ខេត្តកំពត ត្រៀមខ្លួនរួចរាល់ដើម្បីអបអរសាទរថ្ងៃបើកការដ្ឋានព្រែកជីកហ្វូណនតេជោ

នាថ្ងៃទី២ ខែសីហា ឆ្នាំ២០២៤ លោក ខៀវ រិទ្ធិភ័ណ្ឌ អភិបាលរងខេត្តកំពតបានថ្លែងនៅក្នុងកិច្ចប្រជុំថា អាជ្ញាធរខេត្តកំពត បានត្រៀមរៀបចំពិធីអបអរសាទរថ្ងៃបើកការដ្ឋានព្រែកជីកហ្វូណនតេជោ នៅថ្ងៃទី៥ ខែសីហា រួចរាល់ជាស្រេច។

ថ្នាក់ដឹកនាំខេត្តកំពតបានបញ្ជាក់ថា រដ្ឋបាលខេត្តបានត្រៀមខ្លួនរួចរាល់ដើម្បីអបអរសាទរថ្ងៃបើកការដ្ឋានព្រែកជីកហ្វូណនតេជោ នៅថ្ងៃទី៥ ខែសីហានេះ ដោយនឹងរៀបចំកម្មពិធីជួបជុំទូងស្គរ ការសម្តែងរបាំឆៃយ៉ាំ របាំជូនពរ ចម្រៀងអបអរសាទររួមគ្នា ការទទួលទានអាហាសាមគ្គី ការប្រគុំតន្ត្រីច្រើនទីតាំង និងបាញ់កាំជ្រួចជាដើម។ ប្រជាពលរដ្ឋរីករាយចូលរួម ព្រោះបានយល់ច្បាប់ពីអត្ថប្រយោជន៍ព្រែកជីកហ្វូណនតេជោ។ 

លោក ខៀវ រិទ្ធិភ័ណ្ឌ បានមានប្រសាសន៍ថា ដោយមានការណែនាំពីប្រមុខរាជរដ្ឋាភិបាល រដ្ឋបាលខេត្តកំពតបានត្រៀមរៀបចំកម្មវិធីជាច្រើន ដើម្បីអបអរសាទរពិធីបើកការដ្ឋានព្រែកជីកហ្វូណនតេជោពេញមួយថ្ងៃ គឺថ្ងៃទី៥ ខែសីហានេះ។

ក្នុងនោះមានពីធីជួបជុំថ្នាក់ដឹនាំ មន្ត្រីរាជការ កម្លាំង យុវជន សិស្សានុសិស្ស និស្សិតនៅសាលប្រជុំបូកគោទូងស្គរ ការសម្តែងរបាំឆៃយ៉ាំ របាំជូនពរ ចម្រៀងអបអរសាទររួមគ្នានៅពេលព្រឹក និងការទទួលទានអាហាសាមគ្គីរួមគ្នានៅពេលល្ងាច ការប្រគុំតន្ត្រី២ទីតាំងនៅសួនច្បាររូបសំណាកព្រះបាទអង្គដួង និងទីតាំងត្រីសេះសមុទ្រ  និងបាញ់កាំជ្រួចអបអរផងដែរ ហើយការរៀបចំផ្សេងៗបានត្រៀមរួចរាល់ហើយ។

ដោយឡែកពលរដ្ឋក៏បានត្រៀមខ្លួនរួចរាល់ ក្នុងការចូលរួមអបអរសាទរពីធីបើកការដ្ឋានសាងសង់ព្រែកជីកហ្វូណនតេជោ ព្រោះពួកគេយល់ច្បាប់អំពីអត្ថប្រយោជន៍ និងរំពឹងថាសេដ្ឋកិច្ចគ្រួសារ និងប្រទេសជាតិកាន់តែប្រសើរ បន្ទាប់ពីមានផ្លូវទឹកដឹកទំនិញ និងធ្វើដំណើរជាប្រវត្តិសាស្ត្រពីសមុទ្រ ទៅកាន់រាជធានីភ្នំពេញ។

បើតាមការបញ្ជាក់របស់លោក ខៀវ រិទ្ធិភ័ណ្ឌ អភិបាលរងខេត្តកំពតបានបន្ថែមទៀតថា នៅតាមបណ្តាក្រុងស្រុក ស្ថាប័នរដ្ឋ និងឯកជន គ្រិះស្ថានអប់រំសិក្សា និងសាសនានានាក្នុងខេត្ត ក៏ធ្វើពិធីអប់អរសាទរ នៅតាមកន្លែងរៀងៗខ្លួនផងដែរ៕

អត្ថបទ៖ សឹង រ៉ាត់