ព័ត៌មានជាតិ

កម្ពុជាកំណត់ជាក់លាក់ដំណាំយុទ្ធសាស្រ្ត ៩ ប្រភេទ ទាក់ទាញជំរុញការវិនិយោគ

បានផុស

១ year មុន

នៅ

ថ្ងៃអង្គារ ៨ មេសា ២០២៥

ដោយ

ដំណាំយុទ្ធសាស្រ្តចំនួន ៩ ប្រភេទ ត្រូវបានកំណត់ជាដំណាំស្នូលដើម្បីជំរុញពង្រីកការដាំដុះ និងការវិនិយោគកែច្នៃដើម្បីឆ្ពោះទៅការនាំចេញ។

នៅក្នុងការបើកវេទិកានិងពិព័រណ៍កសិកម្មកម្ពុជា (CAFE25) កាលពីម្សិលមិញនេះ ក្រោមគំនិតផ្ដួចផ្ដើមរបស់ក្រសួងកសិកម្ម រុក្ខាប្រមាញ់ និងនេសាទ កិច្ចសន្ទនារវាងតួអង្គក្នុងខ្សែច្រវាក់តម្លៃកសិកម្ម ត្រូវបានធ្វើឡើងដើម្បីផ្តល់ធាតុចូលល្អៗអំពីតម្រូវការ រួមទាំងបង្ហាញពីឱកាសវិនិយោគសម្រាប់ផលិតផលកសិកម្មសំខាន់ៗដែលជាមូលដ្ឋានគ្រឹះក្នុងការពង្រីកបណ្តាញវិនិយោគ ដែលទាមទារឱ្យគ្រប់តួអង្គពាក់ព័ន្ធចូលរួមសិក្សាស្វែងយល់ឱ្យបានស៊ីជម្រៅ និងរួមគ្នាដោះស្រាយតាមយន្តការ “រដ្ឋ-ឯកជន-ដៃគូអភិវឌ្ឍន៍-សហគមន៍កសិកម្ម” ដើម្បីជំរុញ និងបង្កើនល្បឿនការអភិវឌ្ឍវិស័យកសិកម្មនៅកម្ពុជា។

ក្នុងឱកាសនោះ ប្រភេទមុខទំនិញកសិផលយុទ្ធសាស្រ្តចំនួន ៩ ប្រភេទ ត្រូវបានកំណត់ជាក់លាក់ដើម្បីជំរុញការវិនិយោគ ក្នុងនោះមាន ស្រូវអង្ករ ស្វាយចន្ទី កៅស៊ូ ដំឡូងមី ស្វាយ បន្លែ វារីវប្បកម្ម ម្រេច និងផលិតផលឈើ។

លោក ឃឹម ហ្វីណង់ អនុរដ្ឋលេខាធិការ និងជាមន្រ្តីអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទបានថ្លែងថា ប្រទេសកម្ពុជាមានសក្ដានុពលខ្ពស់ ក្នុងការប្រែក្លាយខ្លួនទៅជាតួអង្គដ៏សំខាន់នៅក្នុងទីផ្សារកសិកម្មពិភពលោក។

ក្នុងគោលបំណងពង្រីកភាពជាដៃគូ និងទាក់ទាញការវិនិយោគគាំទ្រវិស័យកសិកម្មកម្ពុជា កិច្ចសន្ទនារវាងតួអង្គសំខាន់ៗក្នុងខ្សែច្រវាក់តម្លៃ ត្រូវបានរៀបចំឡើងដើម្បីផ្តល់ធាតុចូលល្អៗ ក្នុងការត្រៀមឆ្ពោះទៅរៀបចំព្រឹត្តិការណ៍ធំនៃវេទិកា និងពិព័រណ៍ កសិកម្មកម្ពុជា (CAFE25) ដែលគ្រោងនឹងរៀបចំឡើងក្នុងខែវិច្ឆិកា ឆ្នាំ២០២៥ខាងមុខនេះ។

ការរៀបចំវេទិកានិងពិព័រណ៍កសិកម្មកម្ពុជា (CAFE25) គោលដៅដើម្បីកៀរគរអ្នកវិនិយោគទាំងក្នុងស្រុក តំបន់ និងពិភពលោកលើវិស័យកសិកម្មនៅកម្ពុជា។

លោក ឃឹម ហ្វីណង់ បានគូសបញ្ជាក់ថា ប្រទេសកម្ពុជាមានសក្ដានុពលលើវិស័យកសិកម្ម ផលិតបានច្រើន មានប្រភេទកសិផលមានសក្ដានុពលក៏ច្រើន។ តែបើមិនមានការតភ្ជាប់ ការផ្សព្វផ្សាយ និងបើមិនមានវេទិកាណាមួយដែលនាំឲ្យអ្នកវិនិយោគនិងអ្នកផលិតជួបគ្នាទេ ក៏មិនអាចចាប់បានឱកាសទាំងនោះដែរ។

វេទិកានិងពិព័រណ៍កសិកម្មកម្ពុជា (CAFE25) ក្រៅពីដើម្បីកៀរគរអ្នកវិនិយោគ ក៏ដើម្បីបង្អួតពីផលិតផលកសិកម្មដែលកម្ពុជាមានសក្តានុពលទៅដល់អ្នកវិនិយោគ។ បើតាមមន្រ្តីអ្នកនាំពាក្យក្រសួងកសិកម្ម ដើម្បីចាប់យកឱកាសពីសក្ដានុពលនេះ ទាមទារឱ្យមានការគាំំទ្រការវិនិយោគិននៅក្នុងស្រុក តំបន់ និងពិភពលោក ព្រមជាមួយការពង្រឹងភាពជាដៃគូពាណិជ្ជកម្មដើម្បីសម្រេចបាននូវគោលដៅទាំងនោះបានទាំងស្រុង៕