ព័ត៌មានជាតិ

បង្កើតអនុគណៈកម្មការចំពោះកិច្ច សម្រួលការចាក់វ៉ាក់សាំងកូវីដ-១៩ ជូនកម្មករ និយោជិត

បានផុស

៣ years មុន

នៅ

ថ្ងៃសៅរ៍ ២០ មីនា ២០២១

ដោយ

ក្រសួងការងារ និងបណ្តុះបណ្តាលវិជ្ជាជីវៈ កាលពីថ្ងៃទី១៧ ខែមីនា ឆ្នាំ២០២១ បានសម្រេចបង្កើតអនុគណៈកម្មការចំពោះកិច្ចមួយ ដើម្បីចាក់វ៉ាក់សាំងកូវីដ-១៩ ជូនកម្មករនៅតាមបណ្តារោងចក្រសហគ្រាស និងកម្មករសេដ្ឋកិច្ចក្រៅប្រព័ន្ធ ដែលអនុគណៈកម្មការនេះ មានប្រធាន អនុប្រធាន និងសមាជិកចំនួន៦៧រូប ហើយមានលោក ហេង សួរ រដ្ឋលេខាធិការក្រសួង និងជាអ្នកនាំពាក្យក្រសួងការងារជាប្រធាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមសេចក្តីសម្រេចរបស់ក្រសួង អនុគណៈកម្មការនេះ មានភារកិច្ចសហការជាមួយគណៈកម្មករចំពោះកិច្ចចាក់វ៉ាក់សាំងកូវីដ-១៩ នៅក្របខណ្ឌទូទាំងប្រទេស ដើម្បីសម្របសម្រួលចាក់វ៉ាក់សាំងជូនមន្ត្រីក្រសួងការងារ ថ្នាក់ដឹកនាំអង្គការវិជ្ជាជីវៈ កម្មករនិយោជិត នៅតាមរោងចក្រសហគ្រាស និងកម្មករសេដ្ឋកិច្ចក្រៅប្រព័ន្ធជាដើម ហើយអនុគណៈកម្មការនេះ ក៏មានតួនាទីរៀបចំផែនការពិនិត្យវាយតម្លៃកម្រិតហានិភ័យ និងកំណត់អាទិភាពនៅក្នុងភូមិសាស្ត្ររាជធានី-ខេត្ត នៃទីតាំងរោងចក្រសហគ្រាស និងមុខសញ្ញាកម្មករនិយោជិតទាំងក្នុង និងក្រៅប្រព័ន្ធ ដែលត្រូវចាក់វ៉ាក់សាំង រួមទាំងសហការជាមួយអាជ្ញាធរដែនដី និងរដ្ឋបាលរោងចក្រ ដើម្បីគ្រប់គ្រងសណ្តាប់ធ្នាប់ គម្លាតសង្គម និងការងារសន្តិសុខនៅតាមបណ្តាទីតាំងចាក់វ៉ាក់សាំងនីមួយៗ និងបំពេញភារកិច្ចផ្សេងៗទៀត។

សូមបញ្ជាក់ថា ថ្មីៗនេះ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចេញបទបញ្ជាមួយឲ្យបង្កើតបង្កើតគណៈកម្មការចំពោះកិច្ច ដើម្បីរៀបចំផែនការមេក្នុងដំណើរការចាក់វ៉ាក់សាំងប្រឆាំងកូវីដ-១៩ ដែលពេលនេះកំពុងឆ្លងរាលដាលខ្លាំងនៅកម្ពុជា ហើយគណៈកម្មការនោះមានលោកស្រី ឱ វណ្ណឌីន ជាប្រធាន។

ជាមួយគ្នានោះ សម្តេចតេជោ ហ៊ុន សែន បានតម្រូវឲ្យមានអនុគណៈកម្មការនៅតាមស្ថាប័នផ្សេងៗបន្ថែមទៀត ដើម្បីរៀបចំចាក់វ៉ាក់សាំងឲ្យបុគ្គលិករបស់ខ្លួន ជាពិសេសក្រសួងការងារ និងបណ្ដុះបណ្ដាលវិជ្ជាជីវៈ ដែលត្រូវចាក់វ៉ាក់សាំងជូនកម្មករ និយោជិត នៅតាមរោងចក្រសហគ្រាស អនុគណៈកម្មការនេះត្រូវមើលឲ្យបានត្រឹមត្រូវ ថាតើរោងចក្រនៅតំបន់ណា ដែលត្រូវចាក់មុន ហើយរោងចក្រនៅតំបន់ណា ដែលត្រូវចាក់ក្រោយ ហើយបើតាមសម្តេចតេជោ ហ៊ុន សែន កម្មករកម្មការិនីក្រៅប្រព័ន្ធ ក៏ត្រូវចាក់ផងដែរ៕