មន្ត្រីអ្នកនាំពាក្យច្រានចោលព័ត៌មានមិនពិត ដែលថា តម្លៃស្រូវធ្លាក់ចុះធ្វើឱ្យកសិករខាត

លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និង​នេសាទ បានអះអាងបញ្ជាក់ជាថ្មីនៅថ្ងៃទី ៣០ ខែកញ្ញា ឆ្នាំ ២០២៤ នេះថា តម្លៃស្រូវនៅឆ្នាំនេះ ស្ថិតក្នុងកម្រិតធម្មតា និងអាចផ្តល់​ប្រាក់​ចំណេញដល់កសិករ មិនទាន់ធ្លាក់រហូតធ្វើឱ្យប្រជាកសិករខាត ដូចការលើកឡើង​មួយចំនួន​ឡើយ​​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការអះអាងបញ្ជាក់បែបនេះ បានធ្វើឡើងបន្ទាប់ពីមានការផ្សព្វផ្សាយព័ត៌មានមិនពិតមួយចំនួន លើកឡើងថា តម្លៃស្រូវមានការធ្លាក់ចុះ ធ្វើឱ្យកសិករព្រួយបារម្ភ។

លោក ឃឹម ហ្វីណង់ បានអំពាវនាវឱ្យប្រជាកសិករមិនត្រូវភ័យខ្លាចពីព័ត៌មានទាំងចាស់ និងថ្មី ដែល​ត្រូវបានយកមកផ្សព្វផ្សាយ ដើម្បីបំពុល បំភ័ន្ត និងបំភ្លៃចំពោះបញ្ហាស្រូវធ្លាក់ថ្លៃ។

លោក ម៉ាប់ កសិករនៅស្រុក ស្រុកសង្កែ ខេត្តបាត់ដំបងបានឲ្យដឹងថា តម្លៃស្រូវ​ឆ្នាំនេះ ប្រហាក់ប្រហែលគ្នានិងឆ្នាំមុន ក្នុងរង្វង់ ១០០០ រៀល ក្នុងមួយគីឡូក្រាម។

បើតាមការអះអាងពីម្ចាស់ រោងម៉ាស៊ីនកែច្នៃស្រូវអង្ករក្រុមហ៊ុនបៃតងភីអិលស៊ី​ សង្កាត់​អូរចារ​ ក្រុងបាត់ដំបង​ បានឲ្យដឹងដែរថា តម្លៃស្រូវទិញ​នៅស្រែ ស្រូវប្រភេទOM 5451លេខ១​ តម្លៃ ១០០០៛/គីឡូក្រាម លេខ២​ ចន្លោះពី ៩៥០-៩៧០៛/ គីឡូក្រាម, ស្រូវស្រង៉ែ លេខ​១ តម្លៃ​១០៦០៛/គីឡូក្រាម លេខ​២ តម្លៃ១០១០៛/គីឡូក្រាម, ស្រូវសែន​ក្រអូប​ លេខ​១​ តម្លៃ១៣៧០៛/គីឡូក្រាម, លេខ​២​ តម្លៃ១៣៤០៛/គីឡូក្រាម។

តម្លៃស្រូវទិញ​នៅរោងម៉ាស៊ីនផ្ទាល់ ស្រូវ OM 5451 លេខ​១​ តម្លៃ១០៤៧៛/ គីឡូក្រាម ,លេខ​២​តម្លៃ១០៤៥៛/គីឡូក្រាម, ស្រូវស្រង៉ែ លេខ​១​ តម្លៃ១១០៩៛/គីឡូក្រាម លេខ​២​ តម្លៃ​១០៩៦៛/គីឡូក្រាម, សែន​ក្រអូប​ លេខ​១​ តម្លៃ១៤៤០៛/គីឡូក្រាម លេខ​២​ តម្លៃចន្លោះពី ១៤០០-១៤២០៛/គីឡូក្រាម។

យោងតាមសហព័ន្ធស្រូវអង្ករកម្ពុជា នៅក្នុងរយៈពេល ៨ ខែ ឆ្នាំ ២០២៤ កម្ពុជា រកចំណូលបានពីការនាំចេញអង្ករ និងស្រូវ ប្រមាណ ១,២២ ពាន់លានដុល្លារអាមេរិក លក់ទៅទីផ្សារសហភាពអឺរ៉ុប និងស្រូវលក់ទៅប្រទេសវៀតណាម៕

ទស្សនាវីដេអូខាងក្រោម៖

អត្ថបទ៖ ឡេង ដេត