ព័ត៌មានជាតិ

សម្តេច ម៉ែន សំអន ថ្នាក់ដឹកនាំវ័យក្មេងកម្ពុជា-ឡាវ-វៀតណាម ជាមាគ៌ាដ៏រឹងមាំបន្តពង្រឹង និងពង្រីកនូវចំណងមិត្តភាព

បានផុស

២ years មុន

នៅ

ថ្ងៃព្រហស្បតិ៍ ១១ កក្កដា ២០២៤

ដោយ

ភ្នំពេញ ៖ សម្តេចកិត្តិសង្គហបណ្ឌិត ម៉ែន សំអន អនុប្រធានគណបក្សប្រជាជនកម្ពុជា បានថ្លែងថា ថ្នាក់ដឹកនាំវ័យក្មេងកម្ពុជា-ឡាវ-វៀតណាម ជាមាគ៌ាដ៏រឹងមាំបន្តពង្រឹង និងពង្រីកនូវចំណងមិត្តភាព សាមគ្គីភាពជាប្រពៃណី ឲ្យកាន់តែមានប្រសិទ្ធភាពខ្ពស់។ សម្តេចកិត្តិសង្គហបណ្ឌិត ម៉ែន សំអន ថ្លែងបែបនេះ ខណៈអញ្ជើញជាអធិបតីក្នុងពិធីបិទវគ្គបណ្តុះបណ្តាលថ្នាក់ដឹកនាំវ័យក្មេងកម្ពុជា-ឡាវ-វៀតណាម នៅវិមាន ៧មករា នារសៀល ថ្ងៃពុធ ៤កើត ខែអាសាឍ ឆ្នាំរោង ឆស័ក ព.ស.២៥៦៨ ថ្ងៃទី១០ ខែកក្កដា ឆ្នាំ២០២៤ វិមាន៧មករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចកិត្តិសង្គហបណ្ឌិតបានមានប្រសាសន៍លើកឡើងថា ឆ្លងកាត់តាមវគ្គបណ្តុះបណ្តាលរយៈពេល ១០ថ្ងៃនេះ សិក្ខាកាមបានយល់ដឹងកាន់តែច្បាស់ថែមទៀត អំពីលក្ខណៈពិសេសជាប្រវត្តិសាស្ត្រមិន អាចខ្វះបាន អំពីទំនាក់ទំនងកម្ពុជា-ឡាវ-វៀតណាម នូវប្រពៃណី សាមគ្គីភាព ភាពជាអ្នកជិតខាងល្អ និងការជួយគ្នាទៅវិញទៅមកនៅគ្រប់កាលៈទេសៈ ចាប់តាំងពីបុព្វហេតុតស៊ូរំដោះជាតិឱ្យរួចផុតពីនឹមអាណានិគមនិយម រហូតដណ្តើមបាន ឯករាជ្យ សេរីភាព និងកសាងអភិវឌ្ឍប្រទេសឱ្យមានសុខសន្តិភាព និងការរីកចម្រើនលើគ្រប់វិស័យរហូតដល់បច្ចុប្បន្ន។

សម្តេចកិត្តិសង្គហបណ្ឌិត បានបន្តទៀតថា វគ្គបណ្តុះបណ្តាលនេះ បានក្លាយទៅជាយន្តការសម្រាប់បន្តបង្កើតអនុស្សាវរីយ៍ និងកិច្ចសហប្រតិបត្តិការ ជិតស្និទ្ធក្នុងស្រទាប់យុវជនជំនាន់ថ្មី ជាពិសេស ការសម្រេចឱ្យបាន នូវ «ប្រទេសបីគោលដៅទេសចរណ៍រួមតែមួយ» ដើម្បីការអភិវឌ្ឍ និងវិបុលភាពនៃប្រទេសនីមួយៗ ក្នុងស្មារតីសាមគ្គីភាព ភាពជាអ្នកជិតខាងល្អ បងប្អូនល្អ និងកិច្ចសហប្រតិបត្តិកាគ្រប់ជ្រុងជ្រោយ គង់វង្ស រឹងមាំយូរអង្វែង។

ជាចុងក្រោយ សម្តេចកិត្តិសង្គហបណ្ឌិត ក៏បានជូនពរឲ្យទំនាក់ទំនងមិត្តភាព សាមគ្គីភាពជាប្រពៃណី និងកិច្ចសហប្រតិបត្តិការគ្រប់ជ្រុងជ្រោយ រឹងមាំ យូរអង្វែងរវាង ប្រទសទាំង៣ វៀតណាម កម្ពុជា ឡាវ ស្រស់បំព្រង និងរឹងមាំជារៀងរហូត៕

ដោយ ៖ វិមាន