សម្ដេចធិបតី ចាត់ទុកការដែលពលរដ្ឋខ្មែរទៅព្យាបាលនៅក្រៅប្រទេសជារឿងធម្មតា ត្បិតប្រទេសផ្សេងក៏ដូចគ្នា

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ចាត់ទុកការដែលប្រជាពលរដ្ឋខ្មែរចេញទៅព្យាបាលជំងឺនៅក្រៅប្រទេសជារឿងដែលទូទៅ មិនមែនជាបញ្ហាចោទលើវិស័យសុខាភិបាលកម្ពុជាឡើយ ត្បិតថាប្រទេសផ្សេងៗនៅលើពិភពលោកនេះ តែងតែមានប្រជាពលរដ្ឋខ្លួនចេញទៅព្យាបាលជំងឺនៅក្រៅប្រទេសដូចគ្នាដែរ។ សម្ដេចធិបតី នាយករដ្ឋមន្ត្រីថ្លែងដូច្នេះ ក្នុងពិធីបើកការដ្ឋានសាងសង់មន្ទីរពេទ្យសាកលវិទ្យាល័យវិទ្យាសាស្ត្រសុខាភិបាល នាព្រឹកថ្ងៃទី១០ ខែធ្នូ​ ឆ្នាំ២០២៤ នៅក្នុងសង្កាត់ឃ្មួញ ខណ្ឌសែនសុខ រាជធានីភ្នំពេញ។

សម្ដេចធិបតី ហ៊ុន ម៉ាណែត សង្កត់ធ្ងន់ដូច្នេះ៖«  ពិតណាស់ប្រជាពលរដ្ឋខ្លះ អ្នកមានលទ្ធភាព គាត់ចេញទៅព្យាបាលនៅក្រៅ វាអត់ខុសពីប្រទេសផ្សេងៗ! ប្រជាពលរដ្ឋខ្លះចេញទៅព្យាបាលនៅថៃ ថៃទៅព្យាបាលនៅជប៉ុន ជប៉ុនទៅព្យាបាលនៅអាមេរិក តាមជំនាញ »។

​ប៉ុន្តែសម្ដេចធិបតី ហ៊ុន ម៉ាណែត បានណែនាំឱ្យក្រសួងសុខាភិ​បាលកម្ពុជាខិតខំប្រឹងប្រែងពង្រឹងសមត្ថភាពឱ្យកាន់តែខ្លាំងបន្ថែមទៀត បំពាក់ឧបករណ៍ទំនើបៗ និងផ្ដល់ថ្នាំឱ្យបានត្រឹមត្រូវ ដើម្បីឱ្យប្រជាពលរដ្ឋមិនមានលទ្ធភាពចេញទៅព្យាបាលនៅក្រៅប្រទេស ទទួលបានសេវាសុខាភិបាលក្នុងស្រុកមួយប្រកបដោយគុណភាពល្អប្រសើរ។

សម្ដេចធិបតី ក៏បានអះអាងដែរថា រដ្ឋាភិបាល នឹងសាងសង់មន្ទីរពេទ្យថ្នាក់តំបន់នៅក្នុងខេត្តកំពង់ចាម និងសៀមរាប ដើម្បីបង្ខិតសេវាសុខាភិបាលទំនើបឱ្យកាន់តែកៀកប្រជាពលរដ្ឋនៅតាមខេត្តដែលឆ្ងាយពីរាជធានីភ្នំពេញទទួលបានការព្យាបាលជំងឺកម្រិតធ្ងន់ទាន់ពេល ដោយមិនបាច់ចំណាយពេលវេលា និងថវិការមករាជធានីភ្នំពេញ។

រដ្ឋមន្ត្រីក្រសួងសុខាភិបាល ធ្លាប់បានឱ្យដឹងថា​ ក្នុងឆ្នាំ២០២៣​កន្លងទៅ ប្រជាពលរដ្ឋកម្ពុជា​ចន្លោះពី២០-២៥ម៉ឺននាក់  បានចេញទៅព្យាបាលជំងឺនៅក្រៅប្រទេស។ ចំណែកពលរដ្ឋជាង១៣លាននាក់ ទទួលសេវាព្យាបាលនៅតាមមន្ទីរពេទ្យក្នុងស្រុក។

រដ្ឋមន្ត្រីសុខាភិបាល អះអាងថា កម្ពុជា មិនខុសពីប្រទេសចំនួននៅក្នុងតំបន់អាស៊ានឡើយ ដោយសារតែប្រទេសក្នុងនៅតំបន់អាស៊ាន តែងតែបើកឱ្យអ្នកជំងឺចេញទៅក្រៅប្រទេសរបស់ខ្លួន ដើម្បីប្រើប្រាស់សេវាសុខាភិបាលនៅបរទេស ដែលការចេញទៅព្យាបាលជំងឺនៅក្រៅប្រទេស ជាជម្រើសរបស់អ្នកជំងឺ និងក្រុមគ្រួសាររបស់អ្នកជំងឺ៕