លោក គួច ចំរើន ទុកពេល១ខែឱ្យក្រុមហ៊ុនដោះស្រាយបញ្ហាផ្គត់ផ្គង់ទឹកស្អាតនៅស្រុកស្អាង និងក្រុងតាខ្មៅ

អភិបាលខេត្តកណ្ដាល ទុកពេល១ខែឱ្យក្រុមហ៊ុនទឹកស្អាតនៅស្រុកស្អាង និងក្រុងតាខ្មៅ ដោះស្រាយបញ្ហាទាក់ទងនឹងការផ្គត់ផ្គង់ទឹកស្អាតជូនប្រជាពលរដ្ឋឱ្យបានល្អ បើមិនដូច្នេះ អាជ្ញាធរខេត្តនឹងចាត់វិធានការច្បាប់ជាធរមាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការព្រមានរបស់លោកអភិបាលខេត្តកណ្ដាល ក្រោយទទួលបានមតិរិះគន់ជាច្រើនពីប្រជាពលរដ្ឋទាក់ទងនឹងការផ្គត់ផ្គង់ទឹកស្អាតមិនមានគុណភាព ស្របតាមស្តង់ដារកំណត់ ដោយទឹកមានសភាពល្អក់ និងប្រើប្រាស់មិនគ្រប់គ្រាន់ ខណៈកន្លងមក អាជ្ញាធរឃុំ ស្រុក ខេត្ត ធ្លាប់បានដោះស្រាយជាច្រើនលើកជាច្រើនសារ ប៉ុន្តែបញ្ហានេះបានអូសបន្លាយរហូតមកដល់បច្ចុប្បន្ន។

តាមរយៈលិខិតចុះថ្ងៃទី២០ ខែសីហា ឆ្នាំ២០២៤នេះ លោក គួច ចំរើន អភិបាលខេត្តកណ្ដាល បានប្រាប់ឱ្យលោកស្រី ចាន់ ណារី ម្ចាស់អាជីវកម្មទឹកស្អាតនៅស្រុកស្អាង និងក្រុងតាខ្មៅ អនុវត្តកាតព្វកិច្ចរបស់ខ្លួនក្នុងការផ្គត់ផ្គង់ទឹកស្អាតជូនប្រជាពលរដ្ឋក្នុងដែនអាជ្ញាបណ្ណរបស់ខ្លួនឱ្យបានល្អប្រសើរ ដោយទុករយៈពេល១ខែ ដើម្បីកែលម្អបញ្ហា និងភាពអសកម្មខាងលើ ប្រសិនបើមិនកែប្រែ រដ្ឋបាលខេត្តនឹងចាត់វិធានការច្បាប់តាមនីតិវិធីជាធរមាន។

លោកអភិបាលខេត្ត គួច ចំរើន បានសង្កត់ធ្ងន់ថា «ពាក្យថា​ ទឹកស្អាត​ គឺត្រូវមានគុណភាពល្អ​ មិនមែនបូមទឹកទន្លេលក់ទេ​»៕