ព័ត៌មានជាតិ

រដ្ឋមន្រ្តីបរិស្ថាន បង្ហាញសុទិដ្ឋិនិយមថា ការដាក់ចេញយុទ្ធនាការសំអាតផ្លូវជាតិ នឹងទទួលបានជោគជ័យនៅទូទាំងប្រទេស

បានផុស

២ years មុន

នៅ

ថ្ងៃអង្គារ ២៤ ធ្នូ ២០២៤

ដោយ

បន្ទាប់ពីបានប្រកាសដាក់ចេញនូវ «យុទ្ធនាការសំអាតផ្លូវជាតិ» កាលពីពេលកន្លងទៅ លោក អ៊ាង សុផល្លែត រដ្ឋមន្ត្រីក្រសួងបរិស្ថាន បានបង្ហាញសុទិដ្ឋិនិយមថា តាមរយៈការដាក់ចេញយុទ្ធនាការនេះ នឹងទទួលបានភាពជោគជ័យបន្ថែមទៀត នៅទូទាំងប្រទេស ដើម្បីឱ្យកម្ពុជាដែលជាផ្ទះរបស់យើងស្អាត «កម្ពុជាស្អាត គ្មានសំរាម និងសំណល់ប្លាស្ទិក តាមដងផ្លូវជាតិ ចាប់ពី ឆ្នាំ២០២៥»។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អ៊ាង សុផល្លែត បានបង្ហាញសុទិដ្ឋិនិយមបែបនេះ ក្រោយពេលដែលចលនាមហាជនកាន់តែច្រើនឡើងបានចូលរួមគាំទ្រដល់គម្រោងសាកល្បងរបស់ក្រសួងបរិស្ថានដើម្បីសំអាតផ្លូវជាតិជាប្រចាំឆ្ពោះទៅកម្ពុជាសមានភាពស្អាត គ្មានសំរាម និងសំណល់ប្លាស្ទិករាយប៉ាយ។

គម្រោងសាកល្បងដើម្បីផ្លូវជាតិស្អាត គ្មានសំរាមរាយប៉ាយ កំពុងទទួលបានជោគជ័យ ដោយសារមហាជនបាននិងកំពុងចូលរួមចេញរើសសំរាម និងសំអាតតាមផ្លូវជាតិ យ៉ាងផុលផុសនាពេលកន្លងមក។

ជាក់ស្ដែង កាលពីថ្ងៃទី២២ ខែធ្នូ កន្លងទៅនេះ មន្រ្តីជំនាញក្រសួងបរិស្ថាន បានចុះត្រួតពិនិត្យ និងវាយតម្លៃលើភាពស្អាត នៅតាមផ្លូវជាតិលេខ៣ លេខ៤ លេខ៤១ និង៥១ ហើយបានបញ្ជាក់ថា ផ្លូវជាតិទាំងនោះមានសម្រស់ស្រស់ស្អាតជាបណ្តើរៗ បន្ទាប់ពីមានការចូលរួមសំអាតពីប្រជាពលរដ្ឋ អាជ្ញាធរមូលដ្ឋាន សិស្សានុសិស្ស កម្មករ កម្មការិនី យុវជន តំណាងអង្គការសង្គមស៊ីវិល វិស័យឯកជន និងប្រជាពលរដ្ឋនៅតាមមូលដ្ឋាន។

ក្នុងនោះ ផ្លូវជាតិលេខ៣ ចាប់ពីគល់ស្ពានអាកាសចោមចៅ ដល់គីឡូម៉ែត្រលេខ៥០ ស្ថិតក្នុងភូមិសាស្រ្តស្រុកសំរោង ស្រុកត្រាំកក់ នៃខេត្តតាកែវ ស្រុកបសេដ្ឋ ខេត្តកំពង់ស្ពឺ និងផ្លូវឆ្ពោះទៅស្រុកឈូក ស្រុកទឹកឈូ និងក្រុងកំពត ខេត្តកំពត មានសោភ័ណភាពល្អប្រសើរ មិនមានសំរាមរាយប៉ាយតាមសងខាងផ្លូវ និងគ្មានគំនរសំរាមនោះទេ។

ដោយឡែក តាមការចុះពិនិត្យផ្លូវជាតិលេខ៤១ ចន្លោះពីគីឡូម៉ែត្រលេ៣ ទៅគីឡូម៉ែលេ៣២ មានគំនសំរាម ដោយអន្លើៗ បន្ទាប់មក ចន្លោះគីឡូម៉ែត្រលេខ២៥ ដល់លេខ៣២ ក្នុងភូមសាស្រ្តខេត្តកំពង់ស្ពឺ និងចន្លោះពីគីឡូម៉ែត្រលេខ៣២ រហូតដល់ផ្លូវបំបែកផ្លូវជាតិលេខ៣ តាមដងផ្លូវមានសភាពល្អប្រសើរ មិនមានសំរាមរាយប៉ាយតាមផ្លូវទេ។

សូមបញ្ជាក់ថា គម្រោងសាកល្បងរៀបចំឱ្យផ្លូវជាតិស្អាត គ្មានសំរាម និងសំណល់ប្លាស្ទិក រាយប៉ាយ បានចាប់ផ្តើមអនុវត្តតាំងពីពាក់កណ្តាលខែវិច្ឆិកា ឆ្នាំ២០២៤ មកម្ល៉េះ ដោយមានការចូលរួមពីមហាជនគ្រប់ទិសទី ទូទាំងប្រទែស ជាពិសេសប្រជាពលរដ្ឋ មន្ត្រីរាជការ កងកម្លាំងប្រដាប់អាវុធ អាជ្ញាធរដែនដី សិស្សានុសិស្ស សម្អាតមូលដ្ឋាន លំនៅដ្ឋាន ទីប្រជុំជន និងតាមដងផ្លូវជាតិ៕