ព័ត៌មានជាតិ

អ្នកវិភាគ៖ បាតុកម្មនៅកូរ៉េខាងត្បូងបរាជ័យ ព្រោះគ្មានអ្នកចូលរួមច្រើន និងជាបាតុកម្មប្រមូលលុយដូចសព្វដង

បានផុស

១ year មុន

នៅ

ថ្ងៃអាទិត្យ ២៧ តុលា ២០២៤

ដោយ

លោក ថុង ម៉េងដាវីត អ្នកវិភាគនៅកម្ពុជា បានឱ្យដឹងថា បាតុកម្មនៅកូរ៉េខាងត្បូង ដែលរៀបចំដោយក្រុមប្រឆាំងជ្រុលនិយម នាថ្ងៃទី២៧ ខែតុលា ឆ្នាំ២០២៤ នេះ បានបរាជ័យ ព្រោះគ្មានអ្នកចូលរួមដូចការរំពឹងទុក។ ក្នុងនោះ អ្នកចូលរួមមានមិនដល់ ៤០នាក់ឡើយ ហើយចុងក្រោយបាតុកម្ម ក៏បានកៀរគថវិកាពីអ្នកចូលរួមដូចសព្វដង។ បាតុកម្មបរាជ័យ ដឹកនាំដោយ លោកស្រី មួរ សុខហួរ នេះ បានក្លាយជាបាតុកម្មដែលខកចិត្តដោយគ្មានពលករខ្មែរគាំទ្រ។

អ្នកវិភាគនៅកម្ពុជារូបនេះ បានលើកឡើងពីចំណុចដែលធ្វើឱ្យបាតុកម្មរបស់ក្រុមបំផ្លាញជាតិទទួលបរាជ័យដោយសារតែជាប្រយោជន៍ផ្ទាល់ខ្លួនដែលមិនឆ្លុះបញ្ចាំងពីប្រយោជន៍ជាតិដែលធ្វើឱ្យពលករមិនចូលរួម។ លោកបានសង្កត់ធ្ងន់ថា «គណបក្សប្រឆាំង និងក្រុមជ្រុលនិយមទាំងអស់នោះបានធ្វើនយោបាយអំពាវនាវ ប្រកាសធ្វើបាតុកម្មដើម្បីជីវភាពនយោបាយរបស់គាត់តែប៉ុណ្ណោះ ដោយមិនបានគិតពីជីវភាព និងសេចក្តីសុខរបស់ប្រជាជនខ្មែរនោះទេ»។ លោកថា ការធ្វើនយោបាយ និងការរៃអង្គាសប្រាក់ទាំងអស់នេះ ជាសកម្មភាពជាក់ស្តែង ជាអ្វីដែលឆ្លុះបញ្ចាំងពីភាពអសម្មភាពក្នុងការដឹកនាំនយោបាយ ដោយមិនមានគោលនយោបាយច្បាស់លាស់ និងការបម្រើតែប្រយោជន៍ដល់បក្សពួករបស់ខ្លួន និងបរទេសតែប៉ុណ្ណោះ។

ចំណែក លោក សំ សឿន ប្រធានសហភាពពលកម្មជាតិកម្ពុជា និងជាអ្នកតាមដាននយោបាយកម្ពុជា បានមើលឃើញថា ក្រុមប្រឆាំងកាន់តែអប្រជាប្រិយភាពកាន់តែខ្លាំងព្រោះនយោបាយបំផ្លិចបំផ្លាញជាតិ និងបង្អាប់បង្អោនជាតិខ្លួនឯងដែលធ្វើឱ្យពលរដ្ឋអស់ជំនឿ។ លោកគូសបញ្ជាក់ «ការប្រមូលលុយ ដាក់ធុង គឺបង្ហាញឱ្យឃើញថាការធ្វើបាតុកម្មនេះ ចេតនាគឺជាការប្រមូលលុយ កៀគរគ្នាដើម្បីប្រមូលលុយយកទៅចិញ្ចឹមចលនា ការងារនេះបន្តទៀតប៉ុណ្ណោះ»។ លោកថា «អ្នកដែលធ្លាប់ជឿជាក់ អ្នកដែលធ្លាប់បង់លុយតាមគោលការណ៍បក្សគឺលែងមាន នោះមានន័យថា ស្រមោលគណបក្សសម រង្ស៊ី គឺបាត់បង់បន្តិចម្តងៗ នៅពេលអ្នកទាំងអស់នោះបាត់ជំនឿចិត្ត ដែលធ្វើឱ្យការបង់លុយលែងមាន»។

ទោះយ៉ាងណា ក្រុមដែលមាននិន្ទាការប្រឆាំងជ្រុលនិយម ត្រូវបានគេមើលឃើញពីការបាត់បង់ប្រជាប្រិយភាព ព្រោះតែការធ្វើនយោបាយមិនឆ្លុះបញ្ចាំងពីប្រយោជន៍ជាតិ ធ្វើឱ្យប្រជាពលរដ្ឋ និងក្រុមពលករអស់ជំនឿដោយសារតែការប្រមូលថវិកាដើម្បីឧបត្ថមការធ្វើបាតុកម្ម ពីគ្នីគ្នា និងការលែងជឿជាក់ពីសំណាក់ប្រជាពលរដ្ឋ ចំពោះក្រុមប្រឆាំងដែលលាបពណ៌ និងបំផ្លើសការពិតមកលើរាជរដ្ឋាភិបាលកម្ពុជា៕