អភិបាលខេត្តកំពង់ធំ ហាមដាច់ណាត់ ការរុករានទន្ទ្រាន​រំលោភយកដីរដ្ឋនៅតំបន់៣

អាជ្ញាធរខេត្តកំពង់ធំ នៅតែបន្តចាត់វិធានការម៉ឺងម៉ាត់ ក្នុងកិច្ចការពារការរុករានទន្ទ្រានកាន់កាប់ដី តំបន់បីរបស់រដ្ឋ ដើម្បីធ្វើកម្មសិទ្ធិដោយខុសច្បាប់។

នៅថ្ងៃទី ១៤ ខែកក្កដា ឆ្នាំ២០២៤ លោក នួន ផារ័ត្ន អភិបាលខេត្តកំពង់ធំបាន ដឹកនាំសហការី ចុះពិនិត្យស្ថានភាពការបង្ករបង្កើនផល និងស្ថានភាពដីរក្សាទុករបស់រដ្ឋ (ដីតំបន់៣) នៅភូមិសាស្ត្រស្រុក កំពង់ស្វាយ ខេត្តកំពង់ធំ។

លោកអភិបាខេត្ត ហាមដាច់ខាតចំពោះជនខិលខូចណា ដែលរុករានទន្ទ្រានរំលោភយកដីរដ្ឋនៅតំបន់៣ យកធ្វើជាកម្មសិទ្ធិ។ ហើយថា ក្នុងនាមគណៈបញ្ជាការ ឯកភាពខេត្ត ត្រូវអនុវត្តន៍ដោយម៉ឺងម៉ាត់បំផុតតាមបទបញ្ជាររបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ពាក់ព័ន្ធនឹងកិច្ចការពារធនធានធម្មជាតិ។

លោកអភិបាលខេត្តបញ្ជាក់ថា ជនទាំងឡាយណា ទោះមន្ត្រីក្ដី ឈ្មួញក្ដី ដែលធ្លាប់ព្យាយាមប៉ុនប៉ងធ្វើសកម្មភាព ដោយផ្ទាល់ ឬឈរពីក្រោយប្រជាជនមកពីតំបន់ផ្សេងៗ ក្នុងចេតនាកាប់បំផ្លាញព្រៃឈើ ទន្ទ្រានដីរដ្ឋ ដីព្រៃលិចទឹក និងបទល្មើសនេសាទជាដើម ត្រូវប្រញាប់ដក ខ្លួនចេញជាបន្ទាន់។

ទន្ទឹមជាមួយគ្នានេះ អាជ្ញាធរមូលដ្ឋាន និងសមត្ថកិច្ចជំនាញគ្រប់លំដាប់ថ្នាក់ ត្រូវចាត់តាំងផ្សព្វផ្សាយជូនប្រជាពលរដ្ឋឲ្យបានជ្រួតជ្រាប អំពីវិធានការផ្លូវច្បាប់ចំពោះការឃុបឃិតបំផ្លិចបំផ្លាញ ធនធានធម្មជាតិ, ពង្រឹងតួនាទីភារកិច្ច នៅទីបញ្ជាការស្រាលក្នុងកិច្ចការពារទប់ស្កាត់ និងបង្ក្រាប រាល់បទល្មើសធនធានធម្មជាតិឱ្យមានប្រសិទ្ធភាព, ក្តាប់ព័ត៌មានបន្ថែមអំពីចលនាអូសទាញប្រជាពលរដ្ឋ ប្រមូលផ្តុំប្រឆាំងតវ៉ា ដើម្បីមានវិធានការទាន់ពេលវេលា, ស្រាវជ្រាវរកមុខសញ្ញា ពិសេសអ្នកនៅពីក្រោយខ្នង ដោយសហការជាមួយមន្ទីរជំនាញ និងអាជ្ញាធរពាក់ព័ន្ធ, ចាត់វិធានការដកហូតដីដែលបានរកឃើញ ពីការទន្ទ្រានខុសច្បាប់ និងដីអាស្រ័យផលខុសច្បាប់ព្រមទាំងកសាងសំណុំរឿងតាមនីតិវិធី។ ហើយថាកិច្ចការទាំងអស់នេះត្រូវអនុវត្តន៍ដាច់ខាត តាមអនុក្រឹត្យលេខ ២៨ អនក្រ.បក ស្តីពី ការកែសម្រួលផ្ទៃដីទំហំ ២៧ ៧៧៤ហិកតា ៧០អា ចេញពីតំបន់៣ បញ្ចូលមកតំបន់២ នៃតំបន់ទន្លេសាប ស្ថិតក្នុងភូមិសាស្រ្តខេត្តកំពង់ធំ និងអនុញ្ញាត្តឲ្យប្រជាពលរដ្ឋប្រើប្រាស់ និងអាស្រ័យផល៕

អត្ថបទ៖ ឈាង មករា