ព័ត៌មានជាតិ

ប.ស.ស និងអង្គការអុកស្វាម រៀបចំវេទិកាប្រចាំឆ្នាំថ្នាក់ជាតិ កសាងប្រព័ន្ធសន្តិសុខសង្គមនៅកម្ពុជាកាន់តែរីកចម្រើន

បានផុស

២ years មុន

នៅ

ថ្ងៃពុធ ២៧ វិច្ឆិកា ២០២៤

ដោយ

បេឡាជាតិសន្តិសុខសង្គម(ប.ស.ស.) សហការជាមួយអង្គការអុកស្វាម បានរៀបចំវេទិកាប្រចាំឆ្នាំថ្នាក់ជាតិក្រោមមូលបទ ៖ គាំពារសង្គមសម្រាប់ទាំងអស់គ្នា ដើម្បីអន្តរកាលប្រកបដោយយុត្តិធម៌នៅកម្ពុជា ដើម្បីប្រមូលធាតុចូលនានាកសាងប្រព័ន្ធសន្តិសុខសង្គមនៅកម្ពុជាកាន់តែរីកចម្រើនបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងវេទិកាប្រចាំឆ្នាំថ្នាក់ជាតិរបស់អង្គការអុកស្វាម កាលពីថ្ងៃទី ២៦ វិច្ឆិកា លោកបណ្ឌិត ហេង សុផាន់ណារិទ្ធ អគ្គនាយកបេឡាជាតិសន្តិសុខសង្គមស្ដីទី តំណាងដ៏ខ្ពង់ខ្ពស់ លោក ហេង សួរ រដ្ឋមន្ដ្រីក្រសួងការងារ និងបណ្ដុះបណ្ដាលវិជ្ជាជីវៈ បានកោតសរសើរចំពោះអង្គការអុកស្វាម ដែលបានខិតខំប្រឹងប្រែងរៀបចំបង្កើតវេទិកាប្រចាំឆ្នាំនេះឡើង ដែលនេះជាយុទ្ធនាការ និងជាកិច្ចសន្ទនាសង្គមប្រចាំឆ្នាំ ២០២៤ ដ៏ល្អប្រសើរ ដែលបានប្រមូលមតិ និងសំណូមពរនានា បានពីវេទិកាថ្នាក់តំបន់ ដែលនេះជាការរួមចំណែកពង្រឹងយន្តការគណនេយ្យភាពសង្គមក្នុងប្រព័ន្ធគាំពារសង្គម ស្វែងយល់ពីការយល់ឃើញ បញ្ហាប្រឈម និងសំណើនានា និងពង្រឹងកិច្ចសហការគ្នា និងកិច្ចសន្ទនាសង្គម រវាងនិយ័តករ និងប្រតិបត្តិករ នៃរបបសន្តិសុខសង្គម។

តាមរយៈវេទិកាប្រចាំឆ្នាំថ្នាក់ជាតិនេះ លោកអគ្គនាយក ប.ស.ស. ស្ដីទី សង្ឃឹមយ៉ាងមុតមាំថា កិច្ចសន្ទនាមកគ្រប់ភាគីពាក់ព័ន្ធ ដែលប្រមូលបានពីវេទិកាថ្នាក់តំបន់នៅខេត្តចំនួន ៣ រួមមាន ខេត្តព្រះសីហនុ ខេត្តសៀមរាប និងខេត្តស្វាយរៀង ដែលជាប៉ូលតំបន់សេដ្ឋកិច្ច នឹងក្លាយជាធាតុចូលដ៏សំខាន់ និងជាពុទ្ធិដ៏ប្រសើរសម្រាប់ជាគន្លឹះក្នុងការរៀបចំនូវយុទ្ធសាស្ត្រ និងផែនការការងារបន្ទាប់ សម្រាប់អនុវត្តការងារប្រកបដោយជោគជ័យ និងមានប្រសិទ្ធភាពខ្ពស់ក្នុងការរួមចំណែកលើកកម្ពស់ និងការពង្រីករបបសន្តិសុខសង្គមកម្ពុជា ទៅដល់ប្រជាជនគោលដៅឱ្យកាន់តែទូលំទូលាយ និងឆ្ពោះទៅរកការគ្របដណ្ដប់សុខភាពជាសកល។

គួរបញ្ជាក់ថា វេទិកាប្រចាំឆ្នាំថ្នាក់ជាតិនេះ ជាឱកាសដែលថ្នាក់ដឹកនាំសហគមន៍ និងតំណាងកម្មករ-និយោជិត នៅតាមតំបន់នានា អាចធ្វើការពិភាក្សារួមគ្នា ដើម្បីបញ្ចេញមតិបង្ហាញអំពីបញ្ហាប្រឈម សំណូមពរ ដើម្បីជាឧត្តមប្រយោជន៍ដល់ការកសាងប្រព័ន្ធសន្តិសុខសង្គមនៅកម្ពុជាឱ្យកាន់តែរីកចម្រើនបន្ថែមទៀត៕

អត្ថបទ ៖ សំអឿន