ព្រឹត្តិការណ៍សាទរកម្ពុជា ទទួលយកការឧបត្ថម្ភពីក្រុមហ៊ុនស្រាបៀរ តែមិនឱ្យផ្សាយម៉ាកស្រាបៀរនៅមុខព្រះបរមរាជវាំងឡើយ

ព្រឹត្តិការណ៍«សាទរកម្ពុជា» នឹងរៀបចំឡើងនៅខាងមុខព្រះបរមរាជវាំង ចាប់ពីថ្ងៃទី២៩ ខែធ្នូ ឆ្នាំ២០២៥​ ដល់ថ្ងៃទី០១ ខែមករា ឆ្នាំ២០២៥ ដោយទទួលបានការឧបត្ថម្ភពីសំណាក់ក្រុមហ៊ុនផលិតស្រាបៀរមួយចំនួន ប៉ុន្តែឯកឧត្ដម ហ៊ុន ម៉ានី ដែលជាផ្ដួចផ្ដើមឱ្យមានព្រឹត្តិការណ៍នេះឡើង បានកំណត់មិនឱ្យផ្សព្វផ្សាយម៉ាកស្រាបៀរនៅខាងមុខព្រះបរមរាជវាំងឡើយ និងក្រៅពីនេះអ្នកច្រៀង អ្នកសម្ដែងដែលមានវត្តមានក្នុងកម្មវិធី មិនអនុញ្ញាតឱ្យស្លៀកសម្លៀកបំ ពាក់មិនសមរម្យឡើយ ហើយខ្លឹមសារចម្រៀងទៀតសោតត្រូវបានត្រួតពិនិត្យយ៉ាងហ្មត់ចត់។ នេះបើតាមការឱ្យដឹងពីសំណាក់លោក សុខ សប្បាយណា សមាជិកគណៈកម្មការរៀបចំព្រឹត្តិការណ៍«សាទរកម្ពុជា» នៅក្នុងសន្និសីទសារព័ត៌មាន នៅថ្ងៃទី១៩ ខែធ្នូ ឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សុខ សប្បាយណា សង្កត់ធ្ងន់អំពីការគិតគូរខ្ពស់ទុកមុនដូច្នេះ៖«យើងក៏ប្រយ័ត្នប្រយែងដែររឿងសម្លៀកបំពាក់ មិនអាចឱ្យ(ស្លៀកពាក់)អ្វីដែលមិនស័ក្ដិសមទេ ដោយសារទីតាំងនៅសួនមុខព្រះបរមរាជវាំង។ អត្ថន័យនៃបទ(ចម្រៀង) ក៏បានគិតគូរច្បាស់លាស់ ក៏ដូចជាមិនឱ្យមានការបង្ហាញនូវ LOGO (ម៉ាកសញ្ញា)គ្រឿងស្រវឹងនៅមុខព្រះបរមរាជវាំងផងដែរ។ នេះជាស្មារតីដឹកនាំរបស់បងប្រធាន(ឯកឧត្ដម ហ៊ុន ម៉ានី ប្រធានសហភាពសហព័ន្ធយុវជនកម្ពុជា) »។

បន្ថែមពីនេះ ឆ្លើយតបនឹងសំណួររបស់កម្ពុជាថ្មី លោក សុខ សប្បាយណា បានឱ្យដឹងថា ក្រុមហ៊ុន​ស្រាបៀរ ដែលចូលរួមឧបត្ថម្ភកម្មវិធីនេះ ជាក្រុមហ៊ុនមួយដែលផលិតផលស្រាបៀរផង ភេសជ្ជៈ និងទឹកពិសារផង។ ដូច្នេះ ក្រុមហ៊ុនទាំងនោះអាចផ្សព្វផ្សាយផលិតផលភេសជ្ជៈ និងទឹកពិសារនៅទីតាំងខាងមុខព្រះបរមរាជវាំងបាន ប៉ុន្តែដាច់ខាតស្រាបៀរមិនអាចផ្សព្វផ្សាយចំពោះមុខទីតាំងមុខព្រះបរមរាជវាំងឡើយ។

ត្បិតថាមិនអាចផ្សព្វផ្សាយស្រាបៀរនៅខាងមុខព្រះបរមវាំងបាន ប៉ុន្តែក្រុមហ៊ុនស្រាបៀរទាំងនោះ អាចផ្សព្វផ្សាយម៉ាកសញ្ញារបស់ខ្លួន នៅតាមបណ្ដោយមាត់ទន្លេ និងទីតាំងផ្សេងទៀតនៃព្រឹត្តិការណ៍សាទរកម្ពុជា។ នេះជាការបញ្ជាក់បន្ថែម របស់លោក សុខ សប្បាយណា។

យ៉ាងណាក៏ដោយ លោក សុខ សប្បាយណា សមាជិកគណៈកម្មការរៀបចំព្រឹត្តិការណ៍«សាទរកម្ពុជា» ក៏បានថ្លែងអំណរគុណចំពោះក្រុមហ៊ុនស្រាបៀរដែលបានចូលរួមឧបត្ថម្ភ និងយល់ស្របចំពោះគោលការណ៍មិនផ្សាយម៉ាកសញ្ញានៅខាងមុខទីតាំងព្រះបរមរាជរាំងនេះ និងលើឆាកប្រគុំតន្រ្តីធំនៅខាងមុខព្រះបរមរាជវាំង។​

គួរឱ្យដឹងថា ព្រឹត្តិការណ៍សាទរកម្ពុជា ឬ Celebrating Cambodia ជាព្រឹតិ្តការណ៍នៃការអបអរដល់សង្គមមួយដែលប្រកបដោយភាពរស់រវើក ជាមួយនឹងការបង្ហាញវិសេសភាពនៃអត្តសញ្ញាណ ដោយសមានចិត្តសោមន្សចំពោះអ្វីៗដែលបានឆ្លងកាត់ និងជម្នះ និងការលើកតម្កើងមោទនភាពក្នុងភាពជាប្រជាជាតិមួយ៕​

ដោយ៖ ង៉ិល ណារ៉ាត់