កសិករត្អូញត្អែររឿងតម្លៃផ្កាស្ពៃចុះថោក

ប្រជាកសិករភាគច្រើនដែលកំពុងដាំដំណាំកសិកម្ម កំពុងត្អូញត្អែរពីរឿងតម្លៃទីផ្សាររបស់បន្លែខ្មែរដែលស្ទើរតែទទួលយកមិនបាន បើទោះបីជាមានការនាំចូលពីប្រទេសជិតខាងក៏ដោយ ក៏គុណភាពមិនអាចលើសបន្លែខ្មែរបានឡើយ ប៉ុន្តែសម្រាប់ទីផ្សារ គឺទប់ទល់ទៅលើថ្លៃជីរ និងកម្លាំងពលកម្មមិនរួចឡើយ។

លោក ផុង ភឿត ជាប្រជាកសិកររស់នៅភូមិកំពង់ម្តោក ឃុំអូរដំបង២ ស្រុកសង្កែ ខេត្តបាត់ដំបង បានរៀបរាប់ថា លោកបានដាំដំណាំផ្កាស្ពៃនេះនៅលើដីពីរកន្លែង ព្រមជាមួយត្រសក់ និងប៉េងប៉ោះខ្លះបន្ថែមទៀត ដើម្បីទ្រទ្រង់ជីវភាព និងសន្សំប្រាក់កាសខ្លះឲ្យកូនបានរៀនបន្ត។

ដៃកំពុងដកដើមផ្កាស្ពៃ ដើម្បីយកមកឲ្យភរិយាកាត់ស្លឹកចេញ លោកបានបន្តថា បច្ចុប្បន្នតម្លៃផ្កាស្ពៃនៅលើទីផ្សារគឺធ្លាក់ថោកខ្លាំងណាស់ កុំថាឡើយថ្លៃប្រេង និងថ្លៃកម្លាំងពលកម្ម សូម្បីតែទប់លើថ្លៃជីក៏សឹងតែមិនរួចខ្លួនផង ដោយសារឈ្មួញទម្លាក់តម្លៃខ្លាំងពេក។

ដោយឡែកភរិយារបស់លោកក៏បាននិយាយថា ផ្កាស្ពៃសព្វថ្ងៃបើបានតម្លៃចន្លោះពី ៣.០០០ ទៅ ៣.៥០០ រៀល ទើបឃើញសាច់ចំណេញខ្លះ និងអាចទប់ទល់បាន ប៉ុន្តែនៅពេលនេះតម្លៃផ្កាស្ពៃដែលគាត់លើកទៅបោះដុំឲ្យគេ បានត្រឹមតែ ២.០០០ រៀលក្នុងមួយគីឡូក្រាមតែប៉ុណ្ណោះ តែបើយើងមិនលក់ និងទុកបន្តទៅទៀតវាអាចធ្វើឲ្យផ្កាស្ពៃនេះខូច ព្រោះវាដល់ពេលត្រូវកាត់ទៅហើយ។

អ្នកស្រីបានបន្ថែមថា ការដាំដំណាំផ្កាស្ពៃនេះត្រូវថែទាំដោយការយកចិត្តទុកដាក់ តាំងពីការស្រោចទឹកក៏ត្រូវប្រយ័ត្ន ព្រោះនៅពេលផ្កាស្ពៃចាប់ផ្ដើមចេញគឺត្រូវកាត់បន្ថយទឹក និងស្រោចដោយប្រុងប្រយ័ត្ន ព្រោះបើមិនដូច្នោះទេផ្កាស្ពៃអាចនឹងរលួយ។ អ្នកស្រីក៏បានសំណូមពរដល់ឈ្មួញទាំងឡាយមេត្តាកុំទម្លាក់តម្លៃកសិផលរបស់កសិករខ្មែរពេក ព្រោះបន្លែដែលនាំចូលពីក្រៅប្រទេសបានត្រឹមតែល្អនូវពណ៌សម្បុរប៉ុណ្ណោះ អរគុណភាពទុកមិនបានយូរដូចបន្លែខ្មែរនោះឡើយ៕

អត្ថបទ៖ សោ និយមរ័ត្ន