សម័យប្រជុំវិសាមញ្ញព្រឹទ្ធសភា អនុម័តទាំងស្រុងលើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភា

ព្រឹទ្ធសភា អនុម័តទាំងស្រុងលើសេចក្តីស្នើវិសោធនកម្មបទបញ្ជាផ្ទៃព្រឹទ្ធសភា។ ការអនុម័តនេះ ត្រូវបានធ្វើឡើងនៅក្នុងសម័យប្រជុំជាវិសាមញ្ញព្រឹទ្ធសភា នៅព្រឹកថ្ងៃទី១៤ ខែមករា​​​ ឆ្នាំ២០២៥នេះ ក្រោមអធិបតីភាពដឹកនាំរបស់សម្តេចតេជោ ហ៊ុន សែន ប្រធានព្រឹទ្ធសភានៃកម្ពុជា។

សម័យប្រជុំពេញអង្គព្រឹទ្ធសភា នាព្រឹកថ្ងៃនេះ មានវត្តមានសមាជិក-សមាជិកាព្រឹទ្ធសភាចូលរួមចំនួន ៥៩រូប ដោយអង្គប្រជុំបានដំណើរការលើរបៀបវារៈតែមួយ គឺការពិនិត្យ និងអនុម័តលើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភានៃព្រះរាជាណាចក្រកម្ពុជា។

តំណាងសមាជិកព្រឹទ្ធសភាហត្ថលេខី បានអញ្ជើញការពារសេចក្តីស្នើវិសោធនកម្មបទបញ្ជាផ្ទៃក្នុងនេះ ដែលដឹកនាំដោយលោកស្រីបណ្ឌិត ចាន់ សុទ្ធាវី ប្រធានគណៈកម្មការនីតិកម្ម និងយុត្តិធម៌នៃព្រឹទ្ធសភា (គណៈកម្មការទី៦) និងសហការី។

បន្ទាប់ពីបានពិនិត្យ និងពិភាក្សារួចហើយ សម័យប្រជុំព្រឹទ្ធសភា បានអនុម័តលើសេចក្តីស្នើវិសោធនកម្មបទបញ្ជាផ្ទៃក្នុងព្រឹទ្ធសភានៃកម្ពុជា ដោយមានសំឡេងគាំទ្រចំនួន ៥៩សំឡេង នៃចំនួនសមាជិកព្រឹទ្ធសភាទាំងមូល៕