អគ្គនាយកពន្ធនាគារ ណែនាំឱ្យពន្ធនាគារនៅតំបន់ប្រឈមទឹកជំនន់ ត្រូវប្រុងជើងការខ្ពស់

អគ្គនាយក នៃអគ្គនាយកដ្ឋានពន្ធនាគារ លោកឧត្តមអគ្គានុរក្សថ្នាក់លេខ១  ឈន សាណាត បានណែនាំឱ្យពន្ធនាគារនៅតំបន់ប្រឈមទឹកជំនន់ ត្រូវប្រុងជើងការខ្ពស់ ដើម្បីទប់ស្កាត់បញ្ហា និងបង្កាការពារ។ លោកណែនាំបែបនេះ​ ដឹកនាំកិច្ចប្រជុំត្រួតពិនិត្យលទ្ធផលការងារខែសីហា និងលើកទិសដៅការងារសម្រាប់ខែកញ្ញា ឆ្នាំ២០២៤ ដែលមានការអញ្ជើញចូលរួមដោយ អគ្គនាយករង ប្រធាននាយកដ្ឋានទាំង៥ ប្រធានមណ្ឌលអប់រំកែប្រែ និងប្រធានពន្ធនាគាររាជធានីខេត្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងកិច្ចប្រជុំនាព្រឹកថ្ងៃទី២៨ ខែសីហា ឆ្នាំ២០២៤ លោក ឈន សាណាត ណែនាំដូច្នេះ៖«ពន្ធនាគារនៅតំបន់ដែលមានបញ្ហាប្រឈមទៅនឹងទឹកជំនន់ ត្រូវត្រៀមលក្ខណៈឲ្យបានខ្ពស់ក្នុងការទប់ស្កាត់ និងបង្កាការពារទុកជាមុន»។

ជាមួយគ្នានេះ លោក ឈន សាណាត ក៏បានផ្តល់អនុសាសន៍ដឹកនាំជាដំណោះស្រាយដល់នាយកដ្ឋានជំនាញ និងប្រធានពន្ធនាគាររាជធានី-ខេត្ត ដូចជាកងកម្លាំងទាំងអស់ត្រូវធ្វើការហ្វឹកហាត់ជាប្រចាំក្នុងការការពារសន្តិសុខសុវត្ថិភាពពន្ធនាគារ។

លោកអគ្គនាយក នៃអគ្គនាយកដ្ឋានពន្ធនាគារ ក៏បានណែនាំឱ្យមន្ត្រីក្រោមឱវាទត្រូវយកចិត្តទុកដាក់ឲ្យបានខ្ពស់ចំពោះជនជាប់ឃុំណាដែលមានជំងឺឈឺធ្ងន់ធ្ងរប្រសិនបើមានបញ្ហាអ្វីធ្ងន់ធ្ងរត្រូវបញ្ជូនទៅមន្ទីរពេទ្យភ្លាមៗ និងការងាររដ្ឋបាល ឯកសារត្រូវធ្វើឲ្យលឿនទាន់ពេលវេលាកុំឱ្យមានការរាំងស្ទះនៅឯកសារណាមួយ

ចំពោះមន្ត្រីដែលបានទៅសិក្សារៀនសូត្រអំពីការវិបស្សនារួចនោះ ត្រូវយកចំនេះវិជ្ជា និងជំនាញទាំងអស់ដែលបានរៀនយកមកធ្វើការអប់រំដល់ជនជាប់ឃុំ។ នេះជាការណែនាំបន្ថែមរបស់លោក ឈន សាណាត៕

ដោយ៖ ង៉ិល ណារ៉ាត់