កសិដ្ឋានដាំខ្ញីទំហំ១៣ហិកតា នៅខេត្តពោធិ៍សាត់ រំពឹងប្រមូលផលបានពី៧៥ទៅ១០៥តោនក្នុង១ហិកតា

កសិដ្ឋានដាំខ្ញីពូជចិនទំហំ១៣ហិកតា នៅឃុំអូរសោម ស្រុកវាលវែង ខេត្តពោធិ៍សាត់ រំពឹងថានឹងប្រមូលបានពី៧តោនទៅ១០តោនក្នុង១ហិកតា។ នេះបើតាមម្ចាស់កសិដ្ឋានប្រាប់ក្រុមអ្នកសារព័ត៌មាន។

ម្ចាស់កសិដ្ឋានដាំខ្ញីពូជមកពីចិននេះ គឺ លោក ហ៊ុល សុធា ជាម្ចាស់កសិដ្ឋានដាំខ្ញីមួយកន្លែងលើ តាមលក្ខណៈបច្ចេកទេស ដែលដាំនៅជាប់នឹងមាត់ស្ទឹងអូរសោម ក្នុងឃុំអូរសោម ស្រុកវាលវែង ខេត្តពោធិ៍សាត់។

បើតាមម្ចាស់កសិដ្ឋានខ្ញអូររសោមរូបនេះ បានឱ្យដឹងថា សម្រាប់ពូជខ្ញីនេះ គឺលោកបានដើរស្រាវជ្រាវនៅតាមបណ្តាប្រទេសមួយចំនួន ហើយចុងក្រោយលោកបានរកឃើញពូជខ្ញីនេះពីប្រទេសចិន ដែលសមស្របទៅនឹងស្ថានភាពធាតុអាកាសកម្ពុជា ពិសេសអាកាសធាតុក្នុងភូមិសាស្រ្តឃុំអូរសោម។ ជាដំណាក់កាលដំបូង ម្ចាស់កសិដ្ឋានបានដាំលើផ្ទៃដី១៣ហិកតា សម្រាប់ធ្វើជាពូជ ហើយដំណាក់កាលបន្ទាប់ គ្រោងពង្រីកផ្ទៃដីដល់ទៅ១០០ហិកតា ដើម្បីនាំទៅកាន់ទីផ្សារអាមេរិក។

លោក ហ៊ុល សុធា ឱ្យដឹងថា មូលហេតុដែលលោកជ្រើសរើសទីតាំងអូរសោមធ្វើកសិកម្ម ដោយសារនៅទីនេះ អំណោយផលលើការដាំដុះប្រភេទដំណាំមើមទាំងដី និងអាកាសធាតុ។ 

លោកឱ្យដឹងថា តាមលក្ខណៈបច្ចេកទេស នៅក្នុងដី១ហិកតា គឺត្រូវប្រើពូជខ្ញីប្រមាណ៦តោន និងប្រើប្រាស់កម្លាំងកម្មករចំនួន៥០នាក់ រួមទាំងអ្នកជំនាញផ្នែកកសិកម្មជនជាតិចិនម្នាក់។

តាមម្ចាស់កសិដ្ឋាន ខ្ញីពូជមកពីប្រទេសចិន អាចប្រមូលផលបានចន្លោះនៅអាយុ៦ខែទៅ៨ខែ។

គិតត្រឹមខែសីហា ខ្ញីរបស់លោកមានអាយុ៤ខែ  ខណៈបច្ចុប្បន្នក្នុងពេលខ្ញីមិនទាន់គ្រប់អាយុដកទៅលក់បាន កម្មករបានដកសាកល្បងគឺខ្ញីមួយគុម្ពមានទម្ងន់ចន្លោះពី១គីឡូ ទៅ១គីឡូកន្លះ៕