ករណីបង្ក្រាបក្រុមចោរប្លន់រហូតមានផ្ទុះអាវុធនៅក្រុងកំពង់ចាម មានមន្ត្រីនគរបាលម្នាក់រងរបួស

ជនសង្ស័យដែលបានធ្វើសកម្មភាពប្លន់នៅក្រោយភ្នំហាន់ជ័យស្រុកកំពង់សៀម​ ខេត្តកំពង់ចាម​ កាលពីកន្លងទៅ​ ត្រូវសមត្ថកិច្ច​ឃាត់ខ្លួនបានហេីយ​ នៅថ្ងៃទី២៥​ ខែកុម្ភៈ​ ឆ្នាំ​២០២៥​ នេះ នៅទីតាំងផ្ទះជនសង្ស័យ ក្នុងភូមិឡឥដ្ឋ សង្កាត់បឹងកុក ក្រុងកំពង់ចាម​។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកឧត្តមសេនីយ៍ត្រី ថេង​ ឆេង​លីម​ មេបញ្ជាការកងរាជអាវុធហត្ថខេត្តកំពង់ចាម បានឱ្យដឹងថា ក្នុងប្រតិបត្តិការបង្ក្រាបជនសង្ស័យរហូតមានការផ្ទុះអាវុធនេះបានបណ្ដាលឲ្យមន្ត្រីនគរបាលម្នាក់រងរបួសចំភ្លៅ។

មេបញ្ជាការកងរាជអាវុធហត្ថខេត្តកំពង់ចាម បន្ថែមថា ដោយសារជនសង្ស័យបានអះអាងថាខ្លួនជាអតីតកងរាជអាវុធហត្ថ ទើបកម្លាំងកងរាជអាវុធហត្ថខេត្តកំពង់ចាម បានសហការជាមួយកម្លាំងនគរបាលខេត្តកំពង់ចាម ដឹកនាំដោយប្រធានគណៈបញ្ជាការឯកភាពរដ្ឋបាលខេត្ត និងលោកព្រះរាជអាជ្ញា បានឃាត់ខ្លួនជនសង្ស័យ១នាក់។​

ជនសង្ស័យមានឈ្មោះ អែម នាង ហៅ ប្រេសុីល មុខរបរអ្នករត់តាក់សុី និងជាបុគ្គលិកវីញ រស់នៅភូមិកំពង់ឬស្សី ឃុំជីរោទិ៍ ស្រុកត្បូងឃ្មុំ ខេត្តត្បូងឃ្មុំ និងបច្ចុប្បន្នស្នាក់នៅផ្ទះកើតហេតុ។ ជនសង្ស័យនេះធ្លាប់ជាប់ពន្ធនាគាររយៈពេល១៨ឆ្នាំ ពីបទឃាតកម្ម នៅពន្ធនាគារត្រពាំងផ្លុង។ ជនសង្ស័យបានអះអាងថា បានចូលបម្រើជាមន្ត្ត្រីអាវុធហត្ថនៅឆ្នាំ១៩៩៣ វគ្គទី១ បានរត់ចោលជួរនៅឆ្នាំ១៩៩៩។

តាមការស្រាវជ្រាវរបស់ជំនាញបុគ្គលិកកងរាជអាវុធហត្ថលើផ្ទៃប្រទេស ឈ្មោះ អែម នាង មិនមានក្នុងបញ្ជីគ្រប់គ្រងកងរាជអាវុធហត្ថទេ។ ករណីនេះ ជំនាញនគរបាលខេត្តកំពង់ចាមកំពុងបន្តនីតិវិធី៕

អត្ថបទ៖ ឡេក ចាន់ពេជ្រ