លោក ហ្សង់ ហ្វ្រង់ស័រតាន់៖ ដំណើរទស្សនកិច្ចផ្លូវការរបស់សម្តេចនាយករដ្ឋមន្ត្រីទៅកាន់កូរ៉េខាងត្បូង អ្វីដែលសំខាន់ គឺសេដ្ឋកិច្ច

នៅក្នុងសិន្និសិទសារព័ត៌មាន ស្តីពីលទ្ធផលនៃដំណើរទស្សនកិច្ចផ្លូវការរបស់សម្តេចនាយករដ្ឋមន្ត្រីទៅកាន់ប្រទេសកូរ៉េខាងត្បូង នារាត្រីថ្ងៃទី១៨ ខែឧសភា លោក ហ្សង់ ហ្វ្រង់ស័រ តាន់ រដ្ឋមន្ត្រីប្រតិភូអមនាយករដ្ឋមន្ត្រី បានលើកឡើងថា ដំណើរទស្សនកិច្ចផ្លូវការទៅកាន់ប្រទេសកូរ៉េខាងត្បូងរបស់ សម្តេចធិបតី ហ៊ុន ម៉ាណែត អ្វីដែលសំខាន់ គឺសេដ្ឋកិច្ច និងសេដ្ឋកិច្ច ព្រមទាំងសេដ្ឋកិច្ច។

រដ្ឋមន្ត្រីប្រតិភូអមនាយករដ្ឋមន្ត្រី បានឱ្យដឹងថា ប្រមុខរាជរដ្ឋាភិបាលកម្ពុជា តាមរយៈនយោបាយការទូតសេដ្ឋកិច្ចដ៏សកម្មបានខិតខំពន្យល់ភាគីកូរ៉េ ថ្នាក់ដឹកនាំ និងបណ្តាវិនិយោគិនឱ្យយល់ពីសក្តានុពលពិតប្រាកដនៃប្រទេសកម្ពុជា។ ក្នុងនោះដែរ ភាគីកូរ៉េ ក៏បានទទួលស្គាល់ដែរថា ពីពេលនេះតទៅប្រទេសកម្ពុជាជាប្រទេសដែលប្រសើរជាងគេបង្អស់មួយក្នុងចំណោមបណ្តាប្រទេសអាស៊ានទាំង១០ ដែលអំណោយផលខ្លាំងក្នុងការដាក់ទុនរកស៊ី។

គួរជម្រាបដែរថា ដំណើរទស្សនកិច្ចរបស់សម្តេចធិបតី ហ៊ុន ម៉ាណែត រយៈពេល ៤ថ្ងៃ (ថ្ងៃទី១៥-១៨ ខែឧសភា) លើទឹកដីកូរ៉េខាងត្បូង បានផ្តោត​សំខាន់ទៅលើការលើកកម្ពស់ទំនាក់ទំនង កិច្ចសហប្រតិបត្តិការ ការធ្វើពាណិជ្ជកម្ម និងវិនិ​យោគ​​រវាងកម្ពុជា និងកូរ៉េខាងត្បូង។ ក្នុងនោះ ចំពោះវិស័យសេដ្ឋកិច្ច និងពាណិជ្ជកម្ម ថ្នាក់ដឹកនាំនៃប្រទេសទាំងពីរបានឯកភាពគ្នាលើការខិតខំជំរុញ​ពាណិជ្ជ​កម្ម និងវិនិយោគឱ្យកាន់តែល្អប្រសើរតាមរយៈកិច្ចព្រមព្រៀងពាណិជ្ជកម្មសេរី ដូចជា កិច្ច​ព្រមព្រៀងពាណិជ្ជកម្មសេរីកម្ពុជា-កូរ៉េ (Cambodia-Korea FTA) និងភាពជាដៃគូសេដ្ឋកិច្ចគ្រប់​ជ្រុង​ជ្រោយ​ក្នុងតំបន់ (RCEP)។

ទន្ទឹមនោះ ថ្នាក់ដឹកនាំទាំងពីរ ក៏បានឯកភាពគ្នាជំរុញឱ្យកាន់​តែ​ល្អ​ប្រសើរនៃទំនាក់ទំនងរវាងប្រជាជននៃប្រទេសទាំងពីរផងដែរ៕