ក្រសួងអប់រំ សាកល្បងរៀបចំកម្មវិធី “ការអប់រំពីចម្ងាយដោយប្រព័ន្ធផ្សាយបន្តផ្ទាល់”

ដោយមានការកិច្ចសហការពី សាកលវិទ្យាល័យភូមិន្ទភ្នំពេញ និងការចូលរួមប្រកបដោយស្មារតីទទួលខុសត្រូវខ្ពស់ និងវិជ្ជាជីវៈ នៃសាស្រ្តាចារ្យដែលមានបទពិសោធន៍ ក្រសួងអប់រំ យុវជន និងកីឡា បានសាកល្បងរៀបចំកម្មវិធី “ការអប់រំពីចម្ងាយដោយប្រព័ន្ធផ្សាយបន្តផ្ទាល់” សំដៅជួយដល់សិស្សានុសិស្សដែលមានតម្រូវការរៀនសូត្របន្ថែមក្រៅម៉ោងសិក្សា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បណ្ឌិត សាន វឌ្ឍនា អនុរដ្ឋលេខាធិការក្រសួងអប់រំ យុវជន និងកីឡា បានចុះត្រួតពិនិត្យដំណើរការរៀន និងបង្រៀនតាមប្រព័ន្ធផ្សាយបន្តផ្ទាល់ ជាមួយការគោរពថ្លែងអំណរគុណជូនដល់សាស្រ្តាចារ្យដែលមកបង្រៀនក្នុងកម្មវិធីនេះ។

កម្មវិធីនេះបានបំពាក់ឧបករណ៍ថតសំឡេង និងកាម៉េរា នៅក្នុងថ្នាក់រៀន នៃវិទ្យាល័យឥន្ទ្រទេវី និងឧបករណ៍បញ្ចាំងរូបភាព និងសំឡេង នៅវិទ្យាល័យចំនួន៤ ទៀត រួមមាន វិទ្យាល័យកំបូល ទឹកល្អក់ បូរី១០០ខ្នង និងជ្រោយចង្វារ។

សិស្សានុសិស្សនៅវិទ្យាល័យគោលដៅទាំង៤ អាចរៀន និងសាកសួរសំណួរដោយផ្ទាល់ ទៅកាន់សាស្រ្តាចារ្យ ដែលកំពុងបង្រៀននៅវិទ្យាល័យឥន្ទ្រទេវី។ កម្មវិធីនេះកំពុងសាកល្បងអនុវត្តជាមួយកម្រិតថ្នាក់ទី១២ លើមុខវិជ្ជាវិទ្យាសាស្រ្ត ហើយនឹងពង្រីកទៅកាន់កម្រិតថ្នាក់ និងមុខវិជ្ជាផ្សេងទៀត។

ក្រសួងអប់រំ យុវជន និងកីឡា សូមអំពាវនាវ និងលើកទឹកចិត្តដល់សិស្សានុសិស្សថ្នាក់ទី១២ ចូលរៀនដោយផ្ទាល់នៅវិទ្យាល័យទាំង៥ ខាងលើនេះ ឬតាមវេបសាយ https://www.duraseksa.com/live-course ដោយជ្រើសរើសយកកម្រិតថ្នាក់ទី១២ ជារៀងរាល់ថ្ងៃអាទិត្យ៕