ព័ត៌មានជាតិ

ឆ្នាំ ២០២៤ រដ្ឋប្រមូលចំណូលចាក់ចូលថវិកាជាតិបានប្រមាណ ៩០ លានដុល្លារ ពីអាជីវកម្មរ៉ែថ្មអារ

បានផុស

១ year មុន

នៅ

ថ្ងៃសៅរ៍ ១៥ កុម្ភៈ ២០២៥

ដោយ

បើតាមមន្ត្រីអគ្គនាយកដ្ឋានធនធានរ៉ែបានឲ្យដឹងថា នៅឆ្នាំ ២០២៤ រដ្ឋាភិបាលបានប្រមូលចំណូលពីវិស័យធនធានរ៉ែថ្មអារបានប្រមាណ ៩០ លានដុល្លារចាក់ចូលក្នុងថវិកាជាតិ។

លោក គង់ ស៊ីថា អគ្គនាយករងនៃអគ្គនាយកដ្ឋានធនធានរ៉ែបានគូសបញ្ជាក់ថា វិស័យរ៉ែថ្មអារបានរួមចំណែកជាកម្លាំងចលករមួយដ៏សំខាន់សម្រាប់ជាប្រភពចំណូលចូលថវិកាជាតិ តាមរយៈការបង់ពន្ធសួយសារអាករ រួមទាំងពន្ធផ្សេងៗ

នៅឆ្នាំ ២០២៤ អាជីវកម្មរ៉ែថ្មអារបាននាំចំណូលមិនមែនសារពើពន្ធចូលថវិកាជាតិបានប្រមាណជិត ៩០ លានដុល្លារអាមេរិក។ នេះបើតាមលោក គង់ ស៊ីថាវ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាក់ទងការធ្វើអាជីវកម្មរ៉ែថ្មអារ អគ្គនាយកដ្ឋានធនធានរ៉ែបានគូសបញ្ជាក់ថា ត្រូវមានទុនវិនិយោគខ្ទង់លានដុល្លារ ទើបអាចដំណើរការខ្សែសង្វាក់ផលិតកម្មឧស្សាហកម្មធុនធ្ងន់នេះបាន ដោយសារការដំណើរការអាជីវកម្មរ៉ែថ្មអារត្រូវការបច្ចេកទេសជាមួយបទពិសោធន៍ រួមទាំងមានស្ថិរភាពហិរញ្ញវត្ថុដ៏រឹងមាំ។

ទិន្នន័យពីក្រសួងរ៉ែ និងថាមពលបង្ហាញថា នៅប្រទេសកម្ពុជាមានក្រុមហ៊ុនជាង ៧០ កំពុងធ្វើអាជីវកម្មរ៉ែថ្មអារដែលមានទីតាំងនៅ ១១ ខេត្ត ខណៈខេត្តក្រចេះជាមូលដ្ឋានដ៏ធំដែលមានក្រុមហ៊ុនប្រមាណ ២០ កំពុងធ្វើអាជីវកម្មរ៉ែថ្មអាច្រើនជាងគេដើម្បីកែច្នៃនាំចេញទៅក្រៅប្រទេស។

បើតាមអនុប្រធានសមាគមថ្មអារ ស្ទើរតែ ៩០% នៃផលិតផលរ៉ែថ្មអារដែលកែច្នៃក្នុងប្រទេសកម្ពុជា ត្រូវបាននាំចេញទៅក្រៅប្រទេស។

យ៉ាងណាមិញ លោកស្រី ឡេង ដាវី អនុប្រធានសមាគមថ្មអារបានថ្លែងថា កន្លងទៅដោយសារវិបត្តិសេដ្ឋកិច្ចសាកលបានធ្វើឲ្យតម្រូវការថ្មអារធ្លាក់ចុះ ដែលនាំឲ្យអាជីវកម្មរ៉ែថ្មអារនៅក្នុងប្រទេសកម្ពុជា ស្ទើរតែឈានទៅរកការដួលរលំ។

បើតាមលោកស្រី ឡេង ដាវី ការចេញមុខជួយសង្រ្គោះទាន់ពេលវេលារបស់រដ្ឋាភិបាល បានជួយស្រោចស្រង់ស្ថានភាពឧស្សាហកម្មថ្មអារក្នុងប្រទេសកម្ពុជាឲ្យរស់រានឡើងវិញ តាមរយៈការបន្ធូរបន្ថយពន្ធ រួមទាំងការសម្រួលនីតិវិធីនាំចេញ ដែលបានជួយឲ្យអាជីវកម្មរ៉ែថ្មអារដែលស្ទើរតែដួលរលំទៅហើយនោះមានសន្ទុះរីកចម្រើនកើនឡើង ៤ ដង គិតមកដល់ឆ្នាំ២០២៤។

បន្ថែមពីនេះ ប្រមុខរដ្ឋាភិបាលបានណែនាំឲ្យមានការសហការគ្នារវាងក្រសួងស្ថាប័នពាក់ព័ន្ធនានា ជាមួយសមាគមថ្មអារកម្ពុជា ដើម្បីធ្វើឲ្យអាជីវកម្មរ៉ែថ្មអារកាន់តែរីកចម្រើន កុំឲ្យមានការបិទ ឬផ្អាក នាំឲ្យប៉ះពាល់ដំណើរការអាជីវកម្មវិស័យថ្មអារនៅក្នុងប្រទេសកម្ពុជា៕