ព័ត៌មានជាតិ

មិនពេញចិត្តតម្លៃទូទាត់សំណងធានារ៉ាប់រង អាចប្តឹងមកនិយ័តករធានារ៉ាប់រងកម្ពុជា

បានផុស

៣ ខែ មុន

នៅ

ថ្ងៃសុក្រ ២៥ មេសា ២០២៥

ដោយ

តាមការបញ្ជាក់ពីអគ្គនាយកនៃនិយ័តករធានារ៉ាប់រងកម្ពុជា បានលើកទឹកចិត្តដល់អ្នកប្រើប្រាស់សេវាធានារ៉ាប់រង អាចដាក់ពាក្យបណ្តឹងមកនិយ័តករធានារ៉ាប់រងកម្ពុជាករណីមិនពេញចិត្តលើការផ្តល់សេវា ឬការដោះស្រាយសំណងណាមួយមិនសមស្របលើការទូទាត់ប្រើប្រាស់សេវាធានារ៉ាប់រង។

លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជាបានថ្លែងថា ក្រោយការដាក់ឲ្យអនុវត្តតាំងពីឆ្នាំ ២០២២ និយ័តករធានារ៉ាប់រងកម្ពុជា ទទួលបានពាក្យបណ្តឹងជាច្រើនលើការប្រើប្រាស់សេវាធានារ៉ាប់រង ហើយក៏បានដោះស្រាយជាបន្តបន្ទាប់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា

លោកថា និយ័តករធានារ៉ាប់រងកម្ពុជាប្រើប្រាស់យន្តការ ដោយមានទទួលនិងដោះស្រាយបណ្តឹងតវ៉ាដោយផ្ទាល់ និងក៏អាចដាក់ពាក្យបណ្តឹងតាមអនឡាញបានផងដែរ។

ក្នុងនាមជានិយ័តករ ការដោះស្រាយបណ្តឹងត្រូវមើលទាំងសងខាងទាំងក្រុមហ៊ុននិងអតិថិជន។ នេះបើតាមលោក លោក ប៊ូ ច័ន្ទភីរូ។

បើតាមលោក ប៊ូ ច័ន្ទភីរូ ធានារ៉ាប់រងជាកិច្ចសន្យាចងភ្ជាប់ជាមួយលក្ខខណ្ឌ ដែលត្រូវអនុវត្តទាំងអ្នកទិញនិងអ្នកលក់។

លោកបានលើកពីបណ្តឹងមួយចំនួនមានពាក់ព័ន្ធការផ្តល់សេវារបស់ក្រុមហ៊ុនធានារ៉ាប់រង និងករណីខ្លះក៏ពាក់ព័ន្ធអតិថិជនដែលមិនបានយល់ពីការប្រើប្រាស់សេវាធានារ៉ាប់រងឲ្យបានត្រឹមត្រូវ។

លោក ប៊ូ ច័ន្ទភីរូ បានក្រើនរំលឹកថា បើករណីអតិថិជនមិនសប្បាយចិត្តលើការផ្តល់សេវា ឬការដោះស្រាយមិនសមស្របអាចប្តឹងមកនិយ័តករធានារ៉ាប់រងកម្ពុជា ដើម្បីរួមគ្នាលើកកម្ពស់និងបង្កើនគុណភាពសេវាធានារ៉ាប់រងក្នុងប្រទេសកម្ពុជាឲ្យកាន់តែល្អប្រសើរឡើង៕