ព័ត៌មានជាតិ

រដ្ឋបាលខណ្ឌឫស្សីកែវ ស្ថាបនាប្រព័ន្ធលូបង្ហូររំដោះទឹក ១ ខ្សែ ជូនពលរដ្ឋជិត ៨០ គ្រួសារ រងផលប៉ះពាល់កន្លងមក

បានផុស

១ ខែ មុន

នៅ

ថ្ងៃព្រហស្បតិ៍ ១៣ មីនា ២០២៥

ដោយ

អ៊ិន ពិសី

រដ្ឋបាលខណ្ឌឫស្សីកែវ បានស្ថាបនាប្រព័ន្ធលូបង្ហូររំដោះទឹក ១ ខ្សែ ជូនប្រជាពលរដ្ឋចំនួន ៧៨ គ្រួសារ ដែលរងផលប៉ះពាល់កន្លងមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី ១២ ខែមីនា ឆ្នាំ ២០២៥ លោក ជិន ប៊ុនធឿន អភិបាលខណ្ឌឫស្សីកែវ និង លោក ប៊ុត បូវណ្ណារ័ត្ន អភិបាលរងខណ្ឌ បានអញ្ជើញដឹកនាំមន្ត្រីជំនាញពាក់ព័ន្ធចុះពិនិត្យមើលការដ្ឋានសាងសង់ប្រព័ន្ធលូបង្ហូររំដោះទឹក ស្ថិតក្នុងសង្កាត់ទួលសង្កែទី ១ ខណ្ឌឫស្សីកែវ ដែលទីតាំងនេះជួបបញ្ហាប្រព័ន្ធលូបង្ហូរជាច្រើនឆ្នាំមកហើយ ហើយក៏ជាតំបន់ទាប និងប្រព័ន្ធបង្ហូរមួយចំនួនរងការខូចខាត។

លោក ឡេង ចាន់វិសិដ្ឋ ប្រធានការិយាល័យ ហិរញ្ញវត្ថុ និងផែនការ អភិវឌ្ឍន៍ខណ្ឌ ប្រាប់កម្ពុជាថ្មីឱ្យដឹងថា ក្រោមការដឹកនាំពីសំណាក់លោក ជិន ប៊ុនធឿន អភិបាលខណ្ឌ បានស្ថាបនាប្រព័ន្ធបង្ហូររំដោះទឹកនេះ ដោយត្រូវដាក់ប្រព័ន្ធលូ ០១ ខ្សែ ក្នុងរបងរោងចក្រ ឆ្លងកាត់ពីច្រកផ្លូវលំ រហូតទីតាំងភ្ជាប់អណ្តូងលូ ផ្លូវលេខ ៩០០ ក្រុមទី ៦ ភូមិចុងខ្សាច់ សង្កាត់ទួលសង្កែទី ១ (ជាគម្រោងអភិវឌ្ឍន៍របស់រដ្ឋបាលខណ្ឌឫស្សីកែវ) ដើម្បីរំដោះទឹកលិចផ្លូវ និងផ្ទះសម្បែងប្រជាពលរដ្ឋក្នុងក្រុមទី ៦ ភូមិចុងខ្សាច់ ចំនួន ៧៨ គ្រួសារ ដោយវាស់វែងទំហំ គម្លាតពីរបង ជម្រៅតាមកូដណេវ៉ូត្រឹមត្រូវ ដែលមានប្រវែងសរុប ២៣០ ម៉ែត្រ និងមានទំហំមុខកាត់ ៨ តឹក។

គួរជម្រាបថា ទីតាំងជួបបញ្ហាប្រព័ន្ធលូបង្ហូរជាច្រើនឆ្នាំខាងលើនេះ ជាតំបន់ទាប មានរោងចក្រជាប់គ្នា ពីមុនជាដីទំនេរ ដែលបច្ចុប្បន្នគេទិញមកអភិវឌ្ឍន៍ធ្វើរោងចក្រ។ ចំពោះប្រព័ន្ធលូដែលនៅពីខាងក្រោមគឺទាប ដូច្នេះខាងរោងចក្របានរៀបប្រព័ន្ធលូថ្មីនៅក្នុងផ្ទៃរោងចក្រ ទើបទឹកហូរចេញពីការប្រើប្រាស់របស់ប្រជាពលរដ្ឋប្រមាណជិត ៨០ គ្រួសារ បូកបន្ថែមទឹកហូរតាមទំនប់ផ្លូវ ៧០ ពីរង្វង់មូលកួចកាណុង ចុះទៅតាមតំបន់ខាងលើ ធ្វើឱ្យបរិមាណច្រើនទឹកហូរមិនទាន់។

គួររំលឹកផងដែរថា កាលពីព្រឹកថ្ងៃទី ៤ ខែមករា ឆ្នាំ ២០២៥ កន្លងទៅ អភិបាលខណ្ឌឫស្សីកែវ បានអញ្ជើញចុះជួបសំណេះសំណាលសួរសុខទុក្ខជាមួយប្រជាពលរដ្ឋ និងដោះស្រាយបញ្ហាប្រព័ន្ធលូបង្ហូរទឹកស្អុយ។ បច្ចុប្បន្ន ប្រជាពលរដ្ឋជិត ៨០ គ្រួសារ ដែលកំពុងរងផលប៉ះពាល់នោះ ស្ថិតនៅសង្កាត់ទួលសង្កែទី ១ ខណ្ឌឫស្សីកែវ រាជធានីភ្នំពេញ៕

អត្ថបទ ៖ សំណាង