ព្រះវិហារ មិនត្រឹមជាដែនដីវប្បធម៌-ប្រវត្តិសាស្ត្រ តែពោរពេញដោយសក្តានុពលទេសចរណ៍ធម្មជាតិ

ព្រះវិហារ ជាខេត្តទេសចរណ៍លើទឹកដីប្រវត្តិសាស្ត្រ ផ្សារភ្ជាប់នឹងធម្មជាតិមួយផ្សេងទៀតរបស់កម្ពុជា ដែលមានសំណង់ប្រាសាទបុរាណដ៏វិសេសថ្លៃថ្លា និងរមណីយដ្ឋានធម្មជាតិជាច្រើនកន្លែង ដែលអាចទាក់ទាញទេសចរជាតិ-អន្តរជាតិ ទៅទស្សនាមិនជិនណាយ ពិសេសប្រាសាទព្រះវិហារ និង ប្រាសាទកោះកេរ្តិ៍ ដែលបានជាប់ឈ្មោះក្នុងបញ្ជីបេតិកភណ្ឌពិភពលោក និងដោយឡែកផ្សេងទៀត គឺតំបន់សក្តានុពលទេសចរណ៍ភ្នំត្បែង។

បើនិយាយពីប្រជាប្រិយភាពប្រាង្គដ៏ចំណាស់ អាយុជាងមួយពាន់ឆ្នាំលើកំពូលភ្នំដងរែក «ប្រាសាទព្រះវិហារ» គឺនៅតែឈរខ្ពស់យ៉ាងរឹងមាំ បង្អួតសម្រស់ដល់ទេសចរជាតិ-អន្តរជាតិ មិនជិនណាយពីទិដ្ឋភាពនៃសម្រស់ឋានសួគ៌លោកិយ ដ៏ស្អាតពេកក្រៃ។ តួយ៉ាង សូម្បីតែប្រទេសក្បែរខាងកម្ពុជា ក៏នៅតែប្រាថ្នាការបើកច្រកទ្វារតំបន់ប្រាសាទព្រះវិហារឡើងវិញ ដើម្បីជាប្រយោជន៍ដល់វិស័យទេសចរណ៍ផងដែរ។

ក្រៅពីប្រាសាទបុរាណ ស្រុកទេសចរណ៍មួយនេះ ក៏មានសារមន្ទីរមួយផ្សេងទៀត ដែលទេសចរជាតិ និងអន្តរជាតិ អាចទៅទស្សនា និងស្វែងយល់ពីប្រវត្តិសាស្ត្រខ្មែរបាន នោះគឺ សារមន្ទីរធម្មជាតិសកល សម្តេចតេជោហ៊ុន សែន ព្រះវិហារ ។ សារមន្ទីរនេះ មានទីតាំងស្ថិតនៅក្នុងភូមិធម្មជាតិ ឃុំស្រអែម ស្រុកជាំក្សាន្ត ខេត្តព្រះវិហារ បើកទទួលភ្ញៀវចាប់ពីម៉ោង ៧:៣០ នាទីព្រឹក រហូតដល់ម៉ោង ៤:៣០នាទីល្ងាច។ ចំណែកឯតម្លៃសំបុត្រចូលទស្សនា គឺចំណាយត្រឹមតែ ២ពាន់រៀល ប៉ុណ្ណោះសម្រាប់ភ្ញៀវជាតិ និងតម្លៃ ៣ ដុល្លារ សម្រាប់ភ្ញៀវបរទេស។

រមណីយដ្ឋានទេសចរណ៍ធម្មជាតិ និងកែច្នៃ
ស្ថិត​នៅ​ក្នុង​ភូមិ​តេជោ​បុស្សស្បូវ ឃុំ​ស្រអែម ស្រុក​ជាំក្សាន្ត ខេត្ត​ព្រះវិហារ មានទឹកធ្លាក់មួយកន្លែងឈ្មោះ ទឹកធ្លាក់តេជោបុស្សស្បូវ ចម្ងាយ​ប្រមាណ ១៦ គីឡូម៉ែត្រ​ពីផ្លូវជាតិ​នៅត្រង់​ចំណុច​កណ្តាល​នៃផ្លូវ​បំបែក​ឆ្ពោះ​ទៅ​តំបន់​ប្រាសាទ​ព្រះវិហារ និង​ទៅកាន់​ទីប្រជុំជន​ស្រុក​ជាំក្សាន្ត​នៃ​ខេត្ត​ព្រះវិហារ។

ចុចអានលម្អិត៖ រមណីយដ្ឋានធម្មជាតិលើខ្នងភ្នំត្បែង ៥កន្លែងទៀត

តំបន់ទឹកធ្លាក់ ៥ លើខ្នងភ្នំត្បែង ក្លាយជាគោលដៅទេសចរណ៍ទាក់ទាញបំផុត របស់ខេត្តព្រះវិហារ

១. រមណីយដ្ឋានរក្សា
ជាកន្លែងកម្សាន្តចុងសប្តាហ៍បែបធម្មជាតិ ដែលមានកញ្ចុះអង្គុយលេងក្បែរមាត់ទឹក ស្ថិតលើទឹកដីនៃភូមិក្រវ៉ាន់ ឃុំពុទ្រា ស្រុកជ័យសែន ខេត្តព្រះវិហារ។ សម្រាប់ដំណើរមកកាន់ទីនេះ អ្នកទេសចរ ក៏អាចយកម្ហូបអាហារមកទទួលទានតាមកញ្ចុះនៅទីនេះផងដែរ។

២. រមណីយដ្ឋានទំនប់៩៥
ជារមណីយដ្ឋានមួយ ដែលនៅកៀកនឹងទីប្រជុំជនក្រុងព្រះវិហារ ចម្ងាយប្រមាណជាង ៤គីឡូម៉ែត្រ ស្ថិតនៅភូមិទំនប់៩៥ សង្កាត់ប៉ាលហាល ក្រុងព្រះវិហារ ខេត្តព្រះវិហារ។ នៅទីនេះ​ ទេសចរអាចគយគន់សម្រស់ភ្នំត្បែងបាន។