ក្រសួងអប់រំ៖ ការប្រឡងបាក់ឌុបឆ្នាំ២០២៥ នឹងធ្វើឡើងអំឡុងខែសីហាឡើងវិញ

ក្រសួងអប់រំ យុវជន និងកីឡា បានសរសេរលើទំព័រហ្វេសប៊ុកផ្លូវការថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅឆ្នាំ២០២៥ នឹងត្រូវធ្វើឡើងនៅអំឡុងខែសីហាវិញ។

គួរឱ្យដឹងថា លោកឧបនាយករដ្ឋមន្ត្រី ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា បានប្រាប់ក្រុមអ្នកសារព័ត៌មានម្ដងរួចមកហើយថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប នៅឆ្នាំខាងមុខ នឹងត្រូវធ្វើឡើងនៅខែសីហាវិញ។ លោកបានថ្លែងបែបនេះ មុនពេលបើកប្រធានវិញ្ញាសា នៅវិទ្យាល័យព្រះស៊ីសុវត្ថិ នាព្រឹកថ្ងៃទី០៨ ខែតុលា ឆ្នាំ២០២៤។

លោករដ្ឋមន្ត្រី ពន្យល់ថា មូលហេតុដែលរៀបចំការប្រឡងបាក់ឌុបនៅខែតុលា ក្នុងពេលនេះ ព្រោះចង់បង្ខិតការប្រឡងនេះឱ្យដូចពេលមុន ដែលធ្វើឡើងនៅខែសីហា មុនពេលកូវីដ-១៩ ដោយសារបញ្ហាកូវីដ ការប្រឡងត្រូវបានរុញរហូតមកដល់ខែមករា ឬខែធ្នូ។ ដូច្នេះ លោកចង់បង្ខិតឱ្យមកដល់ខែសីហា ដើម្បីឱ្យអ្នកដែលប្រឡងចប់ហើយមានឱកាស ដាក់ពាក្យទៅរៀននៅបរទេស ឬក៏ទទួលអាហារូបករណ៍នៅបរទេស។ លោកថា នៅបរទេសបវេស្សនកាល គឺចាប់ផ្តើមនៅខែកញ្ញា ហេតុដូច្នេះទើបឆ្នាំនេះ ការប្រឡងបាក់ឌុបរុញមកខែតុលា ហើយនៅឆ្នាំខាងមុខ នឹងរុញទៅខែសីហាវិញ ដែលនឹងមិនមានបញ្ហាប្រឈបមជាមួយនឹងការលិចទឹកនោះទេ។

លោកឧបនាយករដ្ឋមន្ត្រី បានឱ្យដឹងទៀតថា នាពេលបច្ចុប្បន្ននេះ ដោយសារមានភ្លៀងធ្លាក់ធ្វើឱ្យមណ្ឌលប្រឡងមួយចំនួនមានការជន់លិច ប៉ុន្តែក្រសួងបានត្រៀមក្នុងការដោះដូរមណ្ឌលប្រឡងផងដែរ ដោយមណ្ឌលខ្លះ ដូចជា មណ្ឌលកំពង់ចាម និងសៀមរាប​ គឺអាចធ្វើការដោះដូរមណ្ឌលបាន ចំណែកមណ្ឌលមួយចំនួននៅរាជធានីភ្នំពេញ ដែលបានរងការជន់លិច អាជ្ញាធរក៏បានធ្វើការដោះស្រាយរួចហើយដែរ ដើម្បីធានាដល់មណ្ឌលប្រឡងទាំងនោះអាចដំណើរការប្រឡងបានជាធម្មតា៕