ស្រុកចំនួន២នៅខេត្តកំពង់ធំរងគ្រោះដោយជំនន់ទឹកភ្លៀងប៉ះពាល់ស្រូវ២៦០ហិកតា និងផ្លូវមួយចំនួន

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានមានប្រសាសន៍ថា ស្រុកចំនួន២នៃខេត្តគំពង់ធំបានរងគ្រោះដោយជំនន់ទឹកភ្លៀងប៉ះពាល់ស្រូវ២៦០ហិកតា និងផ្លូវកៅស៊ូមួយចំនួន។

លោកបានបន្តថា ស្រុក២ដែលរងគ្រោះដោយជំនន់ទឹកភ្លៀងរួមមានស្រុកកំពង់ស្វាយ នៅឃុំកំពង់គោ ភូមិខ្សាច់ជីរស់ ទឹកលិចស្រូវប្រាំង ចំនួន ៥៧ហិកតា និងទឹកហូរកាត់ផ្លូវប្រវែង ២៥០ម៉ែត្រ ពីដើមភូមិត្រង់កែង សាំងផា ឆ្លងកាត់
ទៅសាលាបឋមសិក្សាអូរតាសេក។ នៅភូមិកំពង់គោលើ ទឹកហូរបាក់ទ្វារអូរឡោម្ខាង និងកំពង់ស្វាយ ឃុំព្រៃគុយ ប៉ះពាល់ស្រូវចំនួន១២៣.៨០ហិកតា ស្មើនិង៦១គ្រួសារ។ ចំណែកស្រុកសណ្តាន់ប៉ះពាល់នៅឃុំក្លែង ក្នុងនោះលិចស្រូវបីខែចំនួន៥៦.៤៥ហិកតា លិចស្រូវវស្សា២៤ហិកតាស្មើនឹង៦៨គ្រួសារ លិចចូលក្រោមផ្ទះ២ខ្នង លិចផ្លូវគ្រួសក្រហម​២០ម៉ែត្រ​ បាក់ទំនប់បឹងប្រាំងប្រវែង ១០ម៉ែត្រ និងបាក់ច្រាំងស្ទឹងបណ្តាលឱ្យងាប់គោ១ក្បាល ស្ថិតនៅភូមិរកាជួរ ។

ពាក់ព័ន្ធករណីដាច់ផ្លូវមួយចំនួនដែលបណ្តាលមកពីជំនន់ទឹកភ្លៀងនៅ ផ្លូវលំ(បឹងក្រញ៉ាក) ឃុំមានរិទ្ធ និងផ្លូវក្រាល កៅស៊ូនៅចំណុចបឹងម្រឹក(ភូមិងន ឃុំងន)ស្រុកសណ្តាន់ រដ្ឋបាលស្រុក និងមន្ទីរ អង្គភាពបានណែនាំឱ្យស្តារផ្លូវនេះឡើងវិញ៕

អត្ថបទ៖ សំអឿន