នាយឧត្តមសេនីយ៍ ស ថេត រម្លឹកអ្នកដឹកជញ្ជូនទំនិញ និងអាហារ កុំទទួលរបស់បញ្ញើខុសច្បាប់

អគ្គស្នងការនគរបាលជាតិ នាយឧត្តមសេនីយ៍ ស ថេត រម្លឹកអ្នកបើកបរសេវាដឹកជញ្ជូនទំនិញ និងអាហារកុំទទួលរបស់បញ្ញើដែលខុសច្បាប់ ដូចជាគ្រឿងញៀន និងអាវុធជាតិផ្ទុះជាដើម ដើម្បីកុំឱ្យមានការជាប់ពាក់ព័ន្ធទៅនឹងបទល្មើសទាំងអស់នេះ។

លោកនាយឧត្តមសេនីយ៍ ស ថេត បានក្រើនរំលឹកទៅដល់ក្រុមហ៊ុនដឹកជញ្ជូន និងអ្នកដឹកជញ្ជូនទាំងអស់ ត្រូវត្រួតពិនិត្យ និងសាកសួរប្រភពទំនិញទាំងឡាយណាដែលមានការសង្ស័យឱ្យបានច្បាស់លាស់ ចៀសវាងទៅនឹងការដឹកជញ្ជូនទំនិញខុសច្បាប់ ដូចជា គ្រឿងញៀន អាវុធជាតិផ្ទុះ និងរបស់បញ្ញើផ្សេងៗដែលខុសច្បាប់។ លោកថា ការដឹកជញ្ជូនរបស់បញ្ជើដែលខុសច្បាប់ វាអាចនាំឱ្យអ្នកដឹកជញ្ជូនមានការជាប់ពាក់ព័ន្ធទៅនឹងបទល្មើសនោះដែរ។

ទន្ទឹមនេះ នាយឧត្តមសេនីយ៍ អគ្គស្នងការ ក៏បានជំរុញ និងលើកទឹកចិត្តទៅដល់ក្រុមហ៊ុន និងអ្នកដឹកជញ្ជូនទាំងអស់ ត្រូវរាយការណ៍មកខាងសមត្ថកិច្ច ក្នុងករណីសង្ស័យថាមានការដាក់បញ្ញើខុសច្បាប់ ដើម្បីឱ្យសមត្ថកិច្ចស្រាវជ្រាវ និងស្វែងរកមុខសញ្ញាមកផ្ដន្ទាទោសទៅតាមផ្លូវច្បាប់។

ការលើកឡើងខាងលើរបស់លោកនាយឧត្តមសេនីយ៍ ស ថេត អគ្គស្នងការនគរបាលជាតិ បានធ្វើឡើងនៅក្នុងពិធីសំណេះសំណាលជាមួយអ្នកបើកបរផ្តល់សេវាដឹកជញ្ជូនទំនិញ និងអាហារ នាព្រឹកថ្ងៃទី១៨ ខែកញ្ញា ឆ្នាំ២០២៤នេះ នៅទីស្តីការក្រសួងមហាផ្ទៃ៕