អាជ្ញាធរជាតិដោះស្រាយវិវាទក្រៅប្រព័ន្ធតុលាការ ដោះស្រាយវិវាទបាន ៨៨ករណី ក្នុងចំណោមសំណុំរឿងសរុប ៣៣៨ករណី

យោងតាមលទ្ធផលនៃកិច្ចប្រជុំលើកទី៧ របស់អាជ្ញាធរជាតិដោះស្រាយវិវាទក្រៅប្រព័ន្ធតុលាការ (អ.ដ.ក) នាថ្ងៃទី២០ ខែវិច្ឆិកា ឆ្នាំ២០២៤ បានឱ្យដឹងថា គិតចាប់ពីថ្ងៃទី១ ខែកក្កដា ឆ្នាំ២០២៤ អ.ដ.ក បានដោះស្រាយសំណុំរឿងចំនួន ៨៨ករណី ក្នុងចំណោមសំណុំរឿងសរុបចំនួន ៣៣៨ករណី។

ក្នុងនោះ សំណុំរឿងចំនួន ៣៧ករណី ត្រូវបានសម្រុះសម្រួលដោះស្រាយដោយជោគជ័យ ខណៈសំណុំរឿង ២២ករណី ត្រូវបានលើកចោលដោយសារខុសសមត្ថកិច្ច ឬខុសលក្ខខណ្ឌនៃការធ្វើបណ្តឹង ហើយសំណុំរឿង ២៩ករណី ត្រូវបានបិទបញ្ចប់ ដោយសារភាគីមិនទទួលយកការសម្រុះសម្រួលផ្សះផ្សាររបស់ អ.ដ.ក។ ដោយឡែក សំណុំរឿង ២៥០ករណី កំពុងស្ថិតក្នុងចំណាត់ការរបស់អ.ដ.ក។

ចំពោះការផ្សព្វផ្សាយវិញ អ.ដ.ក បានចុះធ្វើសោក្ខាសាលាផ្សព្វផ្សាយ និងរៀបើកវគ្គបណ្តុះបណ្តាលជំនាញសម្រុះសម្រួលដោះស្រាយវិវាទ ជូនដល់អាជ្ញាធរមូលដ្ឋាន និងមន្ត្រីពាក់ព័ន្ធប្រមាណជិត ១ ៧០០នាក់ នៅខេត្តចំនួន៨ រួមមាន ខេត្តបាត់ដំបង ខេត្តកណ្តាល ខេត្តបន្ទាយមានជ័យ ខេត្តព្រៃវែង ខេត្តកំពង់ស្ពឺ ខេត្តត្បូងឃ្មុំ ខេត្តកំពង់ឆ្នាំង និងខេត្តកំពត។ នៅក្នុងឆ្នាំ២០២៤ នេះ ​អ.ដ.ក នឹងបន្តចុះធ្វើសិក្ខាសាលាផ្សព្វផ្សាយ និងរៀបចំវគ្គបណ្តុះបណ្តាលជំនាញសម្រុះសម្រួលដោះស្រាយវិវាទជូនដល់អាជ្ញាធរមូលរដ្ឋាន និងមន្ត្រីពាក់ព័ន្ធ នៅរាជធានីភ្នំពេញ ខេត្តកំពង់ធំ និងខេត្តសៀមរាប។

ពាក់ព័ន្ធកិច្ចសហប្រតិបត្តិការក្នុងក្របខណ្ឌជាតិ និងអន្តរជាតិ អ.ដ.ក បានចុះអនុស្សរណៈនៃការយោគយល់គ្នា(MOU) ជាមួយស្ថាប័នចំនួន៣ រួមមាន គណៈមេធាវីនៃព្រះរាជាណាចក្រកម្ពុជា មជ្ឈមណ្ឌលជាតិមជឈ្ឈត្តការផ្នែកពាណិជ្ជកម្ម និងអង្គការនារីដើម្បីសន្តិភាព។ លើសពីនេះ អ.ដ.ក ក៏គ្រោងនឹងចុះអនុស្សរណៈនៃការយោគយល់គ្នាជាមួយរដ្ឋបាលខេត្តកណ្តាល បាត់ដំបង កំពង់ឆ្នាំង និងរាជធានីខេត្តដ៏ទៃទៀត នាពេលឆាប់ៗខាងមុខ ដើម្បីរួមចំណែកលើកកម្ពស់យន្តការនៃការសម្រុះសម្រួលផ្សះផ្សាវិវាទក្រៅប្រព័ន្ធតុលាការឱ្យកាន់តែងាយស្រួល កាន់តែសម្បូរបែប និងកាន់តែខិតជិតប្រជាពលរដ្ឋនៅមូលរដ្ឋាន។

ទន្ទឹមគ្នានេះដែរ អ.ដ.ក ក៏បានធ្វើកិច្ចសហការផ្លាសប្តូរបទពិសោធន៍នៃការដោះស្រាយវិវាទ និងពង្រឹងសមត្ថភាពមន្ត្រីសម្រុះសម្រួលដោះស្រាយវិវាទ អ.ដ.ក ជាមួយ អង្គការ Jica របសើប្រទេសជប៉ុន, Asian Institute of Alternative Dispute Resolution(AIADA) របស់ម៉ាឡេស៊ី និងក្រសួងយុត្តិធម៌នៃសាធារណៈរដ្ឋកូរ៉េ៕