ស្ពានអាកាសភ្លោះទី១ ក្នុងអាណត្តិសម្ដេចធិបតី ត្រូវបានបើកការដ្ឋានសាងសង់ ដែលចាយថវិកាជាង១៦លានដុល្លារ

នាព្រឹកថ្ងៃទី​១៧ ខែមិថុនា ឆ្នាំ២០២៤ សម្តេចធិបតី ហ៊ុន ម៉ាណែត បានអញ្ជើញជាអធិបតីបើកការដ្ឋានសាងសង់ស្ពានអាកាសភ្លោះ ស្ថិតនៅចំណុច​ប្រសព្វមហាវិថីសម្តេចតេជោ ហ៊ុន សែន និងផ្លូវជាតិលេខ២ ព្រំប្រទល់រវាង​រាជធានី​ភ្នំពេញ និងខេត្តកណ្តាល។ ស្ពានអាកាសភ្លោះ ដែលបានបើកការដ្ឋានសាងសង់ពេលនេះ ជាស្ពានអាកាសភ្លោះទី១ ក្នុងអាណត្តិដឹកនាំរបស់សម្ដេចធិបតី ដោយចំណាយថវិកាជាង១៦លានដុល្លារ។

តាមរបាយការណ៍របស់លោក ឃួង ស្រេង អភិបាលរាជធានីភ្នំពេញ ស្ពានអាកាសភ្លោះដែលបើកការដ្ឋានសាងសង់នេះ សាងសង់ឡើងដើម្បីឆ្លើយតបទៅនឹង​ស្ថានភាពចរាចរណ៍ ដែលនឹងមានសភាពកាន់តែមមាញឹកនៅពេលដែលព្រលានយន្តហោះអន្តរ​ជាតិតេជោ ស្ថិតក្នុងខេត្តកណ្តាល ត្រូវដាក់ឱ្យដំណើរការនៅឆ្នាំ២០២៥។ លោក ឃួង ស្រេង បានលើកឡើងថា មហាវិថី​សម្តេច​តេជោ ហ៊ុន សែន ត្រូវបានសង់តភ្ជាប់ទៅដល់ព្រលានយន្តហោះថ្មីនេះ ដូច្នេះច្បាស់​ណាស់នៅពេលព្រលានយន្តហោះដាក់ឱ្យដំណើរការ ចរាចរណ៍កាន់តែមមាញឹក ហើយនៅ​ចំណុច​ឆ្លងកាត់ផ្លូវជាតិលេខ២ អាចនឹងប្រឈមការកកស្ទះ ប្រសិនបើមិនមានស្ពានអាកាស​ភ្លោះ​សម្រាប់ឆ្លងកាត់លើផ្លូវជាតិលេខ២ទេនោះ។

ដោយប្រមើលមើលឃើញពីបញ្ហាប្រឈមនេះហើយ ទើបសម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានសម្រេចឱ្យសាងសង់ស្ពានអាកាសភ្លោះនេះឡើង។

លោកអភិបាលរាជធានីភ្នំពេញ ថា ស្ពានអាកាសភ្លោះនេះ គឺជាស្ពានអាកាសទី១ ដែលត្រូវបានបើកការដ្ឋានស្ថាបនា​ក្នុង​អាណត្តិរាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំរបស់សម្ដេចធិបតី នាយករដ្ឋមន្ត្រី។

ស្ពានអាកាសភ្លោះនេះ សាងសង់ដោយក្រុមហ៊ុនវិនិយោគទុនអាណិកជនកម្ពុជា (OCIC) ដោយគ្រោងប្រើរយៈពេល សាងសង់ចំនួន១២ខែ និងត្រូវចំណាយថវិកាចំនួន ១៦,២០០,៥០០ដុល្លារ ដែលជាកញ្ចប់ថវិកាបានមកពីការបង្វែរកញ្ចប់ថវិកាពីគម្រោង​សាងសង់​ស្ពានអាកាស គង់ សំអុល និងមូលនិធិអភិវឌ្ឍកោះនរា។ ស្ពាននេះ នឹងក្លាយជាស្ពានអាកាស ទី៩ ក្រោមកិច្ចសហប្រតិបត្តិការរវាងរដ្ឋបាលរាជធានីភ្នំពេញ និងវិស័យឯកជន ស្របតាមអនុសាសន៍ដ៏ម៉ឹងម៉ាត់ក្នុងការស្ថាបនាហេដ្ឋារចនាសម្ព័ន្ធ ដែលដាក់ចេញដោយសម្ដេចតេជោ ហ៊ុន សែន គឺ «ការយកទីក្រុងចិញ្ចឹមទីក្រុង ឬយកស្លឹកត្នោតខ្ចប់ស្ករត្នោត»។

បច្ចុប្បន្នក្នុងរាជធានីភ្នំពេញ មានស្ពានអាកាសចំនួន៧ ដែលបានសាងសង់រួចរាល់ និង​កំពុងប្រើប្រាស់ រួមមាន៖ ស្ពានអាកាសក្បាលថ្នល់ ស្ពាន​អាកាស​៧មករា ស្ពានអាកាសស្ទឹងមានជ័យ ស្ពាន​អាកាស​៥មករា ស្ពានអាកាសផ្សារដីហ៊ុយ ស្ពាន​អាកាស​រង្វង់មូលចោមចៅ និងស្ពានអាកាសឫស្សីកែវ ស្ថិតលើផ្លូវជាតិលេខ៥។

ក្រៅពីស្ពានអាកាសដែលដាក់ឱ្យប្រើប្រាស់ដូចរៀបរាប់ខាងលើ ក៏នៅមានស្ពានអាកាសមួយទៀតកំពុងសាងសង់ផងដែរ នោះ គឺស្ពានអាកាស «មរតកតេជោ» ដែលជាស្ពានស្ថិតនៅចំណុចប្រសព្វរវាងមហាវិថីសម្តេចតេជោ ហ៊ុន សែន ជាមួយមហាវិថីព្រះមុនីវង្ស និងវិថីកងយោធពលខេមរភូមិន្ទ ហៅ ផ្លូវ២៧១។ ចំពោះស្ពានអាកាសភ្លោះ នៅចំណុច​ប្រសព្វ មហាវិថីសម្តេចតេជោ ហ៊ុន សែន និងផ្លូវជាតិលេខ២នេះ ត្រូវបានលោក ឃួង ស្រេង ស្នើប្រសិទ្ធនាមថា «ស្ពានអាកាសសម្ដេចធិបតី»៕