ព័ត៌មានជាតិ

នៅភ្នំពេញ ផែនការពង្រាយបង្គោលអង់តែនសេវាទូរសព្ទនៅទ្រឹង ទើបសម្រេចបានជាង ៤០០ បង្គោលក្នុងចំណោម ១ ០០០ បង្គោល

បានផុស

១ year មុន

នៅ

ថ្ងៃពុធ ៥ កុម្ភៈ ២០២៥

ដោយ

ក្រសួងប្រៃសណីយ៍ និងទូរគមនាគមន៍ ដែលបានដាក់ផែនការដំឡើងបង្គោលសេវាទូរសព្ទឱ្យបានប្រមាណ ១ ពាន់បង្គោលនៅរាជធានីភ្នំពេញ ប៉ុន្តែមកដល់បច្ចុប្បន្នទើបតែដំឡើងបានប្រមាណ ៤៣០ បង្គោល ដែលដំណើរការហាក់នៅទ្រឹងមិនទាន់អាចសម្រេចបន្តទៀតតាមផែនការ។ នេះបើតាមការគូសបញ្ជាក់របស់លោក ជា វ៉ាន់ដេត នៅក្នុងសន្និបាតបូកសរុបលទ្ធផលការងាររយៈពេល ៥ ឆ្នាំ របស់ក្រសួងប្រៃសណីយ៍ និងទូរគមនាគមន៍នៅព្រឹកមិញនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញបញ្ហានេះ លោក ជា វ៉ាន់ដេត រដ្ឋមន្រ្តីក្រសួងប្រៃសណីយ៍ និងទូរគមនាគមន៍ បានស្នើដល់ក្រសួងពាក់ព័ន្ធមេត្តាសហការគ្នាជួយពន្លឿនការងារនេះ ដើម្បីអាចឱ្យសម្រេចបានការដំឡើងបង្គោលនៅតាមគ្រប់អគារ នៅតាមបុរីនានាក្នុងភូមិសាស្ត្ររាជធានីភ្នំពេញ ដែលត្រូវតែមានសេវាទូរសព្ទប្រើប្រាស់ឲ្យបានគ្រប់គ្រាន់។

លោកថា «កន្លងមក នៅតាមអគារជាច្រើនប្រឈមបញ្ហាគ្មានសេវាប្រើប្រាស់ ដោយម្ចាស់អគារមួយចំនួនមិនយល់ព្រមឱ្យដំឡើង ម្ចាស់អគារមួយចំនួនទៀតយកសេវាថ្លៃ ហើយនៅតាមទីប្រជុំជន ម្ចាស់ទីតាំងមួយចំនួនមិនព្រមចេញលុយដើម្បីតសេវាអ៊ីនធឺណិតចូលក្នុងបុរីរបស់ខ្លួន ដូច្នេះប្រសិនបើយើងនៅ ៣០០ នាក់ ៥០០ នាក់ ១ ០០០ នាក់ បែបនេះ យើងមិនអាចទទួលបានសេវាប្រើប្រាស់បានងាយស្រួលនោះទេ»។

លោក បានពន្យល់ថា «សេវាមួយបង្គោលមិនអាចឱ្យពលរដ្ឋប្រើប្រាស់បានច្រើនទេ គឺបានប្រហែល ២ ពាន់ ទៅ ៣ ពាន់នាក់ប៉ុណ្ណោះ ប៉ុន្តែក្នុងចំណោមនេះប្រើប្រាស់មួយពេលយ៉ាងច្រើន ២០០ ទៅ ៣០០ នាក់គឺអស់ហើយ។ បច្ចុប្បន្ននេះ ដោយសារនៅរាជធានីភ្នំពេញដំណើរការហាក់នៅទ្រឹងខ្លាំង ដូច្នេះក្រសួងបានខិតខំទៅធ្វើបន្តនៅតាមទីរួមខេត្ត បន្តទៅទីរួមស្រុក ទីប្រជុំជន ក៏ដូចជាតាមទីកន្លែងទេសចរណ៍នានា ដែលយើងមានគម្រោងថា នឹងធ្វើឱ្យបានក្នុងឆ្នាំ២០២៧ ឱ្យប្រជាពលរដ្ឋមានសេវាប្រើប្រាស់បានគ្រប់ដណ្ដប់បានទូទាំងប្រទេស»។

បើតាមលោករដ្ឋមន្រ្តី សព្វថ្ងៃសេវាគ្រប់ដណ្ដប់ទូទាំងប្រទេសបានប្រមាណ ៨០ % នៅសេសសល់ប្រមាណ ២០% ទៀតប៉ុណ្ណោះ ដោយសេវាគ្រប់ដណ្ដប់នេះនឹងត្រូវពង្រឹងទាំងគុណភាព ទាំងសេវាប្រើប្រាស់ឱ្យបានល្អប្រសើរផងដែរ ដែលក្រសួងបានកំពុងខិតខំធ្វើការងារនេះ ដើម្បីឱ្យមានសេវាទូរស័ព្ទ និងសេវាអ៊ីនធឺណិត ជូនពលរដ្ឋប្រើប្រាស់បានគ្រប់គ្រាន់៕