UN សរសើរកម្ពុជា ដែលប្រែក្លាយពីប្រទេសទទួល ទៅជាប្រទេសបញ្ជូនទ័ពមួកខៀវទៅប្រទេសដទៃ ដើម្បីរក្សាសន្តិភាព

អគ្គលេខាធិការរង អង្គការសហប្រជាជាតិ លោក Atul KHARE បានកោតសរសើរអំពីជោគជ័យរបស់កម្ពុជា និងចាត់ទុកកម្ពុជា ជាប្រទេសគំរូដែលបានប្រែក្លាយពីប្រទេសដែលធ្លាប់ទទួលកងកម្លាំងរក្សាសន្តិភាពរបស់អង្គការសហប្រជាជាតិ ទៅជាប្រទេសដែលបានចូលរួមចំណែកក្នុងការបញ្ជូនកងកម្លាំងរក្សាសន្តិភាព ទៅកាន់បណ្ដាប្រទេសជាច្រើន ក្រោមឆ័ត្រអង្គការសហប្រជាជាតិ ដើម្បីចូលរួមថែរក្សាសន្តិភាព បោសសម្អាតមីន និងកសាងហេដ្ឋារចនាសម្ព័ន្ធនានា។ ជាមួយគ្នានេះ កម្ពុជាបានផ្ដល់នូវការបណ្ដុះបណ្ដាលផ្នែកបោសសម្អាតមីន ដល់បណ្ដាប្រទេសមួយចំនួន និងមានមជ្ឈមណ្ឌលតំបន់អាស៊ានសម្រាប់សកម្មភាពមីន។

លោកអគ្គលេខាធិការរង ថ្លែងកោតសរសើរបែបនេះ​ ក្នុងឱកាសជួបពិភាក្សាការងារជាមួយសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នាព្រឹកថ្ងៃទី២២ ខែកក្កដា ឆ្នាំ២០២៤ នៅវិមានសន្តិភាព។

លោកអគ្គលេខាធិការរង ក៏បានសម្ដែងនូវការគាំទ្រចំពោះកម្ពុជា ដែលនឹងធ្វើជាម្ចាស់ផ្ទះនៃកិច្ចប្រជុំត្រួតពិនិត្យឡើងវិញលើកទី៥ នៃអនុសញ្ញាស្តីពី ការហាមការប្រើប្រាស់មីនប្រឆាំងមនុស្ស (អនុសញ្ញាអូតាវ៉ា) នៅខែវិច្ឆិកា ឆ្នាំ២០២៤។ លោកAtul KHARE ក៏បានកោតសរសើរការអភិវឌ្ឍដ៏ឆាប់រហ័សរបស់កម្ពុជា​ និងបាន​អបអរសាទរកម្ពុជា ដែលនឹងចាកចេញពីក្រុមប្រទេសអភិវឌ្ឍន៍តិចតួច ក្នុងពេលអនាគតដ៏ខ្លី។

សម្ដេចធិបតី បានអរគុណអង្គការសហប្រជាជាតិ ដែលបានរួមចំណែកកសាងនិងអភិវឌ្ឍសង្គម-សេដ្ឋកិច្ចកម្ពុជា ក៏ដូចជាបានគាំទ្រ និងបន្តគាំទ្រកងកម្លាំងរក្សាសន្តិភាពរបស់កម្ពុជា ក្រោមឆ័ត្រអង្គការសហប្រជាជាតិ ។ បន្ថែមលើនេះ សម្ដេចធិបតី បានបញ្ជាក់ថា រាជរដ្ឋាភិបាលកម្ពុជាបន្តប្ដេជ្ញាចិត្ត និងត្រៀមខ្លួនរួចជាស្រេចក្នុងការបន្តបញ្ជូនកងកម្លាំងរក្សាសន្តិភាពរបស់កម្ពុជា ដើម្បីចូលរួមជាមួយអង្គការសហប្រជាជាតិក្នុងការថែរក្សាសន្តិភាព និងបោសសម្អាតមីនមនុស្សធម៌។

សម្ដេចធិបតី បានគូសបញ្ជាក់ថា កម្ពុជាបានត្រៀមខ្លួនរួចជាស្រេចក្នុងការរៀបចំធ្វើជាម្ចាស់ផ្ទះនៃកម្មវិធីភាពជាដៃគូត្រីភាគីអង្គការសហប្រជាជាតិ-សាធារណរដ្ឋកូរ៉េ-កម្ពុជា ( The UN-ROK-Cambodia Triangular Partnership) ក្នុងចុងឆ្នាំ២០២៤ និងកម្មវិធីភាពជាដៃគូត្រីភាគីអង្គការសហប្រជាជាតិ-ជប៉ុន-កម្ពុជា (The UN-Japan-Cambodia Triangular Partnership) នៅដើមឆ្នាំ២០២៥។

គួរឱ្យដឹងថា ក្នុង​រយៈពេល​១៨​ឆ្នាំ​ចុងក្រោយ កម្ពុ​ជា​បាន​បញ្ជូន​កងទ័ពមួកខៀវសរុប​ ៩ ៥៧០​នាក់​ ដើម្បីទៅ​បំពេញ​បេសកកម្ម​ថែរក្សា​សន្តិភាព​ក្រោមឆ័ត្រអង្គការ​សហប្រជាជាតិ​ចំនួន​១២​បេសកកម្ម​ នៅ​តាម​បណ្ដា​ចំនួន​១០​ប្រទេស ដោយបំពេញការងារ​លើ​ជំនាញ​បោស​សម្អាត​មីន មន្ទីរពេទ្យ​កម្រិត២  កម្ទេច​គ្រាប់​មិន​ទាន់​ផ្ទុះ វិស្វកម្ម​សំណង់​ផ្ដេក-បញ្ឈរ វិស្វកម្ម​ព្រលាន​យន្តហោះ និង​សង្កេតការណ៍​យោធា។

ប្រទេស​ទាំង​​នោះមានដូចជា  សាធារណរដ្ឋ​ស៊ូដង់ ស៊ូដង់​ខាងត្បូង ឆាដ លីបង់ សាយប្រើស ស៊ីរី អាហ្វ្រិក​កណ្ដាល ម៉ាលី យ៉េមែន និង​សាធារណរដ្ឋ​ប្រជាធិបតេយ្យ​កុងហ្គោ។​ ក្នុងពេលនេះ កម្ពុជា​មាន​កងទ័ព​មួក​ខៀវ​​៦២៧​នាក់​ ដែល​បាននឹង​កំពុង​បំពេញការងារតាម​បណ្ដា​ប្រទេស​កំពុង​មាន​ជម្លោះ​ចំនួន​៤ រួមមាន៖ លីបង់ ស៊ូដង់​ខាងត្បូង សាធារណរដ្ឋ​ប្រជាធិបតេយ្យ​កុងហ្គោ និងអាហ្វ្រិក​កណ្ដាល៕