធរស្រុក ចុះត្រួតពិនិត្យសមាជិកភូមិ១ផលិតផល១ នៅស្រុកបាធាយ ជើងព្រៃ និងព្រៃឈរ កាលពីថ្ងៃ២៩ ខែមេសា ឆ្នាំ២០២៤។

បេសកកម្មនៅក្នុងមូលដ្ឋានខាងលើ ក្រុមការងារលេខាធិការដ្ឋាន បានចុះពិនិត្យសិប្បកម្មផលិតស្ករត្នោត របស់លោកតា ជួប ផន នៅភូមិតាំបឹង ឃុំផ្អាវ ស្រុកបាធាយ និងបានចូលពិនិត្យទីតាំងមជ្ឈមណ្ឌលផ្អាវ ដែលម្ចាស់ទីតាំងនេះ មានបំណងចង់បង្កើតរមណីយដ្ឋានកសិទេសចរណ៍ និងទទួលទិញទឹកត្នោតសម្រាប់ផលិតស្ករត្នោត និងទឹកខ្មេះ។ ក្រុមការងារ ក៏បានចុះពិនិត្យសិប្បកម្មផលិតទៀន របស់លោក ហែល វុទ្ធី នៅភូមិបាទី ឃុំព្រៃចារ ស្រុកជើងព្រៃ និងបានចុះពិនិត្យសិប្បកម្មផលិតចេកឆាប របស់លោក លី សុខា នៅភូមិតារៀម ឃុំជ្រៃវៀន ស្រុកព្រៃឈរ។

ជាមួយនោះ ក្រុមការងារលេខាធិការដ្ឋានភូមិ១ផលិតផល១​ ក៏ដូចជាមន្ត្រីជំនាញ អង្គភាពពាក់ព័ន្ធ ក៏បានស្តាប់ពីការលើកឡើងនូវបញ្ហាប្រឈមនានាពីម្ចាស់សិប្បកម្មនីមួយៗ ហើយបានណែនាំដល់ម្ចាស់សិប្បកម្មទាំងអស់ឱ្យពង្រឹងបច្ចេកទេសផលិតកម្មរបស់ខ្លួនឱ្យបានល្អប្រសើរ ដើម្បីពង្រីកទីផ្សារក្នុងស្រុក ក៏ដូចជានៅទីផ្សារខាងក្រៅ ផងដែរ៕

អត្ថបទ និង រូបភាព ៖ ឡេក  ចាន់ពេជ្រ