សម្ដេចធិបតី ថា ដោយសារសង្គ្រាម ទើបវត្ថុបុរាណខ្មែរត្រូវបានលួចយកទៅលក់នៅបរទេស

នៅក្នុងពិធីទទួលវត្ថុបុរាណខ្មែរ ដែលបានប្រគល់ជូនកម្ពុជាវិញ នៅព្រឹកថ្ងៃទី២២ ខែសីហា ឆ្នាំ២០២៤នេះ សម្ដេចធិបតី ហ៊ុន ម៉ាណែត បានថ្លែងថា ប្រសិនបើកម្ពុជាមិនមានសង្គ្រាមស៊ីវិលទេ ប្រហែលក៏មិនមានចោរលួចសម្បត្តិវប្បធម៌ជាតិទៅលក់នៅបរទេសបានឡើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តើហេតុអ្វីបានជាវត្ថុបុរាណខ្មែរត្រូវបានយកចេញពីស្រុកខ្មែរ?, សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានលើកឡើងថា «គឺដោយសារយើងបែកបាក់ បើយើងសុខសន្តិភាព ចោរមិនអាចលួចទៅបានទេ»។ សម្តេចធិបតី ថ្លែងថា ព្រោះតែសង្គ្រាមស៊ីវិលផ្ទៃក្នុង ទើបនាំឱ្យវត្ថុបុរាណខ្មែរ ដែលជាសម្បត្តិវប្បធម៌ជាតិ ត្រូវបានគេលួច និងជួញដូរទៅឆ្ងាយពីទឹកដីខ្មែរ។ ក្នុងន័យនេះ សម្ដេចធិបតី ចង់បញ្ជាក់ថា សុខសន្តិភាពពិតជាមានសារៈសំខាន់ណាស់សម្រាប់ប្រជាជាតិខ្មែរ ហើយ១ឆ្នាំ នៃអាណត្តិរាជរដ្ឋាភិបាល នីតិកាលថ្មី គឺរាជរដ្ឋាភិបាលបានថែរក្សាការពារយ៉ាងមុតមាំនូវសុខសន្តិភាព និងស្ថិរភាពសង្គម។

សម្តេចធិបតី បានគូសរំលេចដែរថា សមិទ្ធផលដែលកម្ពុជាទទួលបានពេលនេះ ក៏បានឆ្លុះបញ្ចាំងឱ្យឃើញពីការប្ដេជ្ញាចិត្តខ្ពស់របស់រាជរដ្ឋាភិបាលកម្ពុជា និងពីសារៈសំខាន់នៃកិច្ចសហប្រតិបត្តិការដ៏ល្អរបស់កម្ពុជាជាមួយនឹងបណ្តាប្រទេសនានា និងសហគមន៍អន្តរជាតិ នៅក្នុងយុទ្ធនាការសកល ដើម្បីប្រយុទ្ធប្រឆាំងអំពើចោរកម្ម ការចរាចរ និងការជួញដូរខុសច្បាប់នៃសម្បត្តិវប្បធម៌។

តាក្រសួងវប្បធម៌ និងវិចិត្រសិល្បៈ ដែលជាសេនាធិការររាជរដ្ឋាភិបាល បានបំពេញការងារដោយការយកចិត្តទុកបំផុតក្នុងការស្រាវជ្រាវ ការប្រមូលភ័ស្តុតាង ការសម្របសម្រួល ការចរចា និងកិច្ចសហការជាមួយប្រទេសនានា ក៏ដូចជាភាគីពាក់ព័ន្ធក្នុងការទាមទារ និងបញ្ជូនត្រឡប់មកវិញនូវរតនសម្បត្តិជាតិ ដែលបានបាត់បង់ ដើម្បីទុកជាកេរដំណែលវប្បធម៌ និងអត្តសញ្ញាណជាតិសម្រាប់កូនខ្មែរជំនាន់។ នេះជាថ្លែងរបស់សម្ដេចធិបតី ដដែល។

តាមការបញ្ជាក់របស់សម្ដេចធិបតី កិច្ចការអភិរក្សសម្បត្តិបេតិកភណ្ឌជាតិ គឺជាកិច្ចការអាទិភាពមួយរបស់រាជរដ្ឋាភិបាល ពិសេសនៅក្នុងអាណត្តិទី៧នេះ រាជរដ្ឋាភិបាល នៅតែបន្តយកចិត្តទុកដាក់ក្នុងការអភិរក្សសម្បត្តិបេតិកភណ្ឌជាតិ ហើយបាននិងកំពុងខិតខំទាមទារមកវិញនូវវត្ថុបុរាណខ្មែរដែលបាត់បង់ទៅបរទេស និងខិតខំចុះបញ្ជីសម្បត្តិបេតិកភណ្ឌជាតិទៅក្នុងបញ្ជីសម្បត្តិបេតិកភណ្ឌពិភពលោក ជាដើម។

សម្ដេច ចាត់ទុកថា វត្ថុបុរាណដែលទទួលបានមកវិញនាពេលនេះ ជាមរតកវប្បធម៌ជាតិ ដែលមានតម្លៃ មិនអាចកាត់ថ្លៃបានសម្រាប់ប្រជាជនកម្ពុជា ដែលជាម្ចាស់ដើមដ៏ពិតប្រាកដនៃសម្បត្តិវប្បធម៌ទាំងនេះ។ លើសពីនេះ ក៏ជានិមិត្តរូបនៃការ ជួបជុំគ្នាឡើងវិញនូវព្រលឹងបុព្វបុរសខ្មែរ ដែលតែងតែនៅស្ថិតជាប់ជាមួយប្រជាជាតិ និងប្រជាជនកម្ពុជា គ្រប់ពេលវេលា ហើយជាការព្យាបាលស្នាមរបួសរបស់ប្រជាជនកម្ពុជា ដែលបានរងគ្រោះដោយសារសង្គ្រាមស៊ីវិលរាប់ទសវត្ស និងសោកនាដកម្មប្រល័យពូជសាសន៍ កន្លងទៅ៕

អត្ថបទ៖ ធឿន វ៉ាន់សុង