កសិដ្ឋាននៅខេត្តព្រះសីហនុ​ សាកល្បង​ដាំ​ទំពាំង​​​បាយជូរ និង​បន្លែ​​ផ្លែឈើចម្រុះ​​គ្មានប្រើ​សារជាតិគីមី

ដំណាំទំពាំងបាយជូរ ត្រូវ​បាន​កសិដ្ឋានមួយនៅ​ស្រុក​កំពង់សីលាខេត្តព្រះសីហនុ ​សាកល្បង​ដាំដុះដោយ​ប្រើប្រាស់​បច្ចេកទេស​និង​​វិធីសាស្រ្ត​ដាំដុះ​ ដោយ​មិនប្រើប្រាស់​សារជាតិ​គីមី​នាំ​ឲ្យប៉ះពាល់​ដល់សុខភាព។

កសិដ្ឋានដាំបន្លែ ហ័រណុងហួយ អេកូឡូជីខល បាន​ចាប់ផ្តើមកាលពីខែមករា ឆ្នាំ២០២៤ លើ​ផ្ទៃដីជាង ៣ ហិកតា ដោយផ្តោតសំខាន់ការដាំដុះបន្លែធម្មជាតិសរីរាង្គ​គ្មានជាតិគីមី។ ក្រៅ​ពី​ផ្លែទំពាំងបាយជូរ ​កសិដ្ឋាន​ក៏​បាន​ធ្វើការដាំដុះបន្លែផ្លែឈើមានដូចជា ម្ទេស ប៉េងប៉ោះ ខាត់ណាស្រួយ ផ្ទី កាឆាយ ដើមជន្លង់ ត្រសក់ រួមទាំង​ស្រះចិញ្ចឹមត្រី និងដំណាំរួមផ្សំមួយចំនួនទៀត។

បើតាមតំណាង​​កសិដ្ឋាន នេះជាការចាប់ផ្តើមសាកល្បងតែប៉ុណ្ណោះ ព្រោះនៅតំបន់នេះមានអំណោយ​ផល​ល្អ ក្នុងការដាំដុះបន្លែផ្លែឈើធម្មជាតិដែលគ្មានជាតិគីមី។

ចំពោះដីវិញគឺ​ធ្វើដោយខ្លួនឯង ដែល​មានធាតុផ្សំដូចជា អាចម៌គោ អាចម៌មាន់ អាចម៌ទា ដី និងអង្កាមយកលាយផ្អាប់ជាការ​ស្រេច។

កសិដ្ឋាន​បាន​បញ្ជាក់ថា ដំណាំ​ម្ទេសដែល​បាន​ដាំដុះ​អាចប្រមូលផលបណ្តើរៗក្នុងមួយថ្ងៃបាន​ចំនួន ២០០​ គីឡូក្រាម។ នៅខែមេសា អាចប្រមូលផលកើនឡើងជិត ១ ០០០ គីឡូក្រាម ខណៈ​ដែល​កសិដ្ឋាន​គ្រោង​បន្តពង្រីកបន្ថែម​ទៀតនៅ​ពេល​​ខាងមុខ។

ក្នុង​ឱកាសចុះពិនិត្យទីតាំងកសិដ្ឋានដាំបន្លែ ហ័រណុងហួយ អេកូឡូជីខលស្ថិតនៅភូមិចាំស្រី ឃុំកំពង់សីលា ស្រុកកំពង់សីលា ខេត្តព្រះសីហនុ លោក ម៉ាង ស៊ីណេត អភិបាលនៃគណៈអភិបាលខេត្តព្រះសីហនុ បាន​កោតសរសើរ​ដល់​កសិដ្ឋាន​ដាំបន្លែ ហ័រណុងហួយ អេកូឡូជីខល ដែលបានបោះទុន​វិនិយោគលើដំណាំបន្លែផ្លែឈើធម្មជាតិនៅក្នុងស្រុកកំពង់សីលានាពេលនេះ ហើយកសិដ្ឋាន​ក៏​បាន​ជួយបង្កើនការងារជូនបងប្អូនប្រជាពលរដ្ឋអ្នកស្រុកកំពង់សីលា និងធ្វើការនាំចូលបន្លែផ្លែឈើទាំងអស់នេះចូលទីផ្សារក្នុងខេត្តព្រះសីហនុ និងបន្តធ្វើការចែកចាយទៅកាន់បណ្តាទីផ្សារនៅក្នុងរាជធានី ខេត្ត ជាពិសេសចូលរួមកាត់បន្ថយការនាំចូលបន្លែផ្លែឈើពីប្រទេសជិតខាង ដែលមានផលប៉ះពាល់ដល់សុខុមាលភាពអ្នកបរិភោគ។

លោក​អភិបាលខេត្ត ក៏​គាំទ្រឱ្យកសិដ្ឋានពង្រីកអាជីវកម្មរបស់ខ្លួនបន្ថែមទៀត ដើម្បីកំណើនការងារជូនប្រជាពលរដ្ឋខេត្តព្រះសីហនុ ហើយរដ្ឋបាលខេត្ត​នឹង​រង់ចាំជួយសម្របសម្រួលបញ្ហាប្រឈមនានានៅក្នុងកសិដ្ឋានគ្រប់ពេលវេលា៕