ខេត្តតាកែវ ប្រកាសលើកពេលរៀបចំពិធីបុណ្យអុំទូក

រដ្ឋបាលខេត្តតាកែវ បានប្រកាសលើកពេលនៃការរៀបចំពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ​ បន្ទាប់ពីគ្រោងរៀបចំពិធិបុណ្យជាតិនេះនៅថ្ងៃទី២ និងទី៣ ខែវិច្ឆិកា។ ការប្រកាសលើកពេលនៃការរៀបចំពិធីបុណ្យអុំទូកនេះ គឺយោងតាមតម្រូវការចាំបាច់។

តាមរយៈសេចកក្ដីជូនដំណឹងរបស់រដ្ឋបាលខេត្ត កាលពីថ្ងៃទី១៤ ខែតុលា បានឲ្យដឹងថា រដ្ឋបាលខេត្តនឹងលើកពេលថ្ងៃរៀបចំពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ មកប្រារព្ធធ្វើឡើងនៅថ្ងៃសុក្រ និងថ្ងៃសៅរ៍ ទី០១-០២ ខែវិច្ឆិកា ឆ្នាំ២០២៤ វិញ នៅទីតាំងដដែលវិញ។

សូមជម្រាបថា កាលពីថ្ងៃទី៣០ ខែកញ្ញា ឆ្នាំ២០២៤កន្លងទៅ រដ្ឋបាលខេត្តតាកែវបានប្រកាសគ្រោងរៀបចំពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ នៅថ្ងៃសៅរ៍ និងថ្ងៃអាទិត្យ ទី០២ និងទី០៣ ខែវិច្ឆិកា​ ឆ្នាំ២០២៤ នៅទីតាំងបឹងតាកែវ ស្ថិតក្នុងសង្កាត់រកាក្នុង ក្រុងដូនកែវ ខេត្តតាកែវ។

សូបញ្ជាក់បន្ថែមថា ក្នុងការរៀបចំពិធីបុណ្យអុំទូក បណ្ដែតប្រទីប និងអកអំបុក សំពះព្រះខែ ឆ្នាំនេះ សម្រាប់ខេត្តតាកែវ មានទូកចូលរួមប្រកួតចំនួន៤៧ទូក មកពីបណ្ដាមន្ទីរ អង្គភាពជុំវិញខេត្ត និងតម្រូវឲ្យទូកនីមួយៗមានចំណុះកីឡាករ ១០នាក់ កីឡាករបម្រុង២នាក់ ប្រតិភូ១នាក់ និងគ្រូបង្វឹក១នាក់ ហើយទូកប្រកួត គឺធ្វើអំពីឈើ មិនអនុញ្ញាតឲ្យប្រើទូកលុងសម្រាប់ប្រណាំងនោះទេ៕

អត្ថបទ៖ សុខុម