ខេត្តចំនួន៣ត្រូវផ្អាកដំណើរការសិក្សាជាបណ្ដោះអាសន្នដោយសារផ្ទុះជំងឺកូវីដ១៩

ក្រសួងការងារ និងបណ្ដុះបណ្ដាលវិជ្ជាជីវៈបានសម្រេចផ្អាកដំណើរការសិក្សានៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈជាបណ្ដោះអាសន្ននៅខេត្តព្រៃវែង ខេត្តកំពង់ចាម និងខេត្តកោះកុងជាបណ្តោះអាសន្តសិន ដោយសារខេត្តទាំងនោះមានផ្ទុះជំងឺកូវីដ១៩។

យោងតាមសេចក្តីជូនដំណឹងស្ដីពីការផ្អាកដំណើរការសិក្សានៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈនៅខេត្តទាំង៣ ចុះថ្ងៃទី៩ ខែមីនា ឆ្នាំ២០២១

ក្រសួងការងារ និងបណ្ដុះបណ្ដាលវិជ្ជាជីវៈសូមជម្រាបជូននាយក នាយិកា បុគ្គលិក មន្ត្រីរាជការ គ្រូ សាស្ត្រាចារ្យ សិស្សនិស្សិត សិក្ខាកាមនៃគ្រឹះស្ថានអប់រំបណ្តុះបណ្តាលបច្ចេកទេស និងវិជ្ជាជីវៈទាំងអស់បានជ្រាបថា ដើម្បីចូលរួមចំណែកទប់ស្កាត់ការរីករាលដាលនៃជំងឺកូវីដ១៩នៅតាមគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈជាពិសេសក្នុងអំឡុងពេលព្រឹត្តិការណ៍សហគមន៍២០កុម្ភៈ

ក្រសួងសម្រេចផ្អាកដំណើរការសិក្សាទាំងអស់ជាបណ្ដោះអាសន្ននៅខេត្តព្រៃវែង កំពង់ចាម និងខេត្តកោះកុង ដោយគិតចាប់ពីថ្ងៃជូនដំណឹងនេះតទៅរហូតដល់មានការជូនដំណឹងជាថ្មី។ គ្រប់គ្រឹះស្ថានទាំងអស់អាចបន្តដំណើរការសិក្សារៀងៗខ្លួនតាមប្រព័ន្ធបណ្តុះបណ្តាលពីចម្ងាយ ឬតាមអនឡាញបាន៕

អត្ថបទ៖ សំអឿន