អតីតចៅអធិការវត្ត ត្រូវបានតុលាការខេត្តព្រះវិហារ ដាក់ពន្ធនាគារពាក់ព័ន្ធករណីរំលោភក្មេងស្រី៩ឆ្នាំ

កាលពីរសៀលថ្ងៃទី៣០ ខែកក្កដាឆ្នាំ២០២៤ ចៅក្រមសាលាដំបូងខេត្តព្រះវិហារ បាននសម្រេចឃុំខ្លួន ព្រះតេជគុណ ទឹម ហ៊ុន អតីតចៅអធិការវត្តភ្នំកន្ធាយ ក្នុងឃុំស្រយ៉ង់ ស្រុកគូលែន ខេត្តព្រះវិហារ ពាក់ព័ន្ធករណីរំលោភក្មេងស្រីវ័យ៩ឆ្នាំ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ម្តាយជនរងគ្រោះបានឲ្យដឹងថា ករណីនេះ ពួកគាត់បានដាក់ប្តឹងទៅអធិការនគរបាលស្រុកគូលែន តាំងពីថ្ងៃទី១៩ ខែធ្នូ ឆ្នាំ២០២៣ ដើម្បីជួយរកយុត្តិធម៌ និងបានទាមទារសំណងចំនួន២០លានរៀល ក៏ដូចជាស្នើឱ្យសមត្ថកិច្ចចាត់ការទៅលើជនសង្ស័យខាងលើទៅតាមផ្លូវច្បាប់។ គ្រួសាររងគ្រោះបន្តថា គាត់ពិតជាថ្លែងអំណរគុណយ៉ាងខ្លាំងចំពោះស្ថាប័នតុលាការខេត្តព្រះវិហារ ដែលបានជួយរកភាពយុត្តិធម៌ដល់កូនស្រីរបស់គាត់។ គ្រួសាររងគ្រោះបន្ថែមថា រហូតមកដល់ពេលនេះ កុមារីដែលអាណាព្យាបាលពួកគេអះអាងថាត្រូវបានចៅអធិការរំលោភនោះ កំពុងស្ថិតក្នុងសភាពស្លេកស្លាំងនៅឡើយ ហើយក៏មិនបានបញ្ជូនកូនឲ្យចូលរៀននៅឡើយទេ។ 

ពលរដ្ឋលើកឡើងថា បន្ទាប់ពីទទួលព័ត៌មានថា ឃុំខ្លួនអតីត ចៅអធិករវត្តភ្នំកន្ធាយ រួចមកពួកគាត់នឹងរៀបចំវត្តឡើងវិញ ដោយសុំអញ្ជើញអាជ្ញាធរពាក់ព័ន្ធចូលរួមផងដែរ។

មន្ត្រីតុលាការខេត្តព្រះវិហារ បានបង្ហើបឲ្យដឹងនាព្រឹកថ្ងៃទី៣១ ខែកក្កដា ឆ្នាំ២០២៤ថា ករណីបណ្ដឹងរំលោភសេពសន្ថវ:លើក្មេងស្រីនៅឃុំត្រយ៉ង់ ស្រុកគូលែន គឺខាងចៅក្រមនៃសាលាដំបូងខេត្តព្រះវិហារ បានស្រាវជ្រាវយ៉ាងយកចិត្តទុកដាក់ និងបានឲ្យមន្ត្រីជំនាញចាប់ផ្សឹក និងសម្រេចឃុំខ្លួនព្រះតេជគុណ ទឹម ហ៊ុន ចៅអធិការវត្តភ្នំកន្ធាយ ដាក់ពន្ធនាគារ ជាបណ្តោះអាសន្ន កាលពីរសៀលថ្ងៃទី៣០ខែកក្កដា ឆ្នាំ២០២៤៕

ដោយ៖ជុន កុសល