ឯកឧត្តម ហ៊ុន ម៉ានី ទទួលជួបក្រុមកីឡាករបាល់ទាត់ ស.ស.យ.ក និងក្រុមបាលទាត់ CFSS

នារសៀលថ្ងៃទី៣១ ខែតុលា ឆ្នាំ២០២៤ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានទទួលជួបជាមួយគណៈប្រតិភូក្រុមកីឡាករបាល់ទាត់ ខេមបូឌាហ្វូតបលសូពើស្ដារ (Cambodia Football Super Stars) ដឹកនាំដោយលោក ឃួង ស្រេង ប្រធានចាត់ការទូទៅកិត្តិយស និងជាជំនួយការគ្រូបង្វឹកកិត្តិយស CFSS។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឯកឧត្តម ហ៊ុន ម៉ានី បានស្វាគមន៍ដល់គណៈប្រតិភូក្រុមបាល់ទាត់ ខេមបូឌាហ្វូតបលសូពើស្ដារ (CFSS) ដែលនេះជាជំនួបលើកដំបូងរវាងក្រុមទាំងពីរក្នុងការជួបពិភាក្សាលើការងារចាំបាច់មួយចំនួន ដើម្បីត្រៀមលក្ខណៈរៀងខ្លួនឆ្ពោះទៅកាន់ការប្រកួតនាពេលខាងមុខ។

ឯកឧត្តម បានលើកឡើងថា ក្រុមកីឡាករទាំងសងខាង ត្រូវត្រៀមលក្ខណៈសម្បត្តិឱ្យបានពេញលេញ ដើម្បីធ្វើយ៉ាងណា ឱ្យការប្រកួតមានភាពស្វិតស្វាញ ស្វាហាប់ ក្នុងស្មារតីកីឡា និងមិត្តភាព ដែលនឹងធ្វើឱ្យអ្នកគាំទ្រទទួលបានបរិយាកាសសប្បាយរីករាយនៃការជួបជុំផង និងទទួលបានភាពជក់ចិត្តក្នុងការប្រកួតផងដែរ។

ក្នុងជំនួបនេះ លោក ឃួង ស្រេង បានរៀបរាប់អំពី​បុព្វហេតុ និង​គំនិត​ផ្តួច​ផ្តើម​របស់​សម្តេច​តេជោ ហ៊ុន សែន គ្រូបង្វឹកកិត្តិយសក្រុម CFSS ក្នុងការរៀបចំការប្រកួតបាល់ទាត់ដ៏ធំអស្ចារ្យមួយ ដើម្បីចូលរួមអបអរសាទរ ទិវាសន្តិភាពនៅកម្ពុជា លើកដំបូង នៅថ្ងៃទី២៩ ខែធ្នូ ឆ្នាំ២០២៤នេះ។

ជាមួយគ្នានោះ លោក ក៏បានរាយការណ៍ជូនអង្គប្រជុំផងដែរ ថា ការប្រកួតខាងមុខនេះនឹងទទួលបានកិត្តិយសដ៏ខ្ពង់ខ្ពស់ ដោយសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នឹងអញ្ជើញជាអធិបតីក្នុងការទស្សនាការប្រកួតនេះ។

សូមបញ្ជាក់ថា ព្រឹត្តិការណ៍បាល់ទាត់រវាងក្រុមបាល់ទាត់សហភាពសហព័ន្ធយុវជនកម្ពុជា (ស.ស.យ.ក) និងក្រុមបាល់ទាត់ ខេមបូឌាហ្វូតបលសូពើស្ដារ នឹងប្រព្រឹត្តទៅនៅថ្ងៃទី២៩ ខែធ្នូ ឆ្នាំ២០២៤ នាពេលខាងមុខ នៅពហុកីឡដ្ឋានជាតិ មរតកតេជោ៕