CENAT៖ អត្រាស្លាប់ដោយសារជំងឺរបេងនៅកម្ពុជាធ្លាក់ចុះ ៤៥% នៅឆ្នាំ២០២២

កម្ពុជាជាប្រទេសមួយ ក្នុងចំណោមប្រទេស៣០ ដែលមានបន្ទុកជំងឺរបេងច្រើននៅក្នុងពិភពលោក នៅចន្លោះឆ្នាំ២០១៦-២០២០។ ប៉ុន្តែសម្រាប់ឆ្នាំ២០២១-២០២៥ ប្រទេសកម្ពុជាពុំស្ថិតនៅក្នុងប្រទេសចំនួន៣០ ដែលមានបន្ទុកជំងឺរបេងធ្ងន់ធ្ងរទៀតនោះទេ ពោលគឺអត្រាស្លាប់ដោយសារជំងឺរបេងនៅកម្ពុជាបានធ្លាក់ចុះ៤៥% នៅឆ្នាំ២០២២។

លោកវេជ្ជបណ្ឌិត នូ ចាន់លី ប្រធានបច្ចេកទេស នៃមជ្ឈមណ្ឌលជាតិកំចាត់រោគរបេង និងហង់សិន (CENAT) បានបញ្ជាក់ថា អត្រាស្លាប់ដោយសារជំងឺរបេងនៅកម្ពុជាបានធ្លាក់ចុះពី ៤២ករណី ក្នុងចំណោមប្រជាជន ១០ម៉ឺននាក់ ក្នុងឆ្នាំ២០០០ មកត្រឹម ២៣ករណី ក្នុងចំណោមប្រជាជន ១០ម៉ឺននាក់ នៅឆ្នាំ២០២២ ដែលស្មើនឹងការធ្លាក់ចុះ៤៥%។ រីឯអត្រាអាំងស៊ីដង់ ក៏បានធ្លាក់ចុះពី ៥៧៩ករណី ក្នុងចំណោមប្រជាជន ១០ម៉ឺននាក់ នៅឆ្នាំ២០០០ មកត្រឹម ៣២០ករណី ក្នុងចំណោមប្រជាជន ១០ម៉ឺននាក់ នៅឆ្នាំ២០២២ ដែលស្មើនឹងការធ្លាក់ចុះ៤៥% ផងដែរ។ លោកបានឱ្យដឹងបែបនេះ ​ក្នុងវេទិកាពិភាក្សាតុមូលស្តីពី លើកកម្ពស់ការយល់ដឹងអំពីជំងឺរបេង និងជំរុញការចូលរួមរបស់អ្នកសារព័ត៌មាននៅកម្ពុជា នាព្រឹកថ្ងៃទី១៦ ខែកញ្ញា ឆ្នាំ២០២៤។

បើតាមលោកវេជ្ជបណ្ឌិត របេង គឺជាជំងឺឆ្លង មិនមែនជាជំងឺតពូជនោះទេ។ ជំងឺនេះបង្កឡើងដោយមេរោគរបេង ឬបេកា (BK = Bacille de koch) ឬ (MTB = Mycobacterium Tuberculosis)។ លក្ខណៈរបស់វា គឺការកើតដំបៅនៅក្នុងជាលិកា ដែលជាពិសេសនៅក្នុងសួត។ រីឯការចម្លងរោគរបេង គឺពីអ្នកជំងឺរបេងសួត ទៅអ្នកជិតខាង តាមខ្យល់ នៅពេលអ្នកជំងឺនោះក្អក កណ្តាស និយាយ ឬសើច/ច្រៀង បង្កើតបានជាតំណក់តូចៗ ដែលមានផ្ទុកមេរោគរបេង (Nuclei Droplet) អាចស្ថិតនៅក្នុងខ្យល់បានយូរ ហើយចូលទៅក្នុងសួតមនុស្សដែលនៅជិតអ្នកជំងឺតាមរយៈការដកដង្ហើមស្រូបយកខ្យល់ដែលមានមេរោគរបេងនោះ។

ប្រធានបច្ចេកទេសរូបនេះ បានបង្ហើបឱ្យដឹងថា ផែនការយុទ្ធសាស្ត្រជាតិកម្ពុជា ដើម្បីបញ្ចប់ជំងឺរបេង២០២១-២០៣០ នឹងរួមចំណែកដល់គោលដៅអភិវឌ្ឍជាតិប្រជាជនដែលមានសុខភាពល្អ និងផលិតភាពសេដ្ឋកិច្ច ដើម្បីធ្វើឱ្យវាក្លាយជាប្រទេសដែលមានចំណូលមធ្យមកម្រិតខ្ពស់នៅ្នឈ២០៣០។ ដើម្បីកាត់បន្ថយ អត្រាកើតជំងឺរបេង តាមការប៉ានប្រមាណ ឱ្យបាន៨០% និងកាត់បន្ថយអត្រាមរណៈ៩០% នៅឆ្នាំ២០២៣០ ធៀបទៅនឹងឆ្នាំ២០១៥។

លោកថា អត្រាព្យាបាលជោគជ័យនៃជំងឺរបេងរក្សាបានខ្ពស់ជាង៩០% ក្នុងរយៈពេល ២៤ឆ្នាំ ជាប់ៗគ្នា។ ជាក់ស្តែងក្នុងឆ្នាំ២០២៣ កម្មវិធីគាំពារជាតិកម្ចាត់រោគរបេងសម្រចបានអត្រាព្យាបាលជោគជ័យ៩៦% ដែលលើសពីគោលដៅចំណុចប្រចាំឆ្នាំ ដែលកំណត់ត្រឹមតែ៩០%។

គួរជម្រាបដែរថា ឆ្នាំ២០២២ នៅទូទាំងសកលលោក មានអ្នកជំងឺរបេងថ្មីកើតមានប្រមាណ ១០លាន ៦សែននាក់ ប៉ុន្តែបានស្រាវជ្រាវរកឃើញ និងរាយការណ៍ទៅអង្គការសុខភាពពិភពលោកមានតែ ៧លាន ៥សែនករណីទេ។ ឆ្នាំ២០២២ នេះដដែល អ្នកស្លាប់ដោយសារជំងឺរបេងមានចំនួន ១លាន ៣សែននាក់៕

អត្ថបទ៖ គេន ម៉ាលិះ