រដ្ឋជួយសន្សំលុយពលរដ្ឋជិត២លានដុល្លារ តាមរយៈការបញ្ចេញឡានដឹកពលរដ្ឋថ្ងៃចូលឆ្នាំ

រដ្ឋបានជួយសន្សំការចំណាយថវិការបស់ប្រជាពលរដ្ឋចំនួន១លាន៧សែនដុល្លារ តាមរយៈការបញ្ចេញរថយន្តក្រុងដឹកជញ្ជូនពលរដ្ឋទៅមកជាង២ពាន់ជើង ក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ។ នេះជាការថ្លែងឱ្យដឹងដោយប្រមុខរដ្ឋាភិបាល​ សម្ដេចធិបតី ហ៊ុន ម៉ាណែត។

លើកឡើងនៅក្នុងពិធីសម្ពោធដាក់ឱ្យប្រើប្រាស់ជាផ្លូវការកំពង់ផែទេសចរណ៍អន្តរជាតិខេត្តកំពត នៅថ្ងៃទី២១ ខែមេសា ឆ្នាំ២០២៥ សម្ដេចធិបតី ហ៊ុន ម៉ាណែត បានថ្លែងអះអាងថា រដ្ឋបាលរាជធានីភ្នំពេញ បានរៀបចំឡានជិត៦០០គ្រឿង ហើយក្នុងរយៈពេល៧ថ្ងៃ ពោលគឺចាប់ពីថ្ងៃទី១១ ដល់ថ្ងៃទី១៧ ខែមេសា នៃឱកាសពិធីបុណ្យចូលឆ្នាំថ្មី បើគិតជាជើង ទាំងទៅ ទាំងមក សរុបជាង២២៥១ជើង ដោយបានដឹកជញ្ជូនប្រជាពលរដ្ឋខ្ទង់៨៥៨៤៩នាក់។

បើតាមសម្ដេចធិបតី តាមរយៈការបញ្ចេញរថយន្តក្រុងសាធារណៈដឹកជញ្ជូនប្រជាពលរដ្ឋនេះ បានចូលរួមសន្សំថវិការបស់ប្រជាពលរដ្ឋជាង ១លាន៧សែនដុល្លារ។

ភ្ជាប់គ្នានេះ សម្ដេចធិបតី នាយករដ្ឋមន្ដ្រី ក៏បានថ្លែងអំណរគុណដល់អាជ្ញាធររាជធានី ខេត្ត និងកងកម្លាំងគ្រប់លំដាប់ថ្នាក់ ដែលបានចូលរួមរៀបចំតុបតែង ថែរក្សាសុខសុវត្ថិភាព ក្នុងឱកាសពិធីបុណ្យចូលឆ្នាំថ្មីប្រពៃណីជាតិខ្មែរ ឱ្យដំណើរការទៅដោយសប្បាយរីករាយ និងមានសន្ដិសុខ សុវត្ថិភាពជូនប្រជាពលរដ្ឋ និងភ្ញៀវទេសចរជាតិ-អន្តរជាតិ បានដើរលេងកម្សាន្តយ៉ាងសប្បាយរីករាយ។ ពិសេសការធានាបានសុវត្ថិភាពចរចរណ៍តាមដងផ្លូវ បើទោះបីគ្រោះថ្នាក់ចរចរណ៍នៅតែកើតមានឡើង តែឆ្នាំនេះ គ្រោះថ្នាក់ចរាចរណ៍ មានការថយប្រមាណជិត ៤០% ផងដែរ៕