ព័ត៌មានជាតិ

អភិបាលខណ្ឌ ៧ មករា ជំរុញមន្ត្រីការិយាល័យ ផ្ដល់ឯកសារជូនពលរដ្ឋ និងសិស្សានុសិស្ស ឲ្យលឿនរហ័ស

បានផុស

១ year មុន

នៅ

ថ្ងៃចន្ទ ១៣ មករា ២០២៥

ដោយ

ដោយមានការយកចិត្តទុកដាក់ពី រដ្ឋបាលរាជធានីភ្នំពេញ រដ្ឋបាលខណ្ឌ ៧ មករា លោក ថេង សុថុល អភិបាលខណ្ឌ បានជំរុញ និងយកចិត្តទុកដាក់ ផ្តល់សេវាបញ្ជាក់ឯកសារនីត្យានុកូលកម្មដល់សិស្សានុសិស្ស ដែលមកសុំសេវានៅការិយាល័យច្រកចេញចូលតែមួយ នៃរដ្ឋបាលខណ្ឌ ៧ មករា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងកាលពីព្រឹកថ្ងៃទី ១៣ ខែមករា ឆ្នាំ ២០២៥ រដ្ឋបាលខណ្ឌ ៧ មករា លោក ថេង សុថុល អភិបាល នៃគណៈអភិបាលខណ្ឌ ៧ មករា បានអញ្ជើញចុះហត្ថលេខាដោយផ្ទាល់លើឯកសារនីត្យានុកូលកម្មជូនប្រជាពលរដ្ឋ និងសិស្សានុសិស្ស ទោះក្នុងកាលៈទេសៈមមាញឹកយ៉ាងណាក្តី ក៏លោកអភិបាល នៅតែយកចិត្តទុកដាក់ក្នុងការផ្តល់សេវាសាធារណៈជូនអ្នកដែលបានមកស្នើសុំសេវានៅការិយាល័យច្រកចេញចូលតែមួយខណ្ឌ ៧ មករា ឲ្យបានឆាប់រហ័ស ទាន់ចិត្ត ទាន់ពេលវេលា និងមានតម្លាភាព និងឲ្យអង្គុយរង់ចាំយកឯកសារទៅវិញភ្លាមៗ តែម្ដង។

ជាមួយការទទួលយកសេវាបញ្ជាក់វិញ្ញាបនបត្របណ្ដោះអាសន្ននេះ សិស្សានុសិស្ស បានសម្តែងនូវក្ដីសប្បាយរីករាយ ប្រកបដោយស្នាមញញឹម ខណៈថ្នាក់ដឹកនាំ មន្ត្រី ដែលផ្តល់សេវានៅច្រកចេញចូលតែមួយរបស់រដ្ឋបាលខណ្ឌ ៧ មករា បម្រើប្រជាពលរដ្ឋដោយយកចិត្តទុកដាក់ លឿនទាន់ពេលវេលា ប្រកបដោយសុជីវធម៌ រួសរាយរាក់ទាក់។

សិស្សានុសិស្ស បន្តថ្លែងអំណរអរគុណដល់ថ្នាក់ដឹកនាំខណ្ឌ ៧ មករា ដែលយកចិត្តទុកដាក់ពីការផ្ដល់ឯកសារជូនដល់ពួកគាត់ ក៏ដូចជាប្រជាពលរដ្ឋដទៃផ្សេងទៀត បានលឿន និងឲ្យរង់ចាំយកឯកសារវិញភ្លាមៗ តែម្ដង។

ជាចុងក្រោយ អាជ្ញាធរ និងមន្ត្រីជំនាញ នៃការិយាល័យច្រកចេញចូលតែមួយរបស់រដ្ឋបាលខណ្ឌ ៧ មករា បានសំណូមពរដល់ប្រជាពលរដ្ឋ ក៏ដូចជាសិស្សានុសិស្ស សូមមកទទួលសេវាដោយផ្ទាល់នៅការិយាល័យច្រកចេញចូលតែមួយ កុំប្រើសេវាពឹងពាក់ទៅលើអ្នកដទៃ នាំឲ្យខាតបង់ពេលវេលា និងប្រាក់កាស៕

អត្ថបទ ៖ សុភា