ព័ត៌មានជាតិ

ពលរដ្ឋនៅតំបន់ភ្នំវល្លិ៍ សប្បាយចិត្តដែលរដ្ឋធ្វើផ្លូវជាង១១គីឡូម៉ែត្រ តភ្ជាប់ពីខេត្តកែបទៅខេត្តកំពត

បានផុស

២ សប្តាហ៍ មុន

នៅ

ថ្ងៃព្រហស្បតិ៍ ២០ មីនា ២០២៥

ដោយ

កែប ៖ ប្រជាពលរដ្ឋដែលរស់នៅតំបន់ភ្នំវល្លិ៍ មានសេចក្ដីត្រេកអរ និងសប្បាយរីករាយក្រៃលែង បន្ទាប់ពី រាជរដ្ឋាភិបាលបានសម្រេចធ្វើផ្លូវមួយខ្សែមានប្រវែងជាង១១គីឡូម៉ែត្រ ដែលផ្លូវនេះបំបែកចេញពីផ្លូវជាតិលេខ ៣៣ ខាងកើតវិទ្យាល័យ ហ៊ុន សែន ចំការដូង និងបញ្ចប់ត្រង់ភូមិចំការចេកឃុំពងទឹក ស្រុកដំណាក់ចង្អើរ ខេត្តកែប និងតភ្ជាប់ជាមួយភូមិត្រពាំងជ្រៃ ឃុំចំណាក់កន្ទួតខាងត្យូង ស្រុកកំពង់ត្រាច ខេត្តកំពត ដោយកំណាត់ផ្លូវកៅស៊ូមួយខ្សែនេះកំពុងដំណើរការសាងសង់ជាដំណាក់កាល ជិតសម្រេចរួចរាល់១០០ភាគរយហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី ភូ មុំ មេឃុំជំទប់ទី១ ឃុំពងទឹក បានឱ្យដឹងនៅថ្ងៃទី ២០ ខែមីនា ឆ្នាំ២០២៥នេះថា ការកសាងផ្លូវខាងលើនេះ ពិតជាមានសារៈប្រយោជន៍យ៉ាងច្រើនណាស់ពិសេសសម្រាប់បងប្អូនប្រជាពលរដ្ឋដែលរស់នៅតាមបណ្ដោយផ្លូវចំនួន៧ភូមិ ដែលផ្ដល់ភាពងាយស្រួលក្នុងការធ្វើដំណើរក៏ដូចជាដឹកកសិផលជាដើម។ ហើយថែមទាំងផ្ដល់នូវភាពងាយស្រួលដល់ភ្ញៀវទេសចរណ៍ក្នុងការធ្វើដំណើរទៅលេងកម្សាន្តទស្សនាចំការម្រេច និង ទីតាំងទេសចរណ៍ដទៃទៀតនៅតាមតំបន់ភ្នំវល្លិ៍នេះ។

ជាមួយគ្នានេះប្រជាពលរដ្ឋក្នុងមូលដ្ឋាន សម្តែងការសប្បាយចិត្តជាមួយសមិទ្ធផលខាងលើ ក៏ព្រោះពិតជាបានសម្រួលដល់ជីវភាពរស់នៅពួកគាត់រាប់តាំងពីការធ្វើដំណើរ និងដឹកជញ្ជួនទំនិញកសិផលជាដើម។

គួរបញ្ជាក់ថា ភ្នំវល្លិ៍គឺជាអតីតទីតាំងសមរភូមិក្តៅក្នុងសម័យសង្គ្រាម តែបច្ចុប្បន្នតំបន់នេះ បានប្រែពីតំបន់ក្រាលដោយសំណល់សង្រ្គាម មកក្រាលដោយផលដំណាំចម្រុះ ដែលមានសក្កានុពលជាច្រើនមុខពិសេស ចំការម្រេច។

ទោះជាយ៉ាងណាក្រោយផ្លូវមួយខ្សែនេះបានសាងសង់រួចរាល់ និងផ្តល់ប្រយោជន៍ជូនប្រជាពលរដ្ឋ ក្នុងការធ្វើដំណើរទៅកាន់មន្ទីរពេទ្យ សាលារៀន និងការដឹកជញ្ជូនដំណាំកសិកម្មផ្សេងៗ ពិសេសនោះគឺជាចំណងហេដ្ឋារចនាសម្ព័ន្ធមួយដែលទាក់ទាញភ្ញៀវទេសចរឱ្យធ្វើដំណើរមកលេងកម្សាន្ត តំបន់ទេសចរណ៍ខេត្តកែប តំបន់អេកូទេចរណ៍ភ្នំវល្លិ៍ និងតំបន់កសិឧស្សហកម្មដែលមានសក្តានុពល៕

ដោយ ៖ សឹង រ៉ាត់