រដ្ឋបាលក្រុងបាវិត ចាប់ផ្តើមជួសជុលផ្លូវតាពៅឡើងវិញ ក្រោយរងការខូចខាតដោយសារជំនន់ទឹកភ្លៀង

រដ្ឋបាលក្រុងបាវិត និងក្រុមស្តារប្រឡាយតាពៅ កាលពីចុងសប្តាហ៍កន្លងទៅនេះ បានចាប់ដំណើរការជួសជុលឡើងវិញនូវកំណាត់ផ្លូវតាពៅ១ខ្សែ​ ដែលបានរងការខូចខាតដោយសារជំនន់ទឹកភ្លៀងចុងឆ្នាំ ដែលជាហេតុធ្វើឲ្យផ្លូវមានសភាពរអិលបែកភក់ល្បាប់ស្រុតផុងពិបាកក្នុងការធ្វើដំណើររបស់ប្រជាពលរដ្ឋ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក លឹម សៀងហេង អភិបាលក្រុងបាវិត បានបញ្ជាក់ឲ្យដឹងថា ក្រោយពេលមេឃរាំងភ្លៀង លោក និងក្រុមស្ដារប្រឡាយតាពៅ បានធ្វើការចាក់ថ្មមិក និងកៀរកិនបង្ហាប់ ដើម្បីជួសជុលផ្លូវលំមួយខ្សែឡើងវិញស្ថិតនៅភូមិតាពៅ សង្កាត់បាវិត ក្រុងបាវិត ខេត្តស្វាយរៀង។ លោកអភិបាលក្រុងបាវិតថា ដោយសាររដូវនេះ ជារដូវវស្សា ហេតុដូច្នេះហើយធ្វើឲ្យបណ្ដាផ្លូវលំមួយចំនួន បានរងការខូចខាតដោយសារជំនន់ទឹកភ្លៀងនាចុងរដូវវស្សា។ ម៉្យាងទៀតដោយសារមានទឹកភ្លៀងដូច្នេះ មិនអាចដាក់គ្រឿងចក្រជួសជុលបានទេ លុះត្រាតែមេឃរាំងភ្លៀង ហើយការជួសជុលផ្លូវមួយខ្សែនេះ គឺបន្តជួសជុលរហូតដល់សង្កាត់ប្រាសាទ គឺនឹងចាក់ថ្មមិកទៅតាមលទ្ធភាពជាជំហានៗ ដើម្បីសម្រួលដល់ការធ្វើដំណើររបស់ប្រជាពលរដ្ឋក៏ដូចជាអ្នកដែលបានធ្វើដំណើរឆ្លងកាត់ផ្លូវមួយខ្សែខាងលើនេះ។

សូមបញ្ជាក់ថា ផ្លូវលំមួយខ្សែស្ថិតនៅក្នុងភូមិតាពៅ សង្កាត់បាវិត ក្រុងបាវិត នាពេលកន្លងមក បានរងផលប៉ះពាល់ដោយសារជំនន់ទឹកភ្លៀងផង និងដោយសារការដឹកដីស្ដារប្រឡាយតាពៅផងដែលជាហេតុធ្វើឲ្យកំណត់ផ្លូវលំមួយខ្សែនេះ បានស្រុតដោយអន្លើៗ ហើយមានសភាពរអិលពិបាកក្នុងការធ្វើដំណើរនៅក្នុងភូមិសាស្ត្រខាងលើនេះ ហើយប្រជាពលរដ្ឋក៏បានសំណូមពរដល់លោកចៅសង្កាត់បាវិត ដើម្បីជួយជួសជុលផ្លូវមួយខ្សែនេះឡើងវិញផងដែរ៕

ដោយ៖ ភក្ដី