សាកលវិទ្យល័យចំនួន៥ បានចុះMOUជាមួយគ្នាដើម្បីបង្កើតបណ្តាញមជ្ឈមណ្ឌលបណ្តុះធុរកិច្ចថ្មីតាមសាកលវិទ្យាល័យ

នៅល្ងាចថ្ងៃទី១២ ខែវិច្ឆិកា ឆ្នាំ២០២៤ សាកលវិទ្យាល័យភូមិន្ទភ្នំពេញ និងសាកលវិទ្យាល័យចំនួន៤ទៀត បានចុះអនុស្សរណៈយោគយល់គ្នា (MOU) ដើម្បីបង្កើតបណ្តាញមជ្ឈមណ្ឌលបណ្តុះធុរកិច្ចថ្មីនៅតាមសាកលវិទ្យាល័យ ដែលជាជំហានថ្មីមួយក្នុងការពង្រឹងប្រព័ន្ធអេកូឡូស៊ីសម្រាប់ការបង្កើតធុរកិច្ចថ្មីនៅកម្ពុជា។

ពិធីចុះអនុស្សរណៈយោគយល់គ្នានេះ ធ្វើឡើងក្រោមអធិបតីភាព បណ្ឌិត សាន វឌ្ឍនា រដ្ឋលេខាធិការក្រសួងអប់រំ យុវជន និងកីឡា និងដឹកនាំដោយ បណ្ឌិត ជេត ជាលី សាកលវិទ្យាធិការនៃសាកលវិទ្យាល័យភូមិន្ទភ្នំពេញ។ សាកលវិទ្យាល័យដែលចូលរួមក្នុងការចុះអនុស្សរណៈយោគយល់គ្នានេះ មានដូចជា សាកលវិទ្យាល័យភូមិន្ទភ្នំពេញ សាកលវិទ្យាល័យ ស្វាយរៀង សាកលវិទ្យាល័យ ហេង សំរិន ត្បូងឃ្មុំ សាកលវិទ្យាល័យជាតិជាស៊ីមកំចាយមារ និងសាកលវិទ្យាល័យជាតិបាត់ដំបង។

ជាមួយគ្នានេះ ការចុះ MOU ធ្វើឡើងស្របគ្នានៅក្នុងកម្មវិធីផ្តល់វិញ្ញាបនបត្របញ្ចប់ធុរកិច្ចថ្មីចំនួន២០ក្រុម (ជំនាន់ទី៣ ទី៤ និងទី៥) នៃមជ្ឈមណ្ឌលជាតិបណ្តុះធុរកិច្ចថ្មីនៃកម្ពុជា (ហៅកាត់ NICC) ក្នុងនោះក៏មានការចែករំលែក ពីធុរកិច្ចថ្មីផងដែរដូចជា MOUY និង SmartBox។ មកដល់ពេលនេះ NICC បានបណ្តុះបណ្តាលធុរកិច្ចថ្មីបានចំនួន៣១ក្រុម ដែលបានរួមចំណែកមួយផងដែរដល់សេដ្ឋកិច្ចឌីជីថលកម្ពុជា៕