ឈ្មួញព្យាយាម​ទម្លាក់​តម្លៃ កសិករកែច្នៃម្ទេសស្រស់​ជា​​ម្ទេសហុយ ១គីឡូក្រាម​លក់​បានពី ១៥ ០០០ ទៅ ១៧ ០០០ រៀល

បើតាមកសិករដែលប្រកបមុខរបរដាំម្ទេសបានឲ្យកម្ពុជាថ្មីដឹងថា លោកលែងបារម្ភអំពីក្រុមឈ្មួញដើរទម្លាក់តម្លៃម្ទេសទៀត​ហើយ ខណះរាល់រដូវកាលតែងប្រឈមបញ្ហា២យ៉ាង គឺចំណេញនិងខាតដើម ដោយសារតែក្រុមឈ្មួញបាន​ទម្លាក់តម្លៃតាមតែចិត្តចង់ចំណេញ ខណះការប្រមូលទិញជំហានដំបូងមានតម្លៃសមរម្យ ហើយចាប់ពី​លើក​ទី ២ និង ទី ៣ ឈ្មួញបានទម្លាក់តម្លៃដែលអ្នកដាំមិនអាចទទួលយកបាន។

នៅលើទំហំដីប្រមាន ៥ ហិកតា នៅក្បែរជើងភ្នំស្ថិតក្នុងឃុំចែងមានជ័យ ស្រុកបាណន់ ខេត្តបាត់ដំបង លោក ប៊ុន ធឿន បានរៀបរាប់ថា ក្រុមគ្រួសារលោកបានពឹងផ្អែកលើផលដំណាំម្ទេសពីមួយរដូវដល់មួយរដូវ សម្រាប់ទ្រទ្រង់​សេដ្ឋកិច្ចគ្រួសារ និង​ការសិក្សាររបស់កូនៗ។

មុខរបរដាំម្ទេសនេះតែងតែមាន​ប្រឈម​លើ​​បញ្ហា​តម្លៃ ដែលធ្វើឲ្យប៉ះពាល់​ដល់​សេដ្ឋកិច្ចគ្រួសារ។ នេះបើតាម​លោក ប៊ុន ធឿន។ ​ត្រូវ​ហត់នឿយក្នុងក្រុមគ្រួសារបន្តិច ដោយសារត្រូវកាត់បន្ថយកម្លាំងពលកម្ម​ លោក​​ត្រូវ​ប្រមូលផលដោយខ្លួនឯងខ្លះ ទើបអាច​ទប់ទល់បាន​ចំណូលដែលឈ្មួញបានទម្លាក់តម្លៃយ៉ាងច្រើន ដែលតម្លៃជាទូទៅជំហានដំបូងបាន​ចន្លោះ​ពី ៤ ០០០ រៀលទៅ ៤ ៥០០ រៀល តែពេលនេះបានត្រឹមចន្លោះពី ១ ៥០០ រៀលទៅ ២ ៥០០រៀល ប៉ុណ្ណោះ។

កសិកររូបនេះបន្តថា តម្លៃខាងលើនេះគឺលោកឈប់លក់ឲ្យក្រុមឈ្មួញទៀតហើយ ដោយ​លោក​ត្រូវ​ប្រមូលហាលឲ្យក្រៀម​ទាំងអស់ ខណះលោកទើប​សម្រេចចិត្ត​ទិញម៉ាសុីនកិនមួយកែច្នៃទៅជាម្ទេសហុយ (ម្ទេសហ្មត់) វិញ ដែល​មានទីផ្សារ ហើយក៏ភ័យ​រឿង​មិនខូចខាត​ដែរ​។

លោកអះអាង​ថា ក្រោយពីលោកបានផ្អាកលក់ម្ទេសស្រស់ ក្រុមឈ្មួញមួយចំនួនក៏បានដំឡើងតម្លៃបានខ្លះទៀត តែលោក​​នៅតែមិនលក់ ព្រោះម្ទេសក៏ប្រមូលចង់អស់ដែរ ហើយទុកកែច្នៃសម្រាប់ម៉ូយដែលបានកុម្ម៉ង់វិញ។

លោកបន្ត​ថា បើវិធីថ្មីនេះដំណើរការ លោកនឹងបន្តអាជីពថ្មីនេះរហូត ហើយម្ទេសស្រស់ក៏លក់ខ្លះឲ្យតែមានតម្លៃសមរម្យ លោក​ឈប់បារម្ភរឿងខាតទៀតហើយ ព្រោះពេលនេះលោក​មាន​ច្រក​ចំនួន ២។

លោកបន្តទៀតថា “បើខ្ញុំកែច្នែធ្វើម្ទេសហុយ ម៉ូយទទួលទិញក្នុង១គីឡូក្រាមចន្លោះពី ១៥ ០០០ រៀលទៅ ១៧ ០០០ រៀលដែរ ចឹងចំណូលក៏បានគ្រាន់បើដែរ បើទោះបីពួកគាត់លក់ចេញវិញ ចំណេញប៉ុណ្ណាទៀត ជារឿងរបស់ពួកគាត់ តែសម្រាប់ខ្ញុំ១គី ឡូក្រាម ១៧ ០០០ រៀល អាចទទួលយកបាន ហើយបើតាមខ្ញុំស្មាន យ៉ាងហោចក្នុង១ថ្ងៃ ម៉ូយទទួលយកបានជាង ១០០ គីឡូក្រាមដែរ ព្រោះម្ទេសខ្ញុំដាំប្រភេទម្ទេសដៃនាងលេខ១ ខ្លះគេហៅថា ម្ទេសចង្អុលមេឃ។

បើតាមអ្នកទទួលទិញម្ទេសហ៊ុយ​បានបង្ហើបថា ពួកគាត់ទិញចូលចន្លោះពី ១៥ ០០០ រៀលទៅ ១៧ ០០០ រៀល ក្នុង​១​គីឡូក្រាម ហើយពួកគាត់បានលក់ចេញវិញចន្លោះពី ២៥ ០០០ រៀលទៅ​ ២៧ ០០០ រៀល គ្រាន់បានកម្រៃដោះស្រាយសេដ្ឋកិច្ចគ្រួសារខ្លះ ដោយពួកគាត់ប្រាប់ថា ពួកគាត់មិនមានដីចម្ការទេ គឺរស់អាស្រ័យលើការលក់ដូរបន្លែគ្រប់មុខក្នុងផ្សារជាប្រចាំ​ថ្ងៃ ហើយចំណូលក៏បានគ្រាន់បើដែរ ដូចជាម្ទេសហ៊ុយ​ ក៏បានចំណេញគ្រាន់បើដែរ ក្នុង១គីឡូក្រាម៕

អត្ថបទ៖ សៅ សារិទ្ធ