នាវាទ័ពជើងទឹកអូស្ត្រាលីចាកចេញពីដែនទឹកកម្ពុជាវិញហើយ ​ក្រោយពីចូលសំចត៣ថ្ងៃ ដើម្បីបំពេញទស្សនកិច្ច

នាវាកងទ័ពជើងទឹករបស់អូស្ត្រាលី HMAS PERTH – FFH 157 (Anzac Class FFH) ១គ្រឿងបណ្ដោយប្រវែង១១៨ម៉ែត្រ ទទឹងប្រវែង១៤,៨ម៉ែត្រ ជម្រៅទឹក៦,៤ម៉ែត្រ នៅព្រឹកថ្ងៃពុធ ទី០៤ ខែកញ្ញា ឆ្នាំ ចាកចេញពីដែនទឹកនៃកម្ពុជាវិញហើយ ក្រោយពីបានចូលចតរយៈពេល៣ថ្ងៃនៅកំពង់ផែស្វយ័តអន្តរជាតិក្រុងព្រះសីហនុ ក្នុងគោលបំណងទស្សនកិច្ច បង្កើនចំណងមិត្តភាព សាមគ្គីភាព កិច្ចសហប្រតិបត្តិការ រវាងរាជរដ្ឋាភិបាល ប្រជាជន និងកងទ័ពនៃប្រទេសទាំងពីរ។

នាវា HMAS PERTH – FFH 157 (Anzac Class FFH) នេះ បានចូលចតនៅក្នុងដែនទឹករបស់កម្ពុជា កាលពីថ្ងៃទី០២ ខែកញ្ញា ឆ្នាំ២០២៤។ បីថ្ងៃ នៅក្នុងដំណើរទស្សនកិច្ច និងស្នាក់នៅកម្ពុជា ប្រតិភូទ័ពជើងទឹកអូស្ត្រាលី បានចូលជួបជាមួយអភិបាលរងខេត្តព្រះសីហនុ មេបញ្ជាការមូលដ្ឋានសមុទ្ររាម ថ្នាក់ដឹកនាំក្រសួងការពារជាតិ និងធ្វើទស្សនកិច្ចនៅរាជសារមន្ទីរជាតិទួលស្លែង ព្រះបរមរាជវាំង និងតំបន់កម្សាន្តមួយចំនួនក្នុងខេត្តព្រះសីហនុ។ ជាមួយគ្នានេះ ប្រតិភូទ័ពជើងទឹកប្រទេសទាំងពីរ បាបនប្រកួតកីឡាបាល់ទះលើខ្សាច់ ក្នុងបំណងបង្កើនមិត្តភាព សាមគ្កីភាពបន្ថែមទៀត។

គួរឱ្យដឹងថា នាវានេះអាចផ្ទុកទម្ងន់បាន៣,៩០០តោន ផ្ទុកឧទ្ធម្ភាគចក្រចំនួន០១គ្រឿង ម៉ាក MH60-Rabbit Seahawk។ នៅលើនាវានេះមាននាវិកសរុបចំនួន ១៩០នាក់ (នាយនាវី ៣២នាក់ និងនាវិក ១៥៨នាក់)។

កាលពីថ្ងៃទី០៣ ខែកញ្ញា ស្ថានទូតអូស្ត្រាលីប្រចាំកម្ពុជា តាមរយៈទំព័រហ្វេសប៊ុក ឱ្យដឹងថា វត្តមាននាវា និងនាវិកកងទ័ពជើងទឹករបស់អូស្ត្រាលី  មកកាន់កម្ពុជា គឺជាផ្នែកមួយនៃប្រតិបតិ្តការកិច្ចខិតខំប្រឹងប្រែងតំបន់ឥណ្ឌូប៉ាស៊ីហ្វិក (Indo-Pacific Endeavour) អូស្ត្រាលី ប្តេជ្ញាចិត្តយូរអង្វែងណាស់មកហើយ ក្នុងការធ្វើការជាមួយបណ្តាដៃគូរបស់យើងនៅទូទាំងតំបន់អាស៊ីអាគ្នេយ៍ និងតំបន់ផ្សេងៗទៀត។

ស្ថានទូតអូស្ត្រាលី សរសេរលើទំព័រហ្វេសប៊ុក ដូច្នេះ ៖«នាវា និងនាវិកកងទ័ពជើងទឹកនេះ មកកាន់ទីនេះគឺជាផ្នែកមួយនៃប្រតិបតិ្តការកិច្ចខិតខំប្រឹងប្រែងតំបន់ឥណ្ឌូប៉ាស៊ីហ្វិក (Indo-Pacific Endeavour) ដែលជាការប្តេជ្ញាចិត្តយូរអង្វែងណាស់មកហើយរបស់យើង ក្នុងការធ្វើការជាមួយបណ្តាដៃគូរបស់យើងនៅទូទាំងតំបន់អាស៊ីអាគ្នេយ៍ និងតំបន់ផ្សេងៗទៀត។យើងចង់ធានាអោយបានថាតំបន់របស់យើងមានតុល្យភាព ដែលប្រទេសតូច និងមធ្យមមិនត្រូវបានគ្របដណ្តប់ដោយប្រទេសអំណាចធំៗនោះទេ ហើយជាកន្លែងដែលយើងទាំងអស់គ្នាអាចសម្រេចជោគវាសនារបស់យើងបានដោយខ្លួនឯង»៕