កងទ័ព ជួយប្រមូលផលដំឡូងមីកសិករដែលជនលិចដោយសារជំនន់ទឹកភ្លៀង

កងវរៈសេនាតូចលេខ១ ចំណុះឱ្យតំបន់ប្រតិបត្តិការសឹករងក្រចេះ ដឹកនាំដោយ លោក គង្គ បានហួន មេបញ្ជាការរងកងវរ:សេនាតូចលេខ១ បានដឹកនាំកម្លាំង យោធាចុះអន្តរាគមន៍ជួយដកដំណាំដំឡូងមីរបស់ប្រជាកសិករ នៅភូមិខ្នងពស់ ស្ថិតក្នុងឃុំដារ ស្រុកចិត្របុរី ខេត្តក្រចេះ ដែលរងផលប៉ះពាល់ដោយសារ ជំនន់ទឹកភ្លៀងជនលិច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងពេលចុះជួយអន្តរាគមន៍ ដល់ពលរដ្ឋដែលកំពុងរងផលប៉ះពាល់ ដោយសារជំនន់ទឹកភ្លៀង កងអន្តរាគមន៍វរ:សេនាតូចលេខ១ បានបញ្ជូនកម្លាំងចំនួន ២១នាក់ ប្រជាការពារភូមិ ៤នាក់ ចែកជាពីរក្រុម បានជួយដកដំណាំដំឡូងមី របស់ប្រជាពលរដ្ឋ បានចំនួន ៦គ្រួសារ នៅថ្ងៃទី១៨ ខែកក្កដា ឆ្នាំ២០២៤ និងបន្តជួយដូចភ្លៀងរលឹមក្នុងករណីដែលប្រជាពលរដ្ឋ ជូបគ្រោះធម្មជាតិ។

ពលរដ្ឋរស់នៅក្នុងភូមិខ្នងពស់ ឃុំដារ បានឱ្យដឹងថា ដោយសារស្ថានភាពទឹកភ្លៀង ក្នុងឆ្នាំនេះ មានការហត់ឡើងលឿនទើបធ្វើឱ្យពួកគាត់ប្រមូលផលដំណាំដំឡូងមីរបស់ពួកគាត់មិនទាន់ ទើបធ្វើឱ្យមានការលិច ហើយពួកគាត់ បានថ្លែងអំណរគុណដល់កងកម្លាំង យោធាដែលបានជួយអន្តរាគមន៍បានទាន់ពេលវេលា។

តាមការបញ្ជាក់ពី លោក ឈាង វត មេឃុំដារ ជំនន់ទឹកភ្លៀងនៅក្នុងឃុំដា គិតមកដល់ពេលនេះ បានប៉ះពាល់ចំនួនមួយភូមិ ដែលកំពុងរងផលប៉ះពាល់ខ្លាំង គឺភូមិខ្នងពស់ ជំនន់ទឹកភ្លៀងធ្វើឱ្យប៉ះពាល់នូវផលដំណាំរួមមាន ដំឡូងមី ចំនួន ៤១ហិកតា ពោតក្រហមចំនួន ៥ហិកតា ស្រែវស្សាចំនួន ២៥ហិកតា៕

ដោយ៖ ប្រុញ វិធិន