ពូជស្រូវខ្មែរ ២ ប្រភេទ រដ្ឋមន្រ្តីកសិកម្មណែនាំ​ឲ្យ​កសិករ​ជ្រើសរើស​យក​ទៅ​ដាំ​ដុះ​ ផ្តល់​ទិន្នផល​​ ១ ហិកតា ៤ តោន

ស្រូវប្រភេទ”ផ្ការំដួល”និង”សែនក្រអូប”ជាប្រភេទពូជស្រូវរបស់ខ្មែរ ដែល​អាចធានាបានទាំងទិន្នផលខ្ពស់ ឆ្លើយតបតាមតម្រូវការលើទីផ្សារ ខណះពូជស្រូវរបស់ខ្មែរទាំង២ប្រភេទនេះ ទទួលបានចំណាត់ថ្នាក់អង្ករល្អ កំពុងមានទីផ្សារនិងមានតម្លៃខ្ពស់នៅក្រៅប្រទេស។

ការលើកឡើងនេះ ខណះដែលរដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បាន​ចុះទៅ​ពិនិត្យសកម្មភាព​ផលិតពូជស្រូវ និងចូលរួមច្រូតកាត់ប្រមូលផលស្រូវនៅស្ថានីយកសិដ្ឋានផលិតពូជស្រូវទួលសំរោង ស្ថិតភូមិអូរញ ឃុំបឹងព្រីង ស្រុក​ថ្មគោល ខេត្តបាត់ដំបង។

ក្នុង​ឱកាស​នោះ លោក ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់និងនេសាទ បានណែនាំ​ឲ្យ​កសិករ​ដាំដុះស្រូវ ដែលមានពូជច្បាស់លាស់ គឺពូជស្រូវផ្ការំដួល និង សែនក្រអូប ជាពូជស្រូវរបស់ខ្មែរ ដែលកំពុង​មាន​តម្រូវការទីផ្សារ និងមានតម្លៃខ្ពស់​លើ​ទីផ្សារ​។

ចំណែក លោក អ៊ីង ស៊ីណា ប្រធានកសិដ្ឋានផលិតពូជស្រូវ ទួលសំរោង បានឲ្យដឹងថា កសិដ្ឋានផលិតពូជស្រូវទួលសំរោង បានទទួលគ្រាប់ពូជគ្រឹះ ពីវិទ្យាស្ថានស្រាវជ្រាវ និងអភិវឌ្ឍន៍កសិកម្មកម្ពុជា ហៅកាត់ថា កាឌី(CARDI)​ដើម្បីយក​មកផលិត ជាពូជចុះបញ្ជី និង​ត្រៀមបញ្ចេញទៅឲ្យសហគមន៍ផលិតទៅជាពូជមានវិញ្ញាបនបត្រ ខណះពូជស្រូវទាំង២ប្រភេទនេះ គឺមានលក្ខណះសុទ្ធល្អ ហើយទិន្នផលអាចនឹងទទួលបានប្រមាណជាង ៤ តោន ក្នុងមួយហិកតា។

លោកថា កសិដ្ឋាននៃស្ថានីយផលិតពូជស្រូវ ទួលសំរោង គឺជាទីតាំងផលិតគ្រាប់ពូជស្រូវធំជាងគេ នៅក្នុងប្រទេស​កម្ពុជា។ រដូវវស្សាឆ្នាំ២០២៤នេះ កសិដ្ឋានបានផលិតគ្រាប់ពូជស្រូវចំណាត់ថ្នាក់ចុះបញ្ជី ”ប្រភេទផ្ការំដួល” លើផ្ទៃដីចំនួន ១៧៥ហិកតា និង”សែនក្រអូប០១” ចំនួន ៤៥ហិកតា៕

អត្ថបទ៖ សៅ សារិទ្ធ